Yelemiya 34:1-22
34 Yehoba waambijile Yelemiya kimye Nebukaneza Mfumu wa Babilona ne bashilikale banji bonse, ne bufumu bonse bwa pano pa ntanda bwajinga mu maboko anji, ne bantu bonse kyo balwilenga na Yelusalema ne mizhi yanji yonse amba:+
2 “Yehoba Lesa wa Isalela waamba’mba, ‘Yanga kwi Zedekiya+ Mfumu wa Yuda ukamubuule’mba: “Yehoba waamba’mba, ‘Amiwa mbena kupana uno muzhi mu maboko a mfumu wa Babilona, kabiji ukasoka uno muzhi.+
3 Kabiji obewa kechi ukaposomoka mu kuboko kwanji ne, mambo bakakukwata ne kukupana kwi aye.+ Kabiji ukamona mfumu wa Babilona ne kwisamba nanji saka mwitala, ne obewa ukaya ku Babilona.’+
4 Nangwa byonkabyo, obewa Zedekiya Mfumu wa Yuda, umvwa byaamba Yehoba, ‘Yehoba waamba pe obewa amba: “Kechi ukafwa na mpoko ne.
5 Obewa ukafwa mu mutende+ kabiji bakabanza mujilo pa kijilo kyobe ne kusoka binunka bulongo byonkatu byo baubile na bashakulu bobe ne na bamfumu bajingako obewa saka ukyangye kwikalako, kabiji bakakujila amba, ‘Yoyoyo mfumu wetu!’ mambo ‘Amiwa yami naamba,’ byo byaamba Yehoba.”’”’”
6 Kepo ngauzhi Yelemiya abuujile Zedekiya Mfumu wa Yuda mu Yelusalema bino byambo byonse,
7 kimye bashilikale ba mfumu wa Babilona kyo balwilenga na Yelusalema ne mizhi yonse ya mu Yuda yashajilepo,+ na bena Lakishi+ ne na bena Azeka;+ mambo ino yo yajingatu mizhi yakosa yashajilemo mu mizhi ya Yuda.
8 Yehoba waambijile Yelemiya kimye Mfumu Zedekiya kyo alayañene lulayañano na bantu bonse ba mu Yelusalema kuba’mba ebabuule bya kwibakasulula+ amba,
9 muntu yense wafwainwa kukasulula bazha banji Bahebelu, ba balume ne ba bakazhi, kuba’mba kafwako muntu nangwa umo wafwainwa kukwata jibiji buzha mulongo wanji Muyudea ne.
10 Onkao mambo, babinemanga bonse ne bantu bonse bakookejile. Balayañene kuba’mba muntu yense wafwainwa kukasulula bazha banji ba balume ne ba bakazhi, kabiji kechi wafwainwa kwibalama kwikala bazha banji ne. Abo bakookejile ne kwibakasulula kuba’mba bayenga.
11 Nangwa byonkabyo, byo papichile kimye babwezhezhe bazha babo ba balume ne ba bakazhi bo bakasulwile ne kwibabwezha jibiji mu buzha.
12 Ponkapo byambo bya Yehoba byaishile kwi Yelemiya kufuma kwi Yehoba amba:
13 “Yehoba Lesa wa Isalela waamba’mba, ‘Amiwa nalayañene na bashakulu benu+ kimye kyo nebafumishe mu kyalo kya Ijipita mu buzha+ namba:
14 “Pa kupwa myaka itanu na ibiji, anweba bonse pa muntu pa muntu mukakasulule mulongo wenu Muhebelu ye bemupoteshe kabiji wimwingijila pa myaka itanu na umo.”+ Pakuba bashakulu benu kechi bañumvwijile nangwa kunkookela ne.
15 Anweba katatakatu* papo mwaubile bintu byawama ku meso ami kupichila mu kukasulula balongo benu, kabiji mwalayañene lulayañano ne amiwa mu nzubo itelwa pa jizhina jami.
16 Pano bino, mwapimpwile milanguluko yenu ne kutamisha jizhina jami+ byo mwabwezhezhe bazha benu ba balume ne ba bakazhi, bonka bo mwakasulwile mwayila byo bakebelenga kabiji mwibabwezhezhe jibiji mu buzha.’
17 “Onkao mambo, Yehoba waamba’mba: ‘Anweba kechi mwankookejile ne kukasulula balongo benu ne boba bo mwikala nabo ne.’+ Yehoba waamba’mba, ‘Pano amiwa mbena kutaya mbila ya kwimukasulula, mukafwa ku mpoko, ku mwalo,* ku nzala+ kabiji nkemwalula kwikala kintu kikalengela bufumu bonse bwa pano pa ntanda kumvwa moyo.+
18 Umvwai, bino byo bikamwekela bantu bazhilulula lulayañano lwami ne kubula kulama byambo byo balayañene ne amiwa kimye kyo bachibile mwana ñombe ne kupita pakachi,+
19 ko kuba’mba babinemanga ba mu Yuda, babinemanga ba mu Yelusalema, bakapaso, bañanga ne bantu bonse ba mu kyalo bapichile pakachi ka mwana ñombe:
20 Amiwa nkebapana ku balwanyi babo ne ku boba bakeba konauna bumi* bwabo, kabiji mibiji yabo yafwa ikekala ke kajo ka bañonyi ne ka banyama ba mungye.+
21 Kabiji Zedekiya Mfumu wa Yuda ne babinemanga banji nkebapana mu kuboko kwa balwanyi babo ne mu kuboko kwa boba bakeba konauna bumi* bwabo, ne mu kuboko kwa bashilikale ba mfumu wa Babilona,+ bonka baleka kulwa ne anweba.’+
22 “Yehoba waamba’mba, ‘Amiwa nkebakambizha ne kwibabwezha mu uno muzhi, bakalwa nanji ne kumushinda kabiji bakamusoka;+ ne mizhi ya mu Yuda nkeyonauna kabiji kechi mukekala bantu ne.’”+
Tubyambo twa munshi
^ Mu Kihebelu, “lelo.”
^ Nangwa’mba “kikola.”
^ Nangwa’mba “bakeba mweo wabo.”
^ Nangwa’mba “bakeba mweo wabo.”
