LUFUNJISHO 71
Yehoba Wazhikijile Yesu
Ku musela wa kyalo kya Isalela kwaikalanga bantu baitabijile’mba tubangabanga twakonsha kwibatangijila. Juba jimo bufuku banabalume bamo baikalanga ku Musela bamwene kabangabanga mwiulu kaendelenga kasamine bingi. Kano kechi kajinga kabangabangatu ne. Ponkapo batendekele kwikalondela. Kano kabangabanga kebatwajile ku Yelusalema. Bano banabalume batendekele kwipuzha bantu amba: ‘Nanchi Mfumu wa Bayudea wasemwa uji pi? Twaiya nakumumona.’
Heloda, Mfumu wa bena Yelusalema byo aumvwine’mba kuji mfumu wasemwa, waakaminwe bingi. Waipwizhe bañanga bakatampe ne banembeshi amba: ‘Nanchi uno mfumu wasemenwa pi?’ Abo bamubuujile’mba: ‘Mu Betelema wa mu Yudea, mambo bino byo byanembele bangauzhi.’ Kepo Heloda aichile boba banabalume bafumine ku Musela ne kwibambila’mba: ‘Yainga ku Betelema mukakebe kuji uno mwana. Mwafwainwa kubwela kuno na kumbuula pa kuba’mba ne amiwa nkayeko na kumulambila.’ Bino byo aambilenga wabepelengatu.
Kabangabanga katendekele kwenda jikwabo. Bano banabalume nabo batendekele kwikalondela kuya ku Betelema. Kaimene peulu ya nzubo mwajinga mwana. Byo batwelele mu nzubo, bataaine Yesu saka aji ne inanji aye Maliya. Bafukamine ne kumupa bya bupe bya ngolode ne binunka bulongo ne mola. Nanchi Yehoba ye watumine bano banabalume kwiya na kumona Yesu nyi? Ine.
Bufuku Yehoba wabujile Yosefwa mu kiloto amba: ‘Heloda ubena kukeba kwipaya Yesu. Yainga na mwana ne inanji. Nyemenai ku Ijipita. Mukekalenga konkakwa mukabwelatu inge nemubula’mba bwelai.’ Ponkapotu Yosefwa waimene bufuku ne kusenda mwana ne inanji, banyemena ne ku Ijipita.
Kabiji Yehoba wabujile banabalume bafumine ku Musela amba kange bapite kwi Heloda pa kubwela ne. Heloda wazhingijile bingi byo babujile kwiya. Byo abujile kumumona Yesu, wakambizhe kwipaya bakalombwana bonse bajinga pa jifumbi ja kwa Yesu. Bino Yesu aye wajinga kwalepa bingi ku Ijipita.
Heloda byo afwile, Yehoba wabujile Yosefwa amba: ‘Pano bwela mambo kuji mutende.’ Kepo Yosefwa ne Maliya ne Yesu babwelele kwabo ku kyalo kya Isalela. Byo babwelele bakekelenga mu muzhi wa Nazala.
“Byo bikekala ne byambo bifuma mu kanwa kami . . , kabiji kine bikoba kintu kyonka kyo nebitumijile.”—Isaya 55:11
Mwakonsha Kutemwa
YESU?—YE JISHINDA, BUKINE, NE BUMI
Bashayuka ba Tubangabanga Bayile na Kumona Yesu
Mambo ka kabangabanga ko bamwene ku Musela o kakibatwajijile ku Mfumu Heloda wakanamine saka kakyangye kwibatwala kwi Yesu?
YESU?—YE JISHINDA, BUKINE, NE BUMI
Banyemene Mfumu Wakanama
Bungauzhi bwa mu Baibolo busatu bwafikile mu bwikalo bwa kwa Yesu.
