Kipungu 7
Kufuma Kimye Kyasangwilwe Yesu Kufika ku Kimye kya Kukaswa kwa kwa Paulo
Byo papichile moba asatu Yesu wasangwilwe. Pa joja juba, wamwekele ku baana banji ba bwanga bimye bitanu byapusana pusana. Yesu wamwekelenga kwi abo pa moba 40. Kyapeleleko, baana banji ba bwanga bamo kasa batala, Yesu wakanjijile mwiulu. Byo papichile moba jikumi, Lesa waitulwijile mupashi wazhila pa baana ba bwanga ba kwa Yesu bajinga mu Yelusalema.
Palutwe kacheche, balwanyi ba Lesa bataile batumwa mu kaleya, bino malaika wa Lesa wibakasulwilemo. Mwana wa bwanga Setepena bamwashile mabwe ku balwanyi ne kufwa wafwile. Bino tufunda pe Yesu byo asajile umo wa mu bano balwanyi kwikala kalume wanji, kabiji waikele ke mutumwa Paulo. Byo papichile myaka isatu ne kichika kufuma pafwijile Yesu, Lesa watumine mutumwa Petelo na kusapwila kwi Koneleusa wabujile kwikala Muyudea pamo ne ba mu nzubo yanji.
Byo papichile myaka 13, Paulo watendekele lwendo lwanji lutanshi lwa kuya na kusapwila. Pa lwendo lwanji lwa bubiji Timoti wayile pamo ne Paulo. Tufunda pe Paulo ne balunda nanji bo aendanga nabo byo bajinga na bimye byawama bingi bya kwingijila Lesa. Kyapeleleko, Paulo bamukashile ku Loma. Panyuma ya kupitapo myaka ibiji, bamukasulwile, bino babwelele bamukasa jibiji ne kumwipaya. Bintu byanembwa mu KIPUNGU 7 byaubiwe mu myaka nobe 32.
BIJI MU KINO KIPUNGU
JISHIMIKILA 102
Yesu Wasangulwa
Malaika byo aalumwineko jibwe ku kilende kya kwa Yesu, bashilikale balaminenga kilende bakuminye bingi kyo bamwene mukachi ka kilende.
JISHIMIKILA 103
Byo Bajinga mu Kibamba Saka Bashinkako
Mambo ka baana ba bwanga ba kwa Yesu o babujile kumuyuka byo asangwilwe?
JISHIMIKILA 104
Yesu Wabwelele Mwiulu
Yesu saka akyangye kuya mwiulu wapeele baana banji ba bwanga mukambizho wapelako.
JISHIMIKILA 105
Bapembejilenga mu Yelusalema
Mambo ka Yesu o aitulwijile mupashi wazhila pa baana banji ba bwanga pa Pentekosita?
JISHIMIKILA 106
Bebakasulwile mu Kaleya
Bantangi ba bupopweshi bwa Bayudea bakashile bakatumwa kuba’mba baleke kusapwila, bino Lesa wajinga na kintu kyapusanako ne abo.
JISHIMIKILA 107
Setepena Bamwashile Mabwe
Byo bamwipayilenga, Setepena walombele lulombelo lwawama bingi.
JISHIMIKILA 108
Byo Bailenga mu Jishinda Jaya ku Damasakasa
Kyeya kyamulengejile kubula kumona ne kumvwa jiwi kufuma mwiulu kwapimpwile byubilo bya kwa Saulo.
JISHIMIKILA 109
Petelo Wapempwile Koneleusa
Nanchi Lesa umona bantu ba mu mitundu ingi amba banema kukila bantu ba mu mitundu ikwabo nyi?
JISHIMIKILA 110
Timoti Waikele Nkwasho wa kwa Paulo
Timoti wafumine pa nzubo ne kuya na kwingijila pamo ne Paulu mu mwingilo wa kusapwila.
JISHIMIKILA 111
Nsongwalume Walaajile Tulo
Yutikusa wakupukijilwe mu tulo mu jashi jitanshi jaambilenga Paulo, bino kechi mu jashi ja bubiji ne. Kintu kyamwekele pa ao majashi abiji pamwekele kya kukumya.
JISHIMIKILA 112
Bwato Bwalobejile pa Mema
Byo kwashajiletu tiki kuba’mba byonse biye mu lufuko, Paulo watambwijile byambo byawama kufuma kwi Lesa byamulengejile kwikala na luketekelo amba byonsetu bisakwikalatu bulongo.
JISHIMIKILA 113
Paulo byo Ajinga mu Loma
Pano Paulo waingijilenga byepi mwingilo wanji saka aji kaili?