1, 2. Bañanyi bajinga balunda ne Yehoba?

MUNTU wa mutundu ka ye mwakonsha kukeba’mba ekale mulunda nenu? Muntu ye mwatemwa bingi kabiji ye mumvwañana nanji. Muntu wakoka muchima kabiji uji na byubilo byawama.

² Yehoba Lesa usala bantu bakwikala balunda nanji. Umo pa bano ke Abalahama wajinga mulunda ne Yehoba. (Isaya 41:8; Yakoba 2:23) Kabiji Davida naye bamutemenwe bingi kwi Yehoba. Waambile kuba’mba ye ‘muntu wamutokejile bingi ku muchima.’ (Byubilo 13:22) Ngauzhi Danyela naye ‘bamunemekele’ bingi kwi Yehoba.—Danyela 9:23.

3. Mambo ka Abalahama, Davida ne Danyela o baikejile balunda ne Yehoba?

³ Ki ka kyalengejile Yehoba kusala Abalahama, Davida, ne Danyela kwikala balunda nanji? Yehoba wabujile Abalahama amba: “Mambo waumvwina jiwi jami.” (Ntendekelo 22:18) Yehoba wikala mulunda na bonse bamukokela. Nangwatu kisaka kya bantu kyakonsha kwikala na bulunda bwawama ne Lesa. Yehoba wabujile kisaka kya bena Isalela amba: “Kookelainga byo ñamba, kabiji amiwa nkekala Lesa wenu, ne anweba mukekala bantu bami.” (Yelemiya 7:23) Onkao mambo, ne anweba mwafwainwa kukokelanga Yehoba inge mukeba kuba’mba ekale mulunda nenu.

4, 5. Yehoba uzhikijila byepi balunda nanji?

⁴ Baibolo waamba’mba Yehoba ukeba mashinda a kumumwesheshamo “bulume bwanji na mambo a boba bamuketekela na muchima wabo yense.” (2 Byambo bya Moba  16:9) Pa Salamo 32:8, Yehoba walaya balunda nanji amba: “Nkakupa milangwe ne kukufunjisha jishinda jo wafwainwa kuyamo. Nkakubuula bya kuba saka nkutala.”

⁵ Mulwanyi wetu wakanama bingi, ukeba’mba tuleke kwikala balunda ne Lesa. Bino Yehoba ukeba bingi kwituzhikijila. (Tangai Salamo 55:22.) Tumwingijila Yehoba na muchima yense mambo mulunda netu. Tutwajijila kwikala bakishinka kwi aye nangwatu bintu byakatazha byepi. Kabiji twamuketekela byonka byamuketekejile nyimbi wa masalamo. Wanembele pe Yehoba amba: “Na mambo a kuba uji ku kuboko kwami kwa kilujo, kechi nkatenkena ne.” (Salamo 16:8; 63:8) Pano Satana onauna byepi bulunda bwetu ne Lesa?

6. Satana waambile’mba ka pa bantu bonse?

⁶ Mu Kitango 11 twafunjile’mba Satana waambile’mba Yehoba uji na bubela kabiji wakanama bingi, mambo kechi waswishishe ba Adama ne Evwa kwifuukwila bene kyawama ne kyatama ne. Buku wa mu Baibolo wa Yoba witubula’mba Satana uzhinauka bantu bakeba kwikala balunda ne Lesa. Satana wamba’mba, bantu bengijila Lesa mambo bakeba’mba ebapenga bintu, kechi na mambo a kumutemwa ne. Satana waamba’mba, kafwako muntu ye akonsha kukankalwa kufumya kwi Lesa. Twayai tumone byaubile Yoba byo byakonsha kwitukwasha, ne Yehoba byo amukwashishe.

7, 8. (a) Yehoba wamonanga byepi Yoba? (b) Satana waambilepo’mba ka pe Yoba?

⁷ Yoba wajinga muntu wa mutundu ka? Yoba wajinga muntu wawama bingi, wajingako kala papita ne myaka nobe 3,600. Yehoba waambile’mba, pano pa ntanda kechi pajingapo muntu waesakene pamo nanji ne. Yoba waakamwanga Lesa kabiji washikilwe bintu byatama. (Yoba 1:8) Yoba wajinga mulunda wa kine wa kwa Yehoba.

 ⁸ Satana waambile’mba Yoba kechi wingijila Lesa kyatutu ne. Satana waambijile Yehoba amba: “Nanchi anweba kechi mwamuzhokolosha na luvimba ne kumuzhikijila aye, nzubo yanji ne bintu byonse byo aji nabyo nenyi? Mwapesha mingilo ya maboko anji, kabiji bilelwa byanji byakumbana kyalo kyonse. Bino umvwe mutanyike kuboko kwenu ne konauna bintu byonse byo aji nabyo, aye kine ukemwambila mwenga.”—Yoba 1:10, 11.

9. Yehoba waswishishe Satana kuba ka?

⁹ Satana waambile’mba Yoba waingijilanga Yehoba kuba’mba amupenga bintu. Kabiji Satana waambile’mba wakonsha kumulekesha Yoba kwingijila Yehoba. Yehoba wakaine byaambile Satana. Lesa waswishishe Satana kuba’mba eseke Yoba, pa kuba’mba Satana ayuke’mba Yoba wajinga mulunda wa kwa Yehoba mambo wamutemenwe.

10. Satana walukukile byepi Yoba? Kabiji Yoba waubile byepi?

¹⁰ Patanshitu Satana waibile nangwa’mba waonawine bilelwa bya kwa Yoba. Kepo Satana aipayile bakalume ba kwa Yoba. Bintu byonse byajinga ne Yoba byaonaikile. Kyapeleleko Satana waipayile baana jikumi ba kwa Yoba na kinkunkwila. Nangwa byonkabyo, Yoba watwajijiletu kwikala wa kishinka kwi Yehoba. “Mu bino bintu byonse, Yoba kechi walengele mambo nangwa kupamo Lesa mambo a kuba bintu byatama ne.”—Yoba 1:12-19, 22.

11. (a) Ñanyi bintu bikwabo Satana byo aubile Yoba? (b) Yoba waubile byepi?

¹¹ Satana kechi wikilekele ne. Waambijile Lesa amba: “Umvwe mutanyike kuboko kwenu ne kupuma pa kikupa kyanji ne pa mubiji wanji, aye kine ukemwambila mwenga.” Satana wamanyikile Yoba na misongo ikatampe. (Yoba 2:5, 7) Nangwa byonkabyo, Yoba watwajijile kwikala wa kishinka kwi Yehoba. Yoba waambile’mba: “Kufikatu ne byo nkafwa, kechi nkasankilapo bulumbuluke bwami ne!”—Yoba 27:5.

12. Byaubile Yoba bimwesha byepi amba Satana wa bubela?

 ¹² Yoba kechi wayukile’mba Satana wamuzhinaukilenga ne kuba’mba ye wamuletejilenga ano makatazho ne. Yoba wamwenenga’mba Yehoba ye wamuletejilenga ano makatazho. (Yoba 6:4; 16:11-14) Nangwa byonkabyo, watwajijile kwikala wa kishinka kwi Yehoba. Luzhinauko lobamuzhinaukile lonse lwapwile. Yoba kechi witemenwetu aye mwine ne. Wajinga mulunda ne Lesa mambo wamutemenwe bingi. Byaambilenga Satana byonse byajingatu bya bubela.

13. Yoba wamwenejilemo ka mu bukishinka bwanji?

¹³ Yoba kechi wayukile byaubiwenga mwiulu ne. Nangwa byonkabyo, watwajijile kwikala wa kishinka kwi Lesa ne kushiina Satana kuba’mba wa bubela. Yehoba wamupesheshe Yoba mambo wajinga mulunda nanji wa kishinka.—Yoba 42:12-17.

14, 15. Satana wamba’mba ka pa bantu bonse, banabalume ne banabakazhi?

¹⁴ Mwakonsha kufunjilako bintu byavula ku byamwekejile Yoba. Ne mu ano moba, Satana wamba’mba twingijila Yehoba kuba’mba etupenga bintu. Pa Yoba 2:4, Satana waambile’mba: “Muntu wakonsha kupana kintu kyonse kyo aji nakyo pa kuba’mba apulushe bumi bwanji.” Onkao mambo, Satana uzhinauka bonsetu, banabalume ne banabakazhi amba bengijila Lesa mambo wibapa bintu byonka byo aambile pe Yoba. Byo papichile myaka yavula kufuma pafwijile Yoba, Satana watwajijile kulengulula Yehoba ne kuzhinauka bakalume banji. Pa Byambo bya Maana 27:11, tutangapo’mba: “Mwanami, wikale wa maana ne kusangajika muchima wami, pa kuba’mba namukumbule awa uñendeleka.”

¹⁵ Mwafwainwa kusalapo kukokela Yehoba ne kwikala mulunda nanji wa kine ne kumwesha kuba’mba Satana wa bubela. Umvwe mwamona kuba’mba muji na byubilo bimo  byo mwafwainwa kuleka pa kuba’mba mwikale balunda ne Lesa, kechi mwafwainwa kukankazhama kwibileka ne. Kufuukulapo kuba bino kwanema bingi. Satana wamba’mba inge muji na makatazho kechi mwakonsha kwikala bakishinka kwi Lesa ne. Satana wingijisha mashinda a bujimuku pa kulengela bantu kubula kwikala bakishinka kwi Lesa. Uba byepi bino?

16. (a) Ñanyi mashinda Satana o engijisha pa kuba’mba alekeshe bantu kwingijila Yehoba? (b) Diabola wakonsha kwimulengela byepi kuleka kwingijila Yehoba?

¹⁶ Satana wingijisha mashinda apusana pusana pa kuba’mba alekeshe bantu kwikala balunda ne Lesa. Ulukukañana “nobe bokwe ubuluma ubena kukeba wa kuja.” (1 Petelo 5:8) Kechi mwafwainwa kukumya balunda nenu, ba mu kisemi nangwatu bantu bakwabo inge ke bakebe kwimulekesha kufunda Baibolo ne kuba byawama ne. Mwakonsha kumvwatu nobe bemulukuka. * (Yoano 15:19, 20) Kabiji Satana “wialula nobe malaika wa kyeya.” Wakonsha kwitulengela kubula kukokela Yehoba kwingijisha mashinda a bujimbijimbi. (2 Kolinda 11:14) Jishinda jikwabo Satana jo engijisha pa kuba’mba etulekeshe kwingijila Yehoba ke kwitulengela kwilengulula ne kumona nobe kechi twanema kya kuba ke twingijile Lesa ne.—Byambo bya Maana 24:10.

17. Ki ka kitulengela kukokela Yehoba?

¹⁷ Kukokela Yehoba kumwesha’mba byaambile Satana bya bubela. Ki ka kyakonsha kwitukwasha kukokela Lesa? Baibolo waamba’mba: “Mwafwainwa kutemwa Yehoba  Lesa wenu na muchima wenu yense, ne na mweo wenu yense ne na bulume bwenu bonse.” (Mpitulukilo ya mu Mizhilo 6:5) Tukokela Yehoba mambo twamutemwa. Inge twatemwa Yehoba kya kine, tukobanga bintu byonse byo etubula kuba. Mutumwa Yoano wanembele’mba: “Kutemwa Lesa kulumbulula’mba tulondelenga mikambizho yanji; kabiji mikambizho yanji kechi yakatazha ne.”—1 Yoano 5:3.

18, 19. (a) Ñanyi bintu bimo Yehoba byo etukanya kuba? (b) Twayuka byepi kuba’mba bintu Yehoba byo etukambizha kuba kechi byakatazha ne?

¹⁸ Ñanyi bintu Yehoba byo etukanya kuba? Bintu bimo byo akanya biji mu kakitenguluzha ka kuba’mba: “ Shikwai Byashikwa Yehoba.” Mwakonsha kumona’mba bintu bimo byo batongola kechi byatamishatu ne. Pano bino inge mwatanga bino byepelo mu Baibolo ne kulangulukapo, popo mukamona buwame buji mu kukokela mizhilo ya Yehoba. Kuba bino kwakonsha ne kwimulengela kuleka  byubilo bimo byo mwaubanga kala. Byubilo bimo kechi byapela kuleka ne. Pano bino inge mwauba bino mukekala mutende ne na lusekelo na mambo a kwikala mulunda wa kine ne Lesa. (Isaya 48:17, 18) Twayuka byepi kuba’mba twakonsha kuleka byubilo byatama nangwa kya kuba kechi kyapela kuba bino ne?

¹⁹ Yehoba kechi witwambila kuba bintu byo twakonsha kukankalwa kuba ne. (Mpitulukilo ya mu Mizhilo 30:11-14) Byo aji Mulunda netu wa kine, aye wituyuka bulongo byo tuji kukila ne byo twiyuka atweba bene. Aye wayuka bulume botuji nabo ne bukoke bwetu. (Salamo 103:14) Mutumwa Paulo wanembele’mba: “Lesa wa kishinka, kabiji kechi ukemuleka’mba mwesekwe lweseko lwakila pa bulume bwenu ne, bino mu lweseko lonse aye ukemumwena jishinda ja kuchinchikilamo.” (1 Kolinda 10:13) Yehoba kimye kyonse witupa bulume bwa kuba byawama. Ukemupa “bulume bwakila bwa bantu” bwa kwimukwasha kuchinchika mu meseko. (2 Kolinda 4:7)  Paulo wimwenejile byamukwashishenga Yehoba mu meseko, waambile’mba: “Mambo bintu byonse nji na ngovu ya kwibyuba na mambo a yewa umpa bulume.”—Filipai 4:13.

20. Ñanyi byubilo bya kwa Lesa byo twafwainwa kwibikako kwikala nabyo, kabiji mambo ka?

²⁰ Umvwe tukeba kwikala balunda ne Yehoba twafwainwa kuleka kuba byo ashikwa. Pano bino kuji ne kikwabo kyo twafwainwa kuba. (Loma 12:9) Balunda ne Lesa batemwa bintu byo atemwa. Bebalumbulula bulongo mu Salamo 15:1-5. (Tangai.) Balunda ne Yehoba bebikako kwikala na byubilo byanji nabiji “butemwe, lusekelo, mutende, kutekanya, lusa, buwame, lwitabilo, kukooka muchima ne kwikanya.”—Ngalatiya 5:22, 23.

21. Mwakonsha kwikala byepi na byubilo bya kwa Lesa?

²¹ Mwakonsha kwikala byepi na bino byubilo? Kimye kyonse tangainga Baibolo ne kufunda byatemwa Yehoba. (Isaya 30:20, 21) Umvwe ke mutange ne kufunda Baibolo, popo mukamutemwa bingi Yehoba, kabiji kumutemwa kukemulengela kukebesha bingi kumukokela.

22. Mukamwenamo ka inge kemukokele Yehoba?

²² Kuleka byubilo byatama ne kwikala na byubilo byawama, twakonsha kwikufwanyikizha ku kuvuula bivwalo bya kala ne kuvwala byakatataka. Baibolo waamba’mba, “vuulai bumuntu bwa kala” ne kuvwala “bumuntu bupya.” (Kolose 3:9, 10) Nangwa kya kuba kechi kyapela kuba bino ne, bino umvwe twauba luno lupimpu ne kukokela Yehoba, witulaya kwitupa “mfweto ikatampe.” (Salamo 19:11) Umvwe kemukokele Yehoba, mumwesha kuba’mba Satana wa bubela. Ingijilainga Yehoba na mambo a kumutemwa, kechi na mambo a mfweto iji kulutwe ne. Kuba bino, kukemulengela kwikala mulunda wa kine ne Lesa.