Lufunjisho 10
Mwakonsha Kuyuka Byepi Bupopweshi bwa Kine?
1. Nanchi kujitu bupopweshi bumo bwa kine nyi?
Yesu wafunjishanga baana banji ba bwanga bupopweshi bumotu bwa kine. Buji nobe jishinda jaya ku bumi bwa myaka ne myaka. Yesu waambile’mba: “Bejitana bachechetu” jino jishinda. (Mateo 7:14) Bupopweshi bwaimena pa Mambo anji, Baibolo, bo bwaitabilwa kwi Lesa. Bonse bena Kilishitu bakine bakwatankana mu lwitabilo lumotu.—Tangai Yoano 4:23, 24; 14:6; Efisesa 4:4, 5.
2. Yesu waambilepo’mba ka pa bena Kilishitu babubela?
Yesu waambile’mba bangauzhi babubela bakatamisha bwina Kilishitu. Kabiji bamweka nobe bapopweshi bakine. Machechi abo beatela’mba a bwina Kilishitu. Bano bantu mwakonsha kwibayukila ku byo boba. Mu ñanyi jishinda? Bena Kilishitu bakine bo bonkatu baji na byubilo ne mingilo yawama ya kwibayukilako.—Tangai Mateo 7:13-23.
3. Mwakonsha kuyuka byepi bapopweshi bakine?
Monai bino bya kwibayukilako bitanu:
-
Bapopweshi bakine banemeka Baibolo kuba’mba Mambo a Lesa. Bebikako kwikela mwayila mafunde ajimo. Onkao mambo, bupopweshi bwa kine bwapusana na bupopweshi bwaimena pa maana a bantu. (Mateo 15:7-9) Bapopweshi bakine kechi basapwila byo babula kulondela abo bene ne.—Tangai Yoano 17:17; 2 Timoti 3:16, 17.
-
Mateo 6:9) Ñanyi bupopweshi buyukanyikisha jizhina ja Lesa koko kwenu?—Tangai Yoano 17:26; Loma 10:13, 14.
Baana ba bwanga bakine ba kwa Yesu banemeka jizhina ja Lesa, ja kuba’mba Yehoba. Yesu wanemekele jizhina ja Lesa kupichila mu kwijiyukanyikisha ku bantu. Wakwashishe bantu kuyuka Lesa ne kwibafunjisha kulomba kuba’mba jizhina ja Lesa jizhile. ( -
Bena Kilishitu bakine basapwila pa Bufumu bwa Lesa. Lesa watumine Yesu kwiya na kusapwila mambo awama a Bufumu. Bufumu bwa Lesa bo bonkatu bukapokolola bantu. Yesu watwajijile kwamba pa Bufumu bwa Lesa kufikatu ne byo afwile. (Luka 4:43; 8:1; 23:42, 43) Waambile’mba baana banji ba bwanga nabo bobo bakasapwilangapo. Bantu bemusolomoka javula ne kwamba pa Bufumu bwa Lesa, bafuma mu ñanyi bupopweshi?—Tangai Mateo 24:14.
-
Baana ba bwanga ba kwa Yesu kechi ba pano pa ntanda ibi ne. Mwakonsha kwibayukila ku byo babula kwivwanga mu bya bumulwila ntanda nangwa mu malwañano. (Yoano 17:16; 18:36) Kabiji kechi boba byubilo byatama byavula pano pa ntanda ne.—Tangai Yakoba 4:4.
-
Bena Kilishitu bakine betemwa bene na bene kufuma panshi ya muchima. Mambo a Lesa ebafunjisha kunemeka bakwabo ba bikoba bingi. Bupopweshi bwa bubela butundaika makondo pakachi ka byalo, pakuba bapopweshi bakine kechi byobyo boba ne. (Mika 4:1-3) Bena Kilishitu bakine bengijisha kimye ne mali abo kukwasha ne kutundaika bakwabo.—Tangai Yoano 13:34, 35; 1 Yoano 4:20.
4. Nanchi mwakonsha kwibuyuka bupopweshi bwa kine nyi?
Ñanyi bupopweshi bufunjisha byaimena pa Mambo a Lesa, bwanemeka jizhina ja Lesa, busampanya mbila ya kuba’mba Bufumu bwa Lesa bo bwafwainwa bantu kukinkamo manungo? Bañanyi batemwa bantu kya kine kabiji bakana makondo? Mwalanguluka’mba bañanyi?—Tangai 1 Yoano 3:10-12.