Mu kyalo kya Georgia, mwanamulume wayile po batanchikile mabuku ne kupatauka amba: “Kechi nsakwimuswisha kusapwila pa ino mpunzha ne! Kino kyalo kya Georgia kya bena Kilishitu baya mu chechi wa Orthodox.” Mulongo waikele pepi na kya kutanchikapo mabuku waipwizhe uno mwanamulume na jiwi jakooka inge kya kuba watangilepo kala mabuku etu. Wakumbwile’mba, “Ine, nkyangye.” Mulongo wamutundaikile mu jishinda jawama kutangapo  buku umo. Kwisamba nanji mu jino jishinda kwamulengejile kufwomona bukaji, kabiji watolelepo mabuku amo. Byo papichile moba, uno mwanamulume wabwelele ne kulomba lulekelo lwa mambo pa byo aubile. Waambile’mba watangijile bainanji bampofu magazini wetu. Bonse aye ne bainanji batemenwe byambo byo batangile kabiji bakebelenga kutambulako wa katataka. Lelo jino, wiya kimye kyonse po tutanchika mabuku na kutambula magazini a katataka.

Balongo babiji mu kyalo kya Azerbaijan, byo ayilenga na kusapwila, bataaine nsongwalume waimene kulutwe ya kishimikwa kabiji batatwile kumusapwila. Uno nsongwalume wakumbwile’mba, “Kechi nakonsha kuteleka ku byo mubena kwamba ne, mambo ke bundengamambo.” Kepo atolele mupenyi wajinga mu fwangalito wanji ne kwamba’mba, “Bantu banguba bingi nshiji, kabiji mbena kuya na kwingijisha uno mupenyi kushinkanya nabo.”

Balongo bakankamenetu, bino baambile’mba, “Kwipayañana bundengamambo.”

Uno nsongwalume waambile’mba, “Pano ngube byepi?” Bamutangijile kinembelo kya Loma 12:17-21 ne kumulumbulwila’mba Lesa ye uji na luusa lwa kushinkanya ne kuba’mba atweba kechi twafwainwa kuleka ‘bubi bwitushindenga ne, bino tushindenga bubi na byawama.’ Bamukwashishe kuyuka buneme bwa kwikala na muchima wakooka ne kuba’mba inge wakozha nangwa kwipaya muntu, jiwi janji ja mu muchima jikamukatazhanga. Uno mwanamulume waumvwine bingi bulongo byo bamukwashishe, kabiji wayile.

Byo papichiletu kimye kicheche, uno mwanamulume wataaine balongo jibiji ne kwibambila’mba: “Nafuma na kumona muntu ye najikukebanga kwipaya. Kechi najikumukozha  ne, bino twisambatu bulongo ne kupwisha lukatazho mu jishinda jawama. Nemusanchila bingi mambo mwankwasha kubula kwibika mu lukatazho.” Balongo bamulumbulwijile kuba’mba Yehoba ye wamukwashishe.

Myaka ya kunyumakwe, nyenga wa ku Norway wafumine mu bukine. Byo twatendekele kwingijisha bya kutanchikapo mabuku pa kusapwila, javula pa kuya na kupota bintu wapichilanga ponka po batanchikanga mabuku.

Nangwa kya kuba kechi wasolomokele Bakamonyi bajinga po batanchika mabuku ne, wamwene kipikichala kyo balamikilepo ne byamwekelenga bulongo kyo batanchikilepo mabuku. Abino byonse, kubikapo ne mwekelo yawama ya Bakamonyi byamulengejile kukeba kubwela kwi Yehoba ne jibumba janji.

Kabiji wamwene ne byambo bya kuba’mba jw.org, onkao mambo, wafuukwilepo kuya pa uno keyala wetu. Waumvwine bingi bulongo byo kyapela kutaana mpunzha kwaikela Nzubo ya Bufumu iji pepi ne bimye bya kupwila. Wakopolwele mabuku kabiji wayile ku kipwilo kya kwikanjikizhatu. Bamutambwijile bingi bulongo, kabiji bakulumpe mu kipwilo bakebele nyenga kuba’mba amufunjishenga Baibolo. Kechi pabanjile ne, waikele na balunda bavula mu kipwilo kabiji wakoseshe bulunda bwanji na Lesa jibiji. Luno ukumbulapo pa kupwila kimye kyonse ne kuya na kusapwila, kabiji uji bingi na lusekelo mambo ubena kwiyowa bulunda bwawama na Yehoba.

Ronja uji na myaka 15 wikala ku Norway, juba jimo wisambilenga na bakwabo mo bafunjila saka baji mu sakya pa lufunjisho lwa kuba’mba bilengwa byaishilekotu bine. Bansongwalume  kechi banemekele byo aitabilamo ne, kabiji bamulengejile kumvwa bingi bumvu. Na mambo a kuba’mba walangulukile’mba kechi winengezhezhe bulongo kwisamba na bakwabo pa uno mutwe ne, wayile na kwipuzha bainanji kuba’mba bamubuuleko bishiino bimo bimwesha’mba kuji Mulenga.

Juba jalondejilepo saka baji mu sakya, Ronja pa kwisamba na bakwabo waingijishe bishinka byo anengezhezhe. Pano bino, bansongwalume baendelekele bingi lwitabilo lwanji mwi Yehoba. Umo wabijikile’mba: “Mu uno sakya kafwamo nangwa umo waitabila mwi Yehoba ne! Bañanyi baitabila kuba’mba bilengwa byaishilekotu bine, kabiji bañanyi baitabila mwi Yehoba? Suntulai maboko.” Ronja wakuminye bingi pa kumona mwanyike wamulume waikele kwipi na ko ajinga wasuntula kuboko ne kwamba’mba, “Amiwa naitabila mwi Yehoba!” Mwanyike mukwabo naye waamba’mba, “Ne amiwa naitabila mwi Yehoba!” Kabiji mwanyike mukwabo naye waamba byonkabyo. Baana ba sukulu bakwabo baumvwine  byambo byaambile Ronja kimye kyo esambilenga na bakwabo mo bafunjilanga, kabiji bamo bashiinwe kuba’mba waambilenga bya kine.

Juba jimo mute, banabalume bamba mulaka wa ki Arabic bafumine ku Silya bayile pa ofweshi wa musampi wa mu Denmark. Babuujile banyenga batambwila benyi kuba’mba bakebelenga Bakamonyi ba kwa Yehoba. Byo bebabuujile ku banyenga kuba’mba Bakamonyi, bano banabalume baumvwine bingi bulongo. Pano nga keyala bamutaaine pi? Bamwesheshe ba mingilo mu kishimikwa mo balamina mabuku kipikichala kyo bakopele pa foni. Kino kipikichala kyajinga kya jipa jitanshi mu buku wa Nanchi Baibolo Kine Ufunjisha’mba Ka? wa mu mulaka wa ki Arabic panembwa makeyala. Ba mingilo mu kishimikwa mo balamina mabuku bebabuujile kwaikela ofweshi wa musampi.

Bano banabalume babiji kibakatezhe bingi kwisamba na banyenga mu mulaka wa ki Danish. Onkao mambo, baichile mulongo waamba ki Arabic kuba’mba eye esambe nabo. Kyamwekeshetu patoka’mba umo pa bano banabalume wakebelenga kufunda byavula bya mu Baibolo. Mulongo wamwipwizhe ko ekala kabiji wamulayile kuya na kumufwakesha pamo na mulongo mukwabo wamba mulaka wa ki Arabic.

Kimye kyo bamufwakashijile pa nzubo yanji, wabuujile balongo kuba’mba kyo kimye kitanshi Bakamonyi ba kwa Yehoba kwiya pa nzubo yanji. Kabiji wibabuujile’mba wataaine buku mu kabokoshi mufikila makalata, nangwa kya kuba kechi pajingapo jizhina ja kumwesha’mba mwina kano kabokoshi wamba mulaka wa ki Arabic ne. Na mambo a kuba’mba kechi utanga ne, waambijile mulunda nanji kumutangilako kabiji bapwishishe kutanga uno buku pa moba asatu. Byo aumvwine byamulengejile kushiinwa’mba wataana bukine.

 Waikalanga bingi na bijikila na mambo a kuba’mba wajinga kipuluka kabiji kisemi kyanji kyashajile kwalepa. Onkao mambo, byambo bya mu Baibolo bimutekenesha bingi. Kimye kitanshi balongo kyo bamufwakashijile washikishe’mba: “Mambo ka o mwabujilanga kwiya na kumfwakesha? Nkebesha bingi kufunda bya mu Baibolo.” Balongo batwajijila kumufunjisha kabiji watemwa bingi bintu byo afunda.

Dmitry wajinga mukulumpe wa mingilo pa kampanyi ulenga fwanka mu Ukraine, kabiji wafolanga mali avula bingi. Bino byo afunjile’mba fwanka onauna buntuntulu bwa mubiji wa muntu, walekele ino nkito. Kabiji mu bañondo basatu, bainanji ne bako banji babakazhi bafwile. Wajinga bingi na bulanda pa kufwisha bano bantu bo atemenwe bingi. Waketekejile’mba bantangi ba mu chechi ye ayangamo basakumutekesha ne kukumbula mepuzho o ajinga nao, bino kafwako kyafuminemo ne. Mulunda nanji wamubuujile’mba kupwila mu chechi wa Orthodox ke “kuvwalatu musalaba mu nshingo bino kafwako bukwasho ne.” Dmitry byo byo aumvwinenga mu muchima. Wamwene kuba’mba kafwako kyo ayukilepo pe Lesa nangwa pa Baibolo ne. Na mambo a bulanda, watatwile kulomba bukwabo. Kepo avulukile’mba kuji ne Bakamonyi ba kwa Yehoba. Wataaine keyala wetu wa pa Intaneti kabiji waumvwine bingi bulongo pa byambo bya mu Baibolo bijipo. Kabiji wayile na kukeba Nzubo ya Bufumu iji kwipi na ko ekala. Byo afikile pa Nzubo ya Bufumu, asha wamutambwijile ne kumwipuzha kyo aendejile. Dmitry wakumbwile’mba, “Mbena kukeba kufunda Baibolo.” Papita ne bañondo batanu na umo kufuma kimye kyo atendekele kufunda Baibolo kabiji uya na kupwila ne kukumbulapo.

Ba Paul ne ba Faith, bekala mu Britain, besambile bingi bulongo na mwanamukazhi aye Susan, kabiji bamulayile  kubwelako jibiji. Byo bamweleleko kechi bamutainepo pa nzubo ne. Ba Paul ne Faith balondejile lutangijilo lwajinga mu Mwingilo Wetu wa Bufumu wa November 2014, lwaambile pa kunemba makalata, kabiji banembejile nkalata ba Susan ne kwibabuula’mba bakabwelako juba jalondejilepo. Byo babweleleko, bataaine ba Susan bebanembela nkalata ne kwiikobeka ku kinzhilo. Mu ino nkalata banembelemo’mba, bayile na kupota bintu bya masongola a mwanabo wamukazhi. Ba Paul ne ba Faith nabo bebashijile nkalata kuba’mba bakeya na kwibamona mulungu walondejilepo. Pa kikye kimye, ba Susan bebapembelejilenga, kabiji byo baishile batendekele kufunda nabo mu buku wa Baibolo Ufunjisha.

Na mambo a kuba’mba ba Susan banengezhezhenga masongola a mwanabo, baambijile ba Paul ne ba Faith amba bakabule kwiya na kwibamona pa juba jo baumvwañene. Ba Paul ne Faith byo babweleleko jikwabo kechi bebatainepo ne, onkao mambo bashile kakalata po banembele ne nambala wa foni wabo. Baumvwine bingi bulongo byo batambwijile tubyambo  pa foni twafumine kwi ba Susan twa kulomba lulekelo lwa mambo pa kubula kwibataanapo amba besambilenga na mulunda nabo mu mashamba. Kufumatu kyokya kimye, ba Susan batwajijila na kufunda Baibolo, kabiji katatakatu papo bayile na kupwila.

Ba Paul ne ba Faith batwajijila kushila bantu tumakalata inge babula kwibatanapo pa mazubo. Baambile’mba: “Bantu bavula bo tubula kutaana pa mazubo batanga tumakalata to twibashila. Jino ke jishinda jawama bingi!”

Mu August 2014, mulongo bamubikile mu mwanya mu kipatela kya mu kyalo kya Hungary wabelele kikola kilengela mikota ya mashi kushinka. Kyataminekotu, uno mulongo wafwile. Bakazhi ba uno mulongo banembele pe Tünde, manase wa kwashishe bamwatawabo amba:

“Mu 2015, amiwa ne mwanami wamulume twataainwe ku Kushonkena kwa Kijiiji kwa kuba’mba, ‘Londelainga Yesu!’ Byo twapwishishe kushonkena, twaimene po bemikila myotoka kabiji mwanamukazhi waimene kulutwe yetu wataile byola byanji panshi ne kwiya na kunkumbachilamo watendeka ne kujila na mambo a lusekelo. Uno mwanamukazhi wajinga manase walamine bulongo bamwatawami mu kipatela saka papita ne mwaka umo. Uno manase witubuujile byo bengila mu kipatela amba, pa juba pa juba manase yense bamupa mwingilo wa kumonanga muntu umo wabela. Witubujile’mba walombelenga’mba mbene kukeba juba jimo bakampe mwingilo wa kulama benakwenu. Kino kyo kyamwekele.

“Tünde waambile’mba byubilo byawama bya bamwatawami ne lwitabilo lwabo lwakosa byo byamutundaikile kutendeka kufunda Baibolo na Bakamonyi ba kwa Yehoba.

“Tünde, luno ubena kufunda Baibolo, kabiji ubena kupembelela kimye kyo akatambwila bamwatawami byo  bakasangulwa. Ubena kukebesha kukebabuula’mba byubilo byabo byawama ne lwitabilo lwabo lwakosa byo byamulengejile kuyuka Yehoba ne kuketekela mu milaye yanji.”

Na mambo a milukuchi, bimye bimo bashinkanga pa mipaka imo ya kutwela mu kyalo kya Greece ne Bulgaria, kabiji kino kilengela minongo ya myotoka ibena kupembelela kutwela mu bino byalo kulepa bingi. Basapwishi baji mu kipwilo kya mu Bulgaria kiji ku bwipi na ino mpunzha, bayile na kusapwila ku bendesha ino myotoka ne kwibapa mabuku etu alumbulula Baibolo. Balongo basendele mabuku mu milaka 12. Badalaivwa ba ino myotoka bavula bakookele ne kulefulwa, bino baswile kwisamba nabo. Balongo batelekele byo bebabuujilenga saka batekanya, ne kwibatundaika. Dalaivwa umo waipwizhe’mba, “Nanchi mwi Bakamonyi ba kwa Yehoba nyi?” Balongo byo bamukumbwile’mba ee, wambile’mba, “Naji kuyukatu, mambo Bakamonyi ba kwa Yehoba bo bonkatu bakonsha kusapwila bibye.” Dalaivwa umo wa ku Austria waambile na lusekelo’mba: “Kyawama pa kutaana’mba ne kuno kuji Bakamonyi ba kwa Yehoba! Anweba bantu mutwajijile na kukwasha bantu ne kwibabuula bintu byawama biji kulutwe.” Mukwabo naye waambile’mba: “Kala kechi nakebanga kutanga mabuku enu ne. Pano bino, luno nsakutanganga mabuku enu.” Mukwabo watendekele kujila byo bamusapwijile ku mulongo. Waambile’mba wajinga Kamonyi kala. Balongo bamutundaikile’mba kechi wafwainwa kupelelatu pa kutanga mabuku ne, bino wafwainwa ne kutendeka kupwila.