KUTENDEKA mu 2014, TV wa pa Intaneti utelwa’mba JW Broadcasting ubena kukosesha ne kutundaika bantu bavula bingi mwaya ntanda. Luno uno TV wa pa Intaneti uji mu milaka kukila pa 90. Mitanchi ibena kutuntululwa mu milaka nabiji Ewe, Ga, ne Twi (byonka byo bamwesha pa kipikichala), kino kyalengela basapwishi kukila pa 130,000 mu Benin, Côte d’Ivoire, Ghana, ne Togo kumwenamo. *

Muka kalama wa mwanzo umo ku Ghana aye Agatha waambile’mba: “Umvwe mbena kuteleka ku majashi a ba mu Jibumba Jitangijila ne bankwasho babo saka nji mu nzubo yetu, mmonatu nobe mbena kuteleka kwi Yehoba. Kwa  kubula luno lunengezho, inge kechi ntelekapo ku ano majashi ne. Kyandengela kukwatankana pamo na balongo ne banyenga kuzhokoloka ntanda yonse.”

Mu Zambia mwafumine sawakya wa kuba’mba: “Nangwa kya kuba bavula bayanji, bino basapwishi mu bipwilo byavula bibena kwibikako kutamba TV wa JW. Kipwilo kya Misako kyaikela palepa makilomita kukila pa 30 kufuma mu muzhi mukatampe ko bajima bingi bijimwa kabiji kunoka bingi mvula.” Nkwasho mu kipwilo wa jizhina ja Simon wayile na kwingijila ku kino kipwilo kwakepa basapwishi waambile’mba: “Pa ñondo pa ñondo musapwishi umo wenda panshi maola abiji kuya ku mukwakwa mukatampe na kukanjila motoka kuya mu muzhi mukatampe na kukopolola mavidyo a pa TV wa JW. Shetu umo uji na myaka ya kusemwa 70 pamo na baana banji babalume babiji kechi bakitaainwepo kala ku kupwila kwa Bakamonyi ba kwa Yehoba ne, bino uno shetu waumvwine bingi bulongo byo bamubuujile’mba basakutambisha mavidyo pa kupwila. Uno shetu waambile’mba, ‘Jino jo jishinda ja kufunjilamo byavula pe Lesa.’”

Nkalata ya kusanta yafumine ku Russia yaambile’mba: “Twapwisha ne mwaka umo na kutamba TV wa JW kabiji tubena kusanta bingi pa luno lunengezho. Kimye kyo twatambiletu vidyo mutanshi, twamwene’mba twakwatankana bingi na balongo betu mwaya ntanda. Kyajinga kya kukumya! Twamona’mba tuji mu kisemi kimo kikatampe. Twasangalele bingi pa kumona balongo betu baji mu Jibumba Jitangijila. Betupa kajo ka ku mupashi pa kimye kyafwainwa, kabiji atweba bonse twibamona. Kechi tushalapo pa mitanchi yonse ya pa TV ne. Kino kitulengela kumvwa bingi bulongo kutelwa’mba Bakamonyi ba kwa Yehoba. Tubena kwimusanchila bingi anweba balongo betu. Tubena  kusanchila Yehoba ne Kilishitu pa mingilo yabo yawama. Kutamba TV wa JW kwitukosesha ne kwitutundaika.”

Ba mulume ne mukazhi ba ku Germany bakolwa kolwa abo ba Horst ne ba Helga, banembele’mba: “TV wa JW wawama bingi. Bintu byapitamo balongo ne banyenga balemana byo bashimikizha bitukosesha bingi. Betutundaika kwingila papelela bulume bwetu nangwa kya kuba tubena kupita mu makatazho. Kumona mulongo wakolelwe kalepu byo abena kwingila bukulumpe mu kipwilo kwitufunjisha kuba’mba muntu yense wakonsha kwingijila Yehoba. Inge twamona balongo ne banyenga baji na ano makatazho, tumusanchila bingi Yehoba ne kulomba kuba’mba atwajijile na kwibapesha.”

Mulongo Kodi wa ku England, waambile’mba: “Mbena kwimusanchila bingi pa kimye kyenu ne ngovu yo mwingijisha pa kunengezha jw.org, TV wa JW, ne mavidyo a kwa Kaleba ne Sofiya. Nasanta bingi pa kunkwasha kumvwisha Baibolo. Nabatizhiwe saka nji na myaka itanu na isatu. Inge nkakomeko, nkepana kwingilako mwingilo wa kushimika Mazubo a Bufumu. Kabiji nkeba nkengijilenga pa Betele. Luno nji na myaka itanu na ina, onkao mambo, katatakatu nkome ne kufikilamo kwingila mingilo.”

Arabella wa ku England uji na myaka itanu na isatu wanembele’mba: “Nasanta bingi pa mavidyo ne mafunjisho a baana. Binkwasha kuyuka bulongo Yehoba. Mafunjisho ataanwa pa jw.org ankwasha kufunda byavula pe Yehoba mu jishinda jibula kulenga mukose. Mulenga nyimbo yawama ya kuba bonsetu beivuluka. Kabiji mavidyo a Kaleba ne Sofiya nao ankwasha bingi. Nemusanchila bingi pa byo mwingila na ngovu.”