Ba Rafael Pared bengijila pa Betele na bakazhi babo ba Francia baikele basapwishi mu 1957 byo bajinga na myaka ya kusemwa 18. Bavuluka kuba’mba bakapokola bengila  mu bufyamfya bebalondelanga inge baya mu mwingilo na kusapwila, kuba’mba bamonepo jishinda ja kwibakwachilamo. Ba Rafael baambile’mba: “Kimye kimo twapitanga mu tumikwakwa ne mu tulolo mubula kupita bantu javula, kabiji twakilukanga ne masakwa kuchina kwitukwata ku bakapokola.” Ba Andrea Almánzar balumbulwile abo ne bakwabo byo baubanga pa kuchina kwibakwata amba: “Twajimukile bingi. Mu mwingilo, inge twasapwila pa nzubo imo, twakilukanga mazubo jikumi, bino pa twakasapwila pa nzubo ikwabo.”

Mu 1959, bukalama bwa kwa Trujillo bwalamine myaka 30 bwatendekele kukoka. Pa 14 June mu 1959, bena Dominican bo bapangile mu kyalo baishile mu Dominican Republic na kulukuka Trujillo kuba’mba bamufumyepo pa bukalama. Nangwa kya kuba byo bakebelenga kechi byaingijile ne, aba bansatuki bamo bebepaile, bakwabo bebakashile. Bino balwanyi ba kwa Trujillo bavujijilengakotu, kabiji byo bamwene kuba’mba kafulumende wanji wakosa bingi, nabo bakizhizhemo ne kukizhamo kumulukuka.

Pa 25 January mu 1960, Chechi wa Katolika wamwalukijilemo ne ku munembele nkalata ya kukana kumanyika bantu nangwa kya kuba baumvwañananga na kafulumende wa kwa Trujillo pa myaka yavula. Shayuka wa mpito wa mu Domican aye Bernardo Vega walumbulwile’mba: “Kulukuka kwajingako mu June mu 1959 ne kumanyikwa kwa boba basatukile ne kumanyikwa kwa kabungwe ka mu kyalo kabulanga kumutundaika kwalengejile Chechi wa Katolika kumwalukamo Trujillo pa kimye kitanshi.”

Kyawamine bingi mu May mu 1960, kafulumende byo aswishishe Bakamonyi ba kwa Yehoba kutwajijila na mwingilo wabo wa kusapwila. Myaka ya kwibakanya yapwile, kimye Trujillo kyo ebakasulwile kwa kubula kuketekela, byo bamwalukilemo ku ba mu Chechi wa Katolika.