Kulolobwela: Kange mulangulukenga’mba mwafwainwa kulumbululatu byonse ne. Yesu waipuzhanga mepuzho a kukwasha bantu bene kulangulukapo ne kwitaina mikumbu. (Mt 17:24-27) Mepuzho alengela lufunjisho kuwama kabiji emukwasha ne kuyuka inge awo muntu washiinwa ne kwitabila byo mubena kumufunjisha. (be 253 mafu. 3-4) Inge mwaipuzha bwipuzho, tekanyai ne kupembela mukumbu. Inge ye mubena kufunjisha wakumbula mukumbu wabula kuyilamo, kumubula mukumbu ne, mwafwainwatu kumutangijila na mepuzho apela a kumukwasha kutaana mukumbu. (be 238 mafu. 1-2) Kange mwambenga lubilo kya kuba’mba ye mubena kufunjisha wakankalwa kumvwa byo mubena kwamba.—be 230 jifu. 4.

Kulengela Lufunjisho Kukatazha: Chinuzhukainga kwamba pa byonse byo mwayuka pa yeo mutwe. (Yoa 16:12) Isambaitu pa kishinka kikatampe kiji mu jojo jifuka kwapwa. (be 226 mafu. 4-5) Kuvuzha bya kwambapo kulengela kishinka kine kubula kumvwanyika. (be 235 jifu. 3) Mwafwainwa kuya mu jifuka jikwabo inge ye mu bena kufunjisha waumvwa kine kishinka kiji mu jojo jifuka.

Kupitamotu Bukiji: Kyanema ke kufika ye mubena kufunjisha pa muchima kechi kupwisha byavula ne. (Luk 24:32) Ingijishainga binembelo biji mu jifuka muji bishinka pa kuba’mba mwibakwashe na bulume bwa Mambo a Lesa. (2Ko 10:4; Heb 4:12; be 144 mafu. 1-3) Ingijishainga bya kumwenako byapeela. (be 245 mafu. 2-4) Funjishainga bantu kwesakana na byo babena kupitamo ne byo baitabilamo. Bepuzhainga mepuzho nabiji a kuba’mba: “Mwalangulukapo’mba ka pa byo twafunda?” “Bibena kwitufunjishapo ka pe Yehoba?” “Mukamwenamo ka inge mwalondela uno mukambizho?”—be 238 ma. 3-5; 259 jifu. 1.