Mu bupopweshi bonse muji bantu bawama michima. Mambo awama ke a kuba’mba Lesa wibata bingi muchima bantu ba uno mutundu. Kyatamakotu bamo boba byatama mu jizhina ja bupopweshi. (2 Kolinda 4:3, 4; 11:13-15) Kwesakana na masawakya amo, bupopweshi bumo butundaika bumbanzhi, malwañano a mishobo, ne kuyanjisha baana babacheche. Bino bintu biletela bingi bulanda bantu baitabila mwi Lesa.—Tangai Mateo 24:3-5, 11, 12.

Bupopweshi bwa kine butumbijika Lesa, pa kuba bwa bubela bumufichisha bingi ku muchima. Bupopweshi bwa bubela bufunjisha bintu byabula mu Baibolo, bya bubela pe Lesa ne pa bafwa. Yehoba ukeba bantu kuyuka bukine pe aye.—Tangai Ezikyo 18:4; 1 Timoti 2:3-5.

Kyawamakotu Lesa kechi ujimbaikwa na bapopweshi babepa kumutemwa saka batemwa ntanda ya kwa Satana ne. (Yakoba 4:4) Mambo a Lesa atongola bupopweshi bwa bubela bonse amba, “Babilona Mukatampe.” Babilona ke muzhi wakala mwatendekejile bupopweshi bwa bubela Muyulo wa Nowa saka apita kala. Katatakatu Lesa azhiishe bupopweshi bonse buyanjisha ne kuluwika bantu.—Tangai Lumwekesho 17:1, 2, 5, 16, 17; 18:8.

Bino mambo awama ke a kuba’mba, Yehoba kechi wibalubako bantu bamichima ya kishinka baji mu bupopweshi bwa bubela mwaya ntanda ne. Ubena kwibakonkanya kupichila mu kwibafunjisha bukine.—Tangai Mika 4:2, 5.

Yehoba wibata bingi muchima bantu batemwa byawama ne bukine. Wibatundaika kufuma mu bupopweshi bwa bubela. Bantu batemwa Lesa babena kupimpula bwikalo bwabo kuba’mba bamutokeshenga ku muchima.—Tangai Lumwekesho 18:4.

Mu myaka ya batumwa, bantu bakishinka batambwilanga mambo awama na lusekelo asapwilanga batumwa. Yehoba wibafunjishe bwikalo bupya, buleta lusekelo, ne kwibalengela kwikala na luketekelo ne kuyuka kyo bafwainwa kuba mu bumi bwabo. Bano ke bakumwenako bawama lelo jino, mambo baswishishe mambo awama kwibakwasha kutangizhako Yehoba mu bwikalo bwabo.—Tangai 1 Tesalonika 1:8, 9; 2:13.

Yehoba ubena kutambwila bonse babena kufuma mu bupopweshi bwa bubela kwiya mu kisemi kyanji kya bapopweshi. Inge mwaswa lwito lwa Yehoba, mukekala balunda nanji, mukatwela mu kisemi kya bapopweshi ba Yehoba, kabiji mukekala na bumi bwa myaka ne myaka kulutwe na lwendo.—Tangai Mako 10:29, 30; 2 Kolinda 6:17, 18.

Kufika kwa luzhachisho lwa bupopweshi bwa bubela ke mambo awama. Lukalengela bantu kukasuluka pano pa ntanda ponse. Bupopweshi bwa bubela kechi bukaluwika bantu nangwa kuleta mabano jibiji ne. Bantu bonse bakakwatankana kupopwela Lesa wa kine.—Tangai Lumwekesho 18:20, 21; 21:3, 4.