Alexander MacGillivray, watangijilanga musampi mu Australia, walangulukilengapo bingi kimye kyo ajinga mu ofweshi wanji. Walangulukilepo bingi pa moba avula, pano wamwenepo jishinda mwa kubila. Wafuukwilepo kwisamba ne Frank Rice.

Frank wa myaka 28, painiya wabambakene bingi ye wajinga mutanshi kufika pa musampi. Wafunjile bukine saka akijitu mwanyike kabiji kechi papichile kimye kyabaya ne, watendekele bupainiya. Waingijile mwingilo wa kusapwila mu Australia pa myaka kukila pa 10, waendanga pa mbongolo, pa nkinga, pa kapulututu ne mu motoka. Byo akokolokeleko pacheche pa Betele, Frank winengezhe kuya na kwingijila ku mpunzha ikwabo.

Mulongo MacGillivray byo aichile Frank mu ofweshi, wamumwesheshe mapu a ku makuji a ku kabeta ka ku buyeke bwa Australia. Wamushikishe’mba: “Frank, ukooba byepi pa kuba’mba ukatendeke kusapwila ku ano mapunzha? Ku ano onse makuji kafwako mulongo nangwa umo ne!”

Frank watendekele kutala pa makuji avula amwekelenga nobe bamangalite ku mukola wa Indian Ocean, atelwanga’mba Netherlands East Indies (aluno ke Indonesia). * Pa ano makuji paikalanga bantu bavula bingi babujile kumvwapo mambo awama a Bufumu bwa Lesa. Byo atongwelenga pa muzhi mukatampe wa Batavia (aluno ke Jakarta), Frank waambile’mba, “Akuno ko ko Mbena Kukeba Kutendekela!”

Frank Rice wafikile mu Jakarta mu 1931, muzhi mukatampe mwajinga busulu pa jikuji ja Java. Wasonkelanga kibamba kwipi na muzhi kabiji walumbikilemo bibokoshi mwajinga mabuku alumbulula Baibolo, akino kyalengejile mwina kino kibamba kukumya.

Frank waambile’mba, “Patanshitu namwekelenga bwenyi ne kuvuluka ku nzubo. Bantu bapitañananga saka bavwala masuchi atoka ne bisochi bitoka, pakuba amiwa navwajilenga bivwalo byajita bya ku Australia. Kechi nayukile kwamba mulaka wa ku Netherlands nangwa mulaka wa ku Indonesia ne. Byo nalombele kwi Yehoba namba  ankwashe, nafuukwilepo kuya ku mpunzha kubila bantu busulu kwakonsha kutanwa bantu bamba Kizungu. Akuno koko natendekejile kusapwila, kabiji kwawamine bingi kwingijila!”

Byo kiji kuba’mba bantu bavula ba ku Jakarta bamba mulaka wa ku Netherlands, Frank wibikileko kuyuka mulaka kabiji watendekele kusapwila ku nzubo ku nzubo. Wafunjilenga ne mulaka wa ku Indonesia, mu kuya kwa kimye wayukile uno mulaka. Frank waambile’mba, “Kechi najinga na mabuku a mu mulaka wa ku Indonesia ne. Yehoba wantangijile kutaana mufunjishi wayukile mulaka wa ku Indonesia kabiji watemenwe kufunda bukine, kabiji waswile kutuntulula buloshuwa wa kuba’mba Bafu Baji Pi? Mabuku avula atuntulwilwe, kabiji bantu bavula bamba mulaka wa ku Indonesia batemenwe kufunda bukine.”

Mu November 1931, bapainiya babiji, ba Clem Deschamp, bajinga na myaka 25, ne ba Bill Hunter ba myaka 19, bafumine ku Australia kwiya mu Jakarta. Ba Clem ne ba Bill baishile na motoka wajinga na mwa kulaala kunyuma, ye wajinga motoka mutanshi kufika mu Indonesia. Byo bafunjileko byambo bicheche mu mulaka wa ku Netherlands, batendekele kusapwila mu mizhi ikatampe ya mu Java.

Painiya mukwabo wa ku Australia aye Charles Harris ye walondejile Clem ne Bill. Kutendeka mu 1935, Charles wasapwilanga mu Java kwingijisha motoka, nkinga ne kushila bantu mabuku a mu milaka itanu: Kialabiki, Kichainizi, Kidutch, Kizungu ne mulaka wa mu Indonesia. Kwajingapo myaka imo yo ashijile bantu mabuku 17,000.

Mabuku Charles o ashijile bantu, ebalengejile kuteshako muchima. Kiloolo umo mu Jakarta washikishe Clem Deschamp amba, “Bantu banga bo ubena kwingila nabo ku East Java?”

Mulongo Deschamp wakumbwile’mba, “umotu.”

 Kiloolo wamwambijile’mba, “Kechi nakonsha kuswa byo ubena kwamba ne. Wafwainwa uji na bantu bavula bo ubena kwingila nabo, mambo wapa bantu mabuku avula!”

Bapainiya batanshi baingijile bingi na ngovu pa kuba’mba basapwile bantu bavula. Bill Hunter waambile’mba, “Twaingijile monse mwapela jikuji ne kwisamba na bantu bavula.” Byo baingijilenga, babyajilenga nkunwa ya bukine, ne kyafuminemo bakwashishe bantu bavula kuyuka Lesa.—Sapwi. 11:6; 1 Ko. 3:6.

Mu 1936, bapainiya mu Java besambilenga pa byo bakonsha kwingilako pakatampe mwingilo mu Sumatra jikuji jikatampe ja butanu na bumo pano pa ntanda. Jino jikuji jiji na binkunenke, jaikela pakachi ka ntanda yonse kabiji muji mizhi ikatampe ne bichi byo bajimba, muji ne bisanzangala ne mavunda munoka mvula kimye kyonse.

Bapainiya baumvwañene kutuma Frank Rice, onkao mambo bavwangile pamo mali abo pa kuba’mba endele. Aku bamupatu ano mali, Frank wayile ku Medan, ku kabeta ka ku buyeke bwa Sumatra na byola byanji bibiji bya kwingijisha mu mwingilo, bibokoshi 40 bya mabuku kabiji washajile na mali acheche. Frank wajinga na lwitabilo lwakosa. Ponkapotu watendekele kusapwila, wayukile’mba Yehoba ye usakumukwasha kuyuka mwa kwingijila mwingilo.—Mat. 6:33.

Mulungu wapeleleko kwingijila mu Medan, Frank wasambakene mwanamulume mwina Netherlands wawama muchima wamwichileko’mba batomene pamo kofi. Frank wabuujile uno mwanamulume amba ubena kukeba motoka wakumukwasha kusapwila mambo awama mu jikuji jonse. Uno mwanamulume wamumwesheshe motoka wanji wafwa wajinga mu bujimi ne kumwambila’mba, “Inge wakonsha kumulungisha, usakumpatu 100 guilders.” *

Frank wakumbwile’mba, “Kechi nji na 100 guilders ne.”

Uno mwanamulume watajile Frank. Wamushikishe’mba, “Nanchi kine ubena kukeba kusapwila mu muzhi yense wa Sumatra nyi?”

Frank wakumbwile’mba, “Ee.”

Uno mwanamulume mwina Netherlands wamwambijile’mba, “Inge wakonsha kumulungisha, senda. Inge ukamone mali ukampa.”

 Frank watendekele kulungisha uno motoka, kabiji watendekele kwenda. Waambile’mba, “Nabikile petulo mu motoka, nayuzhizhemo mabuku kabiji na mambo a kwikala na luketekelo, naimene kuya na kusapwila bantu ba ku Sumatra.”

Byo papichile mwaka umo, Frank wabwelele ku Jakarta byo apwishishe kusapwila pa jikuji jonse. Byo afikile kokwa, wapoteshe motoka wanji 100 guilders ne kutuma ano mali ku mwanamulume mwina Netherlands ku Medan.

Byo papichiletu milungu icheche, Frank watambwijile nkalata kufuma ku Australia ya kumutuma kuya na kwingila bupainiya ku kyalo kingi. Ponkapotu walongele kyola kyanji ne kuya na kwingijila ku Indochina (aluno ke Cambodia, Laos, ne Vietnam).