Ba Ismael bekala mu Mexico, bafuukwilepo kutanga Baibolo yense. Mu mwakatu umo batangile Baibolo yense bimye bibiji, bino palutwe kacheche bapofwile meso. Pa kupitapo myaka, Kamonyi wa kwa Yehoba aye Ángel wamonañene ne ba Ismael ne kwisamba nabo pa milaye yawama ya Lesa. Ba Ismael bakebelenga bingi kufunda bukine,  pano bino babuujile ba Ángel amba, “Nemputa, konsha natanga Baibolo ne.”

Ba Ángel babuujile ba Ismael amba, “Kwakamwa ne, Nsakwimufunjisha kutanga mabuku a bampofu.”

Ba Ismael baipwizhe’mba: “Mwayuka kutanga mabuku a bampofu nyi?”

Ba Ángel bakumbwile’mba: “Ine, tusakufunjilanga pamo.” Ba Ismael bakuminye bingi pa kumvwa’mba ba Ángel basakufunda uno mulaka na mambotu a abo. Ba Ángel bayile ku nzubo yabo na kulenga bisopelo bya kutanga kwingijisha maboko pa pepala. Byo bamonañene jikwabo, ba Ángel batendekele kufunjisha ba Ismael bya kutanga bisopelo bya bampofu. Mu kimye kichechetu ba Ismael bayukile kutanga bino bisopelo, batendekele kupwila kabiji batendekele kutanga mabuku etu a bampofu. Luno ba Ángel baji na bantu bana bampofu bo bafunjisha Baibolo. Batemwa bingi kwamba pa Paladisa, kimye kyo bakatendeka kumona jibiji.

Nyenga Viannei uji na myaka 14 wikala mu United States, wanembele’mba: “Kimye kyo twafunjilenga pa bya bwikalo bwa bantu, bafunjishi betu batendekele kwamba pa bya bupopweshi. Betwambijile kutongolapo bupopweshi bo twayuka, amiwa natongwele Bakamonyi ba kwa Yehoba. Bakwetu baana ba sukulu bansekele bingi ne kwamba’mba twibatayila kimye, kechi tuji na bya kuba ne, kabiji bataya ne mabuku etu. Ne bafunjishi nabo baambile byatama pe atweba.

 “Kepo nalombele kwi Yehoba amba ampe bulume bwa kwibasapwila. Nebabuujile’mba tuya ku mazubo abo mambo Yehoba witutuma kuba’mba twibasapwile byambo byawama bya mu Baibolo, kechi kuya na kwibatayila kimye kyabo ne. Kabiji nebambijile’mba kange batayenga mabuku etu ne, mambo akonsha kwibakwasha mu bwikalo ne kwibapulusha. Bafunjishi betu balombelo lulekelo lwa mambo, ne kwamba’mba inge Kamonyi akaye pa nzubo  yabo bakamutambwila, kuteleka ne kuswa kutanga mabuku etu. Nalangulukilenga’mba kechi bakoba byo baambile ne.

“Byo papichile bañondo bana, nakuminye bingi pa kwibataana babena kufunda Baibolo. Kabiji byo papichile banondo batanu na umo, bano bafunjishi bandondejile pa sukulu kuba’mba bansanchile pa kwibasapwila. Kechi nebayukile ne, mambo batendele nsuki ne myevu. Luno ke basapwishi babula kubatizhiwa.”

Mwaka wapwa, bantu ba Yehoba mu kyalo kya Brazil, bayile na kusapwila mu kibunji kikatampe kya Amazon. Bantu bavula mu kino kibunji kechi baumvwinepo kala mambo awama ne. Na mambo a kino, Jibumba Jitangijila janengezhezhe mukwekele wa kuya na kusapwila pa mwaka umo ku bantu bavula bingi bekala mu mapunzha a kwalepa mu kibunji kya Amazon.

Ofweshi wa musampi wasajile mizhi 53 yaikela ku mikola ya mu Amazon kuba’mba basapwishi ba Bufumu bakayeko na kusapwila. Mu bañondo bana, basapwishi kukila pa 6,500 bepaine kuya na kwingijila ku ino mizhi.

Mu muzhi wa Anamã mwabujile basapwishi ba Bufumu, balongo ne banyenga jikumi baikelemo moba 11, bapele bantu mabuku kukila pa 12,500, kabiji bantu 200 batendekele kufunda Baibolo, ne luno bakibafunjisha kwingijisha mafoni. Bano balongo kimye kyo bajinga kokwa, banengezhezhe ne kupwila. Basangalele bingi pa kumona bantu 90 baishile na kupwila pa kupwila kwapeleleko saka bakyangye kufumako. Twaketekela’mba mu uno mukwekele mukafuma byawama bingi.

Jehizel ne Mariana bafunjilanga pamo sukulu pa myaka itanu na umo mu kyalo kya Venezuela. Mariana waendelekanga bingi Jehizel mambo a kuba’mba wajinga Kamonyi wa kwa Yehoba. Mariana walangulukanga’mba Jehizel kechi wayukile bya kwiyowa bwikalo ne. Juba jimo byo apwishishetu kumwendeleka, Jehizel wamwambijile’mba: “Mariana, wingijishe keyala wetu wa intaneti wa jw.org. Uye po banemba’mba ‘Mavidyo a Bwina Kilishitu,’  apa bino uchinte pa kakitenguluzha ka kuba’mba ‘Banyike.’”

Pa jonkaja juba mabanga, Mariana watumijile Jehizel foni ne kumubuula’mba: “Pano nayuka kikulengela kuba byapusanako na bakwenu.”

Na mambo a kuba Jehizel kechi wayukile mo atazhizhe ne, wamwipwizhe’mba, “Watendeka kuñendeleka jikwabo nyi?”

Mariana waambile’mba: “Ine, kechi nkakwendelekapo jibiji ne. Nasanta bingi, pano nayuka kuba’mba byo namonanga’mba ‘ko kwiyowa bwikalo’ byo byandetelenga makatazho.” Mariana watendekele kufunda Baibolo, kabiji luno upwila kimye kyonse.

Ba Gérole baingilanga nkito ya bunembeshi pa chechi wabo mu kyalo kya Haiti, bino bakuminye bingi kumona Bakamonyi byo bakumbwile mepuzho abo onse na Baibolo. Abo ne mwanabo wamukazhi batendekele kufunda Baibolo. Bintu byo bafunjilenga bibafikile bingi pa muchima kya kuba balombele kuba’mba bafundenga jibiji mu mulungu.

Byo papichile bañondo basatu, ba Gérole bayile ku bapashita ba mu chechi mwabo ne kwibepuzha mepuzho ana, kuba’mba: “Mu ñanyi mwaka Yesu mo aikele mfumu? Bantu boba byawama baya kwepi inge bafwa? Bantu boba byatama baya kwepi inge bafwa? Nanchi Yesu bamwipayijile pa kichi nyi, inyi pa musalaba?” Pashita waambile’mba wakonsheshe kukumbulakotu bwipuzho bwa bubiji ne bwa busatu. Wakumbwile’mba: “Bakamonyi ba kwa Yehoba bamba’mba bantu 144,000 bo bonkatu bakaya mwiulu. Pano amiwa nayuka kuba’mba bonse boba kyaswa muchima wa Lesa bakaya mwiulu. Bino bantu boba byatama bakapya mu mujilo wa helo myaka ne myaka.” Ba Gérole byo baipwizhe ba pashita amba batongole Binembelo byaamba byobyo, ba pashita bakankelwe. Ba Gérole kibafichile ku muchima, kabiji kibalengejile ne kufuukulapo kutwajijila kufunda Baibolo na Bakamonyi. Banembele nkalata ya kubuulañana’mba bafumamo mu chechi, kabiji balumbulwile’mba mu bañondo basatutu, bafunda bintu byavula ku Bakamonyi kukila byonse byo bafunjile pa myaka 30 yo bayanga mu chechi. Ba Gérole ne mwanabo wamukazhi babatizhiwe katataka papo, kabiji luno baji na bantu 23 bo babena kufunjisha Baibolo.