1. Lesa wakebelenga’mba bantu bakekalenga byepi?

LESA wakebelenga’mba bantu bakekalenga bulongo. Walengele mwanamulume ne mwanamukazhi mutanshi, Adama ne Evwa, kuba’mba bakekalenga mu bujimi bwawama. Lesa wakebelenga’mba bakaseme baana, bakabayishe paladisa kufika ne mwapela ntanda, ne kulama bulongo banyama.—Ntendekelo 1:28; 2:8, 9, 15; monai Byambo byo Balumbulula, 6.

2. (a) Twayuka byepi kuba’mba Lesa ukoba byo akebelenga? (b) Baibolo waamba’mba bantu bamutundu ka bakela myaka ne myaka?

² Nanchi mulanguluka’mba kine tukekalanga mu paladisa nyi? Yehoba witubula’mba: “Nkoba kintu kyonse kyo nkeba.” (Isaya 46:9-11; 55:11) Kintu kyonse Lesa kyo afuukula ukekyuba, kabiji kafwako kyakonsha kumulengela kukankalwa ne. Yehoba waamba’mba paji kyo alengejile ntanda. “Kechi wiilengele kwikala yatutu ne.” (Isaya 45:18) Wiilengele kuba’mba mukekalenga bantu. Bantu bamutundu ka Lesa bo akebelenga’mba bakekalenga pano pa ntanda, kabiji wakebelenga’mba bakekalengapo myaka inga? Baibolo waamba’mba: “Baoloka [nangwa’mba bakokela] bakaswana ntanda, kabiji bakekalangamo myaka ne myaka.”—Salamo 37:29; Lumwekesho 21:3, 4.

3. Kukolwa ne kufwa kulengela kwipuzha’mba ka?

³ Mu ano moba bantu bakolwa ne kufwa. Mu mapunzha avula balwa ne kwiipaya bene na bene. Lesa kechi byobyo akebelenga’mba bantu bakekalenga bino  ne. Pano ki ka kyalengela, kabiji mambo ka? Baibolo ye yenkatu wakonsha kulumbulula.

4, 5. (a) Ñanyi waambile kwi Evwa kwingijisha muloolo mu bujimi bwa Edena? (b) Muntu wajingatu bulongo kabiji wa kishinka wakonsha kwikala byepi ngivi?

⁴ Baibolo waamba’mba: “Diabola kabiji Satana,” ye mulwanyi wa Lesa. Satana waingijishe muloolo pa kwisamba ne Evwa mu bujimi bwa Edena. (Lumwekesho 12:9; Ntendekelo 3:1) Satana walengejile muloolo kumweka nobe ye waambilenga.—Monai Byambo byo Balumbulula, 7.

⁵ Nanchi Lesa ye walengele Satana Diabola nyi? Ine. Uno Malaika wajinga mwiulu kimye Lesa kyo alengelenga ino ntanda ne kubikamo Adama ne Evwa. Wialwile mwine ke Diabola. (Yoba 38:4, 7) Kyaikele byepi bino? Muntu ujitu bulongo kabiji wa kishinka wakonsha kwikala ngivi. Kechi usemwatu saka aji ngivi ne. Bino umvwe watendeka kukumbwa kintu nangwa kukebesha kintu kyabula kyanji, kabiji watwajijila na kulangulukapo pa kino kintu, uno mulanguluko watama wakonsha kumulengela kwiba inge pamweka kanya. Inge waiba ko kuba’ waikala ke ngivi.—Tangai Yakoba 1:13-15; monai Byambo byo Balumbulula, 8.

6. Malaika umo waikele byepi mulwanyi wa Lesa?

⁶ Bino byo byaubile ne uno malaika. Yehoba byo alengele Adama ne Evwa, wibambijile kusema baana ne ‘kuyuzha ntanda.’ (Ntendekelo 1:27, 28) Uno malaika kyamweka watendekele kulanguluka’mba: ‘Bantu bonse bakapopwelengatu Yehoba, amiwa ne?’ Watendekele kulangulukapo bingi pa kino, kabiji kino kyamulengejile kukeba munema wafwainwatu Yehoba kwapwa. Uno malaika wakebelenga bantu kutendeka kumupopwela. Kyo  kyamulengejile kubepa Evwa ne kumongola. (Tangai Ntendekelo 3:1-5.) Abino, byobyo aikele ke Satana Diabola, mulwanyi wa Lesa.

7. (a) Mambo ka Adama ne Evwa o bafwijile? (b) Mambo ka o tukotela ne kufwa?

⁷ Ba Adama ne Evwa basatukijile Lesa ne kuja kipangwa kyo bebakainye. (Ntendekelo 2:17; 3:6) Kyafuminemo, bafwile monka mwaambijile Yehoba amba bakafwa umvwe basatuka. (Ntendekelo 3:17-19) Baana ba kwa Adama ne Evwa nabo bafwile mambo baswaine bandengamambo. (Tangai Loma 5:12.) Langulukai pa kino, pa kuba’mba mumvwishe ene mambo baana ba kwa Adama ne Evwa o baikejile bandengamambo. Inge mubena kufyatula matafwali na kikombola kyakonkomana, ne matafwali o mukafyatulanga nao akakonkomana. Adama waikele ndengamambo byo asatukijile Lesa. Ne atweba bonse twibandengamambo, mambo twi baana banji. Kyokyo tukotela ne kufwa mambo twibandengamambo.—Loma 3:23; monai Byambo byo Balumbulula, 9.

8, 9. (a) Satana wakebelenga Adama ne Evwa kwitabila’mba ka? (b) Mambo ka Yehoba o abujile kwipaya bansatuki ponkapotu?

⁸ Satana watendekele bunsatuki byo alengejile ba Adama ne Evwa kusatukila Yehoba. Wakebelenga ba Adama ne Evwa kwitabila’mba, Yehoba uji na bubela kabiji kalama watama ubula kukeba bantu kwikala bulongo. Satana waambilenga’mba, Lesa kechi wafwainwa kwibatangijilanga bantu ne, ne kuba’mba ba Adama ne Evwa bafwainwa bene kwifuukwila kyawama ne kyatama. Pano Yehoba waubilepo byepi? Wafwainwe kwipaya bano bansatuki ne kupwisha bunsatuki. Nanchi kuba bino inge kwamwesheshe’mba Satana wabepele nyi? Ine.

⁹ O ene mambo, Yehoba o abujile kwibepaya ponkapotu. Walekele bantu kuba’mba belamenga bene. Kino kyamweshatu patoka kuba’mba Satana wa bubela ne  kuba’mba Yehoba ye wayuka kulama bantu bulongo. Tukafunda byavula pa kino mu Kitango 11. Mulangulukapo’mba ka pa byaubile Adama ne Evwa? Nanchi baubiletu bulongo kuswa byaambile Satana ne kusatukila Lesa nyi? Yehoba wapele Adama ne Evwa byonse byo bajinga nabyo? Wibapele bumi bwalumbuluka, mwakwikala mwawama, ne nkito yawama yo baingilanga. Bino Satana  kafwapotu nangwa kimo kyo ebobijilepo ne. Umvwe anweba, inge mwaubile byepi?

10. Ñanyi kintu kyanema bingi kyo twafwainwa kusalapo atweba bonse?

¹⁰ Ne mu ano moba, atweba bonse twafwainwa kusalapo, kabiji bumi bwetu bwaimena pa kyo twasalapo. Twakonsha kusalapo kukokela Yehoba byo aji Kalama ne kushiina Satana amba wa bubela. Nangwa kusalapo kwitulama kwi Satana. (Salamo 73:28; tangai Byambo bya Maana 27:11.) Bantu bakokela Lesa mwaya ntanda bachechetu. Kabiji Lesa kechi ye ubena kulama ino ntanda ne. Inge kechi ye ubena kulama ino ntanda ne, pano ñanyi ubena kwiilama?

11, 12. (a) Satana byo apelenga Yesu bufumu bwa pano pa ntanda, kitufunjishapo ka? (b) Ñanyi binembelo byaamba’mba Satana ye ubena kulama ino ntanda?

¹¹ Yesu wayukile ubena kulama ino ntanda. Kimye kimo Satana wamwesheshe Yesu “bufumu bonse bwa pano pa ntanda ne lukumo lwabo.” Kepo Satana aambijile Yesu amba: “Abye byonse nsakukupa umvwe umfukamine ne kumpopwela.” (Mateo 4:8, 9; Luka 4:5, 6) Akilangulukai pa kino, ‘Inge buno bufumu bonse kechi bwajinga bwa kwa Satana ne, nanchi inge wibupainenga kwi Yesu nyi?’ Ine. Makafulumende onse a mu ino ntanda a kwa Satana.

¹² Mwakonsha kushikisha’mba: ‘Satana wakonsha kwikala byepi kalama wa ino ntanda? Nanchi Yehoba kechi ye Lesa wa Bulume Bonse walengele jiulu ne ntanda nenyi?’ (Lumwekesho 4:11) Ibyo, pano bino, Yesu wamutelele Satana amba “mfumu wa pano pa ntanda.” (Yoano 12:31; 14:30; 16:11) Mutumwa Paulo naye watelele Satana Diabola amba ye “lesa wa buno bwikalo.” (2 Kolinda 4:3, 4) Kabiji mutumwa Yoano naye wanembele’mba,  “pano pa ntanda ponse paji mu bulume bwa kwa aye mubi.”—1 Yoano 5:19.

13. Mambo ka o tubena kukebela ntanda ipya?

¹³ Ino ntanda ibena kuyatu nakutaminakotu. Makondo, mazhikakanwa, bukamfutumfutu ne bumbanzhi byasampukila ne pa katele. Bantu nangwa bebikekotu byepi, kechi bakonsha kufumyapo bino bintu ne. Katatakatu Lesa akonaune ino ntanda ibi pa nkondo ya Amagedonyi. Kepo ino ntanda yonse ikekala ntanda ipya ya bololoke.—Lumwekesho 16:14-16; monai Byambo byo Balumbulula, 10.

14. Lesa wasala ñanyi kwikala Mfumu mu Bufumu bwanji? Kabiji Baibolo waambijile jimo amba ka pe Yesu?

¹⁴ Yehoba wasajile Yesu Kilishitu kwikala Mfumu mu Bufumu bwanji nangwa’mba kafulumende wanji wa mwiulu. Kala kene, Baibolo waambijile jimo amba Yesu ye “Mfumu wa Mutende” kabiji amba kafulumende wanji kechi ukafumapo ne. (Isaya 9:6, 7) Yesu wafunjishe baana banji ba bwanga kulomba pa uno kafulumende amba: “Bufumu bwenu bwiye. Kyaswa muchima wenu kyubiwe pano pa ntanda, byonka byo kibena kubiwa mwiulu.” (Mateo 6:10) Mu Kitango 8, tukafunda Bufumu bwa Lesa byo bukafumyapo makafulumende onse a pano pa ntanda ne kulama ino ntanda. (Tangai Danyela 2:44.) Kepo Bufumu bwa Lesa bukalula ino ntanda yonse ke paladisa.—Monai Byambo byo Balumbulula, 11.

15. “Ntanda ipya” yo ika?

¹⁵ Baibolo waamba’mba: “Atweba tubena kutengela meulu apya ne ntanda ipya” kabiji “mu bino mo mukekala bololoke.” (2 Petelo 3:13; Isaya 65:17) Kimo kimye  umvwe Baibolo watongola “ntanda,” ulumbulula bantu bekala pano pa ntanda. (Ntendekelo 11:1) Onkao mambo, “ntanda ipya” ya bololoke ilumbulula bantu bakokela Lesa bo apesha.

16. Ñanyi bupe Lesa bo akapa bantu bakekala mu ntanda ipya? Twafwainwa kuba byepi pa kuba’mba tukatambule buno bupe?

¹⁶ Yesu waambile’mba bantu bakekala mu ntanda ipya ya Lesa bakatambula “bumi bwa myaka ne myaka.” (Mako 10:30) Twafwainwa kuba byepi pa kuba’mba tukekale na bumi bwa myaka ne myaka? Tangai Yoano 3:16 ne 17:3, pa kuba’mba muyuke byo mwafwainwa kuba. Pano twayai tumone byaamba Baibolo pa bikekalanga bantu mu Paladisa pano pa ntanda.

17, 18. Twayuka byepi kuba’mba bantu bakekalanga mutende kabiji kafwako kyo bakachinanga pano pa ntanda ne?

¹⁷ Bubi, nkondo, bumbanzhi, ne malwañano kechi bikekalako ne. Kechi kukekalapo mubi nangwatu umo pano pa ntanda ne. (Salamo 37:10, 11) Lesa ‘ukapwisha nkondo pano pa ntanda ponse.’ (Salamo 46:9; Isaya 2:4) Bantu batemwa Lesa kabiji bamukokela bo bakekalanga pano pa ntanda. Bakekala mutende myaka ne myaka.—Salamo 72:7.

¹⁸ Bantu ba Yehoba kafwako kyo bakachinanga ne. Bena Isalela byo bakokejilenga Lesa mu kimye kyanembejilwengamo Baibolo, baikalanga bulongo mambo Lesa wibazhikijilanga. (Bena Levi 25:18, 19) Mu Paladisa tukekalanga ku matwi nzoo, kafwako kyo tukachinanga ne.—Tangai Isaya 32:18; Mika 4:4.

19. Twayuka byepi kuba’mba mu ntanda ipya ya Lesa kajo kakavula bingi?

¹⁹ Kajo kakavula bingi. “Kajo kakavula bingi pano pa ntanda; kakekala ne peulu ya mitumba.” (Salamo 72:16) Yehoba “Lesa wetu uketupesha,” kabiji “ntanda ikamenesha kajo.”—Salamo 67:6.

20. Twayuka byepi kuba’mba ntanda yonse ikekala paladisa?

 ²⁰ Ntanda yonse ikekala paladisa. Bantu bakashimika mazubo akipale ne kujimba maluba amweka bulongo. (Tangai Isaya 65:21-24; Lumwekesho 11:18.) Ntanda yonse ikekala ya buya byonka byajinga bujimi bwa Edena. Yehoba uketupanga byonse byo tukeba. Baibolo waamba pe Lesa amba: “Muvungulula kuboko kwenu, ne kupa bilengwa byumi bintu byonse byo bikeba.”—Salamo 145:16.

21. Twayuka byepi kuba’mba bantu ne banyama bakekalanga mutende?

²¹ Bantu ne banyama bakekalanga mutende. Banyama kechi bakalukukanga bantu ne. Baana babacheche kechi bakachinanga banyama bakaji bo tuchina pa kino kimye ne.—Tangai Isaya 11:6-9; 65:25.

22. Yesu ukobapo ka pa bikola?

²² Kafwako nangwa umo ukakolwa ne. Yesu wabukile bantu bavula byo ajinga pano pa ntanda. (Mateo 9:35; Mako 1:40-42; Yoano 5:5-9) Pano byo aji Mfumu mu Bufumu bwa Lesa, Yesu ukabuka bantu bonse. Kafwako muntu nangwa umo ukamba’mba: “‘Nakolwa’ ne.”—Isaya 33:24; 35:5, 6.

23. Lesa ukobapo ka pa bafwa?

²³ Bafwa bakekala na bumi jibiji. Lesa walaya’mba ukasangula bantu bavula bingi. “Kukekala lusanguko lwa baoloka ne babula koloka.”—Tangai Yoano 5:28, 29; Byubilo 24:15.

24. Mumvwa byepi pa mulaye wa kwikala mu Paladisa?

²⁴ Atweba bonse twafwainwa kusalapo. Twakonsha kusalapo kufunda pe Yehoba ne kumwingijila, nangwa kubangatu byo tukeba. Tukekala bingi bulongo kulutwe inge twasalapo kwingijila Yehoba. Mwanamulume umo byo ajinga pepi kufwa waambijile Yesu amba mukamvuluke. Yesu wamulayile’mba: “Ukekala ne amiwa mu Paladisa.” (Luka 23:43) Twayai tufunde byavula pe Yesu Kilishitu ne kumona byo akalengela milaye ya Lesa kufika.