LUFUNJISHO 37
Byaambapo Baibolo pa Nkito ne Mali
Nanchi mwakikalapo kala na bijikila pa mambo a kubula kutwela nkito nangwa kubula mali nyi? Kyakonsha kukatazha bingi kumona mwa kwikwashisha ne kwingijilanga Yehoba na muchima yense. Nangwa byonkabyo, mu Baibolo muji mafunde afwainwa kwitukwasha.
1. Baibolo waambapo’mba ka pa nkito?
Lesa ukeba’mba twikalenga na lusekelo mu mingilo yo twingila. Baibolo waamba’mba “kintu kyawamatu ku muntu . . . kumwena lusekelo mu mingilo yo engila.” (Musapwishi 2:24) Yehoba wingila bingi na ngovu. Inge saka twingila na ngovu byonkatu bingila Yehoba, tukamutokeshanga ku muchima ne atweba bene tukatemwa bingi.
Kwingila mingilo kwanema bingi. Pano bino, kechi twafwainwa kutemwa nkito kukila kwingijila Yehoba ne. (Yoano 6:27) Inge twatangizhako kwingijila Yehoba mu bwikalo bwetu, aye uketupa bintu byonsetu byo tukeba.
2. Twafwainwa kumonanga byepi mali?
Nangwa kya kuba Baibolo waamba kuba‘mba “mali akwashañana,” kabiji witujimunako’mba mali bunke bwao kechi akonsha kwitulengela kwikala na lusekelo ne. (Musapwishi 7:12) Onkao mambo, kino kinembelo kitutundaika kubula kutemwa mali. Pakuba twafwainwa ‘kusekelanga mu bintu byonka byo muji nabyo.’ (Tangai Bahebelu 13:5.) Inge twatwajijila kusekela mu bintu byonka byo tuji nabyo, kechi tukekala na bijikila ne. Kabiji kechi tukekala na makongole ne. (Byambo bya Maana 22:7) Kuba bino kuketukwasha kuchinuzhuka kuba busulu buleta mali bukiji kwa kubula kutayapo ne ngovu ne.
3. Twafwainwa kwingijishanga byepi mali bulongo?
Yehoba Lesa mpanyi mukatampe. Kabiji twikalatu byonka byo aji inge twaikala “bampanyi, benengezha kukwashañana.” (1 Timoti 6:18) Twafwainwa kwingijisha bulongo mali etu kukwasha kipwilo ne balongo ne banyenga bakajilwa. Yehoba utemwa bingi pa kine kintu kitulengela kupana kechi kuvula kwa mali o tupana ne. Inge twapana na muchima yense, twikala na lusekelo ne kutokesha Yehoba ku muchima.—Tangai Byubilo 20:35.
FUNJILAIPO BIKWABO
Monai buwame buji mu kubula kutwezhamo ne mutwe mu mingilo ya ku mubiji ne kusekela mu bintu byonka byo muji nabyo.
4. Nemekai Yehoba mu jishinda jo mwingijilamo mingilo
Bulunda bwetu ne Yehoba bwafwainwa kwitulengela kupimpula ndangulukilo yetu pa byo tumona kutwela kinto. Tambai VIDYO, ne kwisamba ano mepuzho.
-
Mu vidyo ye mwatamba, ñanyi bintu byo mwatemwa pa ba Jason ne byubilo byo bamwesheshe pa nkito?
-
Ñanyi bintu byo baji kuba byamwesha kuba’mba kechi batwezhezhemo ne mutwe mu nkito?
Tangai Kolose 3:23, 24, ne kwisamba buno bwipuzho:
-
Mambo ka o kyanemena atweba kwingilanga mingilo na muchima yense?
Kwingila mingilo kwanema bingi. Pano bino, kechi twafwainwa kutemwa mingilo kukila kwingijila Yehoba ne
5. Kusekela mu bintu byonka byo tuji nabyo kwitukwasha bingi
Bantu bavula beyeka bingi kwingila pa kuba’mba bekale na mali avula. Bino Baibolo witubuula kintu kyapusanako. Tangai 1 Timoti 6:6-8, ne kwisamba buno bwipuzho:
-
Nanchi Baibolo witutundaika kuba ñanyi kintu?
Nangwatu inge tuji na mali acheche, twakonsha kwikala na lusekelo mu bwikalo bwetu. Tambai VIDYO, ne kwisamba buno bwipuzho.
-
Ñanyi kintu kyakwashishe bino bisemi kwikala na lusekelo nangwa kya kuba bajingatu na mali acheche?
Twakonsha kuba byepi inge kya kuba tuji na mali avula kabiji tukikebelapotu ne akwabo? Yesu waambile pa jishimikila jamwesha lukatazho luji mu kukebesha mali avula. Tangai Luka 12:15-21, ne kwisamba buno bwipuzho:
-
Ñanyi kintu kyo mwafunjilako ku kino kishimpi kyaambilepo Yesu?—Monai kyepelo 15.
Tangai ne kwesekanya byaamba Byambo bya Maana 10:22 ne 1 Timoti 6:10. Kepo mwisambe ano mepuzho:
-
Kyepi kyo mwamona’mba kyanema bingi? Nanchi kwikala mulunda ne Yehoba nyi, inyi kwikala na mali avula? Mambo ka o mwakumbwila byobyo?
-
Ñanyi makatazho apitamo muntu ukebesha kwikala na mali avula?
6. Yehoba uketupa byo tukeba
Inge kitukatazha kutaana nkito nangwa kechi tuji na mali avula ne, kiketukwasha kuyuka kana twaketekela mwi Yehoba nangwa ne. Tambai VIDYO tumone byo twafwainwa kuba inge lwitabilo lwetu lwaesekwa ne kwisamba ano mepuzho.
-
Mu vidyo ye mwatamba, ñanyi makatazho apichilemo mulongo?
-
Ñanyi bintu byo aubile pa kuba’mba ayuke mwa kubila na ano makatazho?
Tangai Mateo 6:25-34, ne kwisamba buno bwipuzho:
-
Nanyi bintu Yehoba byo alaya kubila bantu batangizhako kuba kyaswa muchima wanji mu bwikalo bwabo?
BANTU BAMO BAMBA’MBA: “Nafwainwa kwingila na ngovu pa kuba’mba mmwenenga bintu ba mu kisemi kyami. Kechi nafwainwa kutanwanga ku kupwila kimye kyonse ne.”
-
Ñanyi kinembelo kimulengela kushiinwa’mba Yehoba uketupa byo tukeba mu bwikalo bwetu inge twatangizhako kuba kyaswa muchima wa Yehoba?
ÑANYI BISHINKA BYO MWAFUNDA?
Kechi kyatama kutwela nkito ya ku mubiji ne kwikala na mali ne. Pano bino, kechi twafwainwa kuswisha nkito ne mali kwitulabika ne kuleka kwingijila Yehoba ne.
Mepuzho a kupitulukamo
-
Ñanyi kintu kyafwainwa kwimukwasha kubula kutwezhamo ne mutwe mu nkito?
-
Kusekela mu bintu byonka byo muji nabyo kwimukwasha byepi?
-
Mwakonsha kumwesha byepi amba mwaketekela mu mulaye wa Yehoba wa kuba’mba upa bantu banji bintu byo bakeba?
KEBAI BISHINKA BIKWABO
Monai inge Baibolo waamba’mba kwikala na mali kwatama.
“Nanchi Mali Muzhazhi wa Misango Yonse ya Bubi Nyi?” (Kibaaba kiji pa jw.org)
Yukai bumpanyi butokesha Lesa ku muchima.
“Baibolo Wambapo’mba ka pa Bumpanyi?” (Kibaaba kiji pa jw.org)
Nanchi kukaya makayo a kuchikapo mali kwatama nyi?
“Byambapo Baibolo pa Makayo a Kuchikapo Mali” (Labainga!, March 2015)
Monai byakwashishe muntu umo wakayanga makayo a kuchikapo mali ne kwibila bantu byo apimpwile byubilo byanji.
“Natemenwe Bingi Makayo a pa Bambili” (Kyamba kya Usopa, November 1, 2011)
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
