Olivia wikala mu Australia byo atendekeletu sukulu saka aji mwanyike, waichile bafunjishi banji amba bakeye ku Kivuluko. Pa myaka itanu na isatu yalondejilepo, Olivia watwajijile kwibeta pa mwaka pa mwaka. Kepo mu 2016, bafunjishi banji bamutumijile foni ne kumwambila’mba bakeba kutaanwako ku Kivuluko. Baambile’mba bamusanchila bingi Olivia pa kubula  kukooka kwibetako. Kabiji baishile ku Kivuluko pamo na bamwatawabo. Na mambo kuba baingilanga pa ofweshi wa kafulumende, bavulukile mwaka Bakamonyi ye bashimikilenga Nzubo ya Bufumu mu yewa muzhi. Babuujile balongo amba batemenwe bingi kumona balongo byo bakwatankene bingi pa kushimika Nzubo ya Bufumu. Bafunjishi ba kwa Olivia ne bamwatawabo basangalele bingi pa kutaanwa ku kuno kupwila kya kuba bo bapeleleko kufuma pa Nzubo ya Bufumu.

Ba Jacintu ne bakazhi babo bekala pa jikuji ja Timor-Leste. Na mambo a kuba’mba bajinga Bakatolika ba mukoyo, kibakankamikile bingi byo bamwene mwana bakolojabo waikala Kamonyi wa kwa Yehoba ne kuleka kupwila pamo na kisemi. Ba Jacintu batangile buku wa Nanchi Baibolo Kine Ufunjisha’mba Ka? pa kuba’mba bataanemo kya kushiina mwana bakolojabo amba waya mungi. Bakebelenga kutaanamo mafunjisho a bubela. Byo bapwishishe, babuujile benakwabo amba: “Awe buku namutanga yense. Bino nataanamotu byawama.”

Bakazhi babo bebakumbwile’mba: “Kampe mwaji kupitamotu lubilo. Mutangai bulongo jibiji, bino luno mumutange pachepache.”

Onkao mambo, ba Jacintu batangilemo jibiji, kabiji babuujile bakazhi babo amba: “Byonse byo natanga byawama. Kabiji byafuma mu Baibolo. Ne buku byo akanya kupopwela mipashi ya bafu byafuma mu Baibolo.”

Bakazhi babo baambile’mba: “Tangaimo ne jikwabo, bino luno mushilenga pa mafuka onse o mwatanga. Mumutangetu bulongo, musakutaanamo bya bubela.”

 Ba Jacintu batangile buku jikwabo, ne kushila bulongo mafuka onse. Byo bamutangile ja busatu, baambile’mba: “Uno buku waamba bya kine. Mwanetu kechi waya mungi ne.” Luno, ba Jacintu babena kufunda Baibolo na Bakamonyi ba kwa Yehoba.

Nyenga Painiya wikala pa jikuji ja Guam, wayile na kufwakesha mwanamukazhi wafumine ku jikuji ja Pohnpei, kabiji wamutambishe vidyo wa kuba’mba Mambo ka a Kufunjila Baibolo? Wabuujile uno mwanamukazhi amba ukabwelako jibiji. Byo abweleko bimye byavula, kechi wamutaainepo uno mwanamukazhi ne. Juba jimo wataainepo mwananji wamukazhi, onkao mambo, nyenga wafuukwilepo kutambisha uno mwana vidyo umo pa mavidyo a kuba’mba Ikala Mulunda na Yehoba. Mwana waumvwine bingi bulongo kutamba uno vidyo. Kimye kikwabo nyenga kyo abweleleko, wataainepo bainanji yewa mwana, kabiji batelekele bingi ku  mambo awama a mu Baibolo. Kyalengejile ke na mambo a kuba’mba mwana wibabuujile’mba bafwainwa kuya ku chechi kufuma nyenga wamutambishe vidyo. Kino kyalengejile bainanji kukeba kuyukilapo byavula. Baswile kufunda Baibolo, kabiji nyenga wanengezhezhe muntu wa kwibafunjishanga.

Kalama wa mwanzo wa jizhina ja Terence ne mwinakwanji Stella bayile ku mpuzha ya Inakor, mu nyaunda yo babulanga kusapwilamo Bakamonyi, iji mu kyalo kya Papua New Guinea. Ba Terence bashimikizha’mba: “Pa juba jitanshitu saka twakilaala, twaumvwine bantu na kukonkonsha ku kinzhilo. Byo twalupukile, twataaine bantu bavula bingi  na kwitupembelela, onkao mambo twibasapwijile kufuma lukelo kufika mute. Twakookolokeleko pacheche ne kowa, bino byo twalupukile, twataaine bantu bavula babena kwitupembelela. Onkao mambo, twibasapwijile kufuma kimye kya 2 koloko kufika pakachi ka bufuku.” Juba jalondejilepo, ba Terence ne benakwabo babukiletu ku myaka pa kuba’mba baye na kufwakeshako nyaunda ikwabo. Bantu byo baishile pa nzubo po baikelenga, kechi bebataainepo ne. Ba Terence bashimikizha’mba: “Byo bataaine’mba tufwapo, betulondejile kabiji betutaaine ko twajinga. Ne jojo juba, twibasapwijile lukelo lonse. Byo twabwelele ku nzubo, twataaine bantu bakwabo na kwitupembelela. Ne moba alondejilepo, byo byo kyaikalanga. Bano bantu bajingatu ‘nobe mikooko yabula kafunga.’”—Mat. 9:36.

Painiya wa jizhina ja Agnès wikala pa jikuji ja New Caledonia, wavimbile kuboko, onkao mambo wayile na kumona dokotala. Dokotala byo abukilenga Agnès, wamubuujile’mba umona bantu bavula bingi na kuyanda kya kuba ulanguluka’mba kampe Lesa wakanama. Agnès walombele mu muchima ne kusanchila Yehoba pa kumupapo kimye kya kufunjisha muntu bukine. Kepo amwesheshe dokotala katalakiti ka kuba’mba Nanchi buyanji bukapwa nyi? ne kumutangila kinembelo kya Lumwekesho 21:3, 4.

Dokotala waambile’mba: “Akyo kinembelo kyo mwatanga nkyangye kwikimonapo mu Baibolo wami ne. Baibolo wami ujitu na mabuku a Mambo Awama.” Dokotala byo amwene kuba’mba Agnès ke Kamonyi wa kwa Yehoba, wamubuujile’mba wamonañenepo na Bakamonyi ba kwa Yehoba byo ajinga kwabo ku kyalo kya Chile.

Agnès wavulukile kuba’mba pa mutanchi wa JW Broadcasting pajinga sawakya waambilenga pa kyalo kya  Chile. Onkao mambo, byo abweleko jibiji, wasendele tabuleti wanji ne kutambisha dokotala vidyo wa yewo sawakya. Dokotala waumvwine bingi bulongo kumona Betele ne Nzubo ya Kubuñenamo biji mu Chile. Byo bapwishishe, Agnès waambile’mba, “Mbena kukeba ne kwimupako uno Baibolo mutuntulu, pa kuba’mba mutange kinembelo kya Lumwekesho 21:3, 4 kyo nemutangijile mulungu wapwa.” Pa kumona bino, dokotala wanyamukile mu kipona na lusekelo ne kupakachilamo Agnès ne kwamba’mba, “Nemusanchila bingi pa bino bya bupe bibiji byo mwampa.”

Kimye kikwabo kyo ayileko, Agnès watwajile buku wa Nanchi Baibolo Kine Ufunjisha’mba Ka? ne kulumbulula ene mambo o paikela buyanji pa ntanda. Dokotala waambile’mba katatakatu akaye na kufwakasha ku kyalo kyanji kya Chile, kabiji ukasenda uno buku pa kuba’mba akamutange bulongo.