UMVWE mwatanga pepala wa byambo uji yense, mwateleka ku televizhonyi nangwa ku waileshi musakutana amba kujitu mashimikila abena kwamba pa bumbanzhi, nkondo, ne malwañano onka onkatu. Akilangulukai pa makatazho enu. Kampepo bikola nangwa lufu lwa mutemwe wenu lubena kwimulengela kwikala na bijikila. Mwakonsha kwiumvwa byonka biumvwine Yoba muntu wawama, waambile’mba ‘wajinga mu lumanamo.’—Yoba 10:15, The Holy Bible in the Language of Today.

Ishikishai anwe bene amba:

• Nanchi Lesa wakebelenga’mba amiwa ne bantu bonse twikalenga bibye nyi?

• Kwepi ko nakonsha kutana bukwasho bwa mwakubila na makatazho ami?

• Abya kujipo luketekelo luji lonse lwa kuba’mba tukekala mutende panopantanda nyi?

Baibolo wakumbula mikumbu ya lusekelo ku ano mepuzho.

“Aye ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne.”—Lumwekesho 21:4

“Walemana kulu ukakilauka nobe lupala.”—Isaya 35:6

“Meso a bampofu akalaba.”—Isaya 35:5

 ‘Bonse baji mu bilende bya kivuluko . . . bakafumamo.’—Yoano 5:28, 29

“Kafwako nangwa umo wikala mu yewa muzhi ukamba’mba: Nakolwa, ne.”—Isaya 33:24

“Kukekalanga kuvula bingi kwa kajo panopantanda.”—Masalamo 72:16

Kange mufikenetu kukana byaambiwa pa mapeja afumako’mba byatutu ne. Lesa walaya kuleta bino bintu, kabiji Baibolo walondolola ne byo akebifikizha.

Baibolo ukwasha bingi mu mashinda avula. Wimupa jishinda ja kutainamo bwikalo bwa lusekelo lwa kine kine nangwatu luno lonka. Akitulumanaiko pacheche ne kulanguluka pa bijikila ne makatazho enu. Makatazho enu akonsha kuvwangamo kubulwa mali, makatazho a kisemi, kubelabela, nangwa lufu lwa mutemwe. Baibolo wakonsha kwimukwasha kuyuka mwa kubila na makatazho ano moba, kabiji wakonsha kuleta lutekenesho kupichila mu kukumbula mepuzho nabiji ano a kuba’mba:

• Mambo ka o tuyanjila?

• Twakonsha kuba byepi na bijikila bya mu bwikalo?

• Twakonsha kulengela byepi bwikalo bwa kisemi kyetu kwikala bwa lusekelo?

• Ki ka kyubiwa kwi atweba inge twafwa?

• Nanchi batemwe betu bafwa tukebamona jibiji nyi?

• Twakonsha kushiinwa byepi amba Lesa ukafikizha milaye yanji mu kimye kya kulutwe?

 Byo mubena kutanga uno buku kibena kumwesha’mba mukeba kuyuka Baibolo byo afunjisha. Uno buku usa kwimukwasha. Musakutana’mba mapalagalafu aji na mepuzho kunshi ya peja. Bantu bavula batana bingi lusekelo kwingijisha mepuzho ne mikumbu kimye kyo babena kwisamba Baibolo na Bakamonyi ba kwa Yehoba. Twaketekela kuba’mba nenuwa musakutanamo lusekelo. Mwane Lesa emupeshe byo musa kutainamo lusekelo lwa kufunda Baibolo kine byo afunjisha!