Yesu byo atwajijile kuya ku Yelusalema saka apita mu kibunji kya Pelia, nsongwalume umo munonshi waishile ne kufukama kwi aye. Uno muntu wajinga “ntangi,” kampe wajinga mukulumpe wa nshinagoga nangwa kampe wajinga wa mu Kije Kikatampe kyo batelanga’mba Saniedilini. Waipwizhe Yesu amba: “Mufunjishi Wawama, ñanyi kintu kyo nafwainwa kuba pa kuba’mba nkekale na bumi bwa myaka ne myaka?”—Luka 8:41; 18:18; 24:20.

Yesu wamukumbwile’mba: “Mambo ka o wantelela’mba wawama? Mambo kafwako muntu wawama ne, kanatu Lesa kwapwa.” Kampe awa nsongwalume waingijishe kyambo kya ‘kuwama’ kumwesha kunema byonka byaubanga balabi. Nangwa kya kuba Yesu wafunjishanga bulongo, kechi wakebanga kumutela’mba wawama ne, mambo Lesa bunketu ye wafwainwa kutelwa’mba “Wawama.”

Yesu wafunjileko uno muntu amba: “Umvwe ukeba kupuluka wafwainwa kulamanga mikambizho.” Onkao mambo uno muntu waipwizhe’mba: “Ñanyi mikambizho?” Yesu watongawile mikambizho itanu ya pa Mikambizho Jikumi. Waambile pa kubula kwipayañana, kuba bukende, kwiba, kwikala kamonyi wa bubela, ne kunemeka bansemi. Kepo apaine mukambizho wanema bingi wa kuba’mba wafwainwa “kutemwa mukwenu byonka byo witemwa obe mwine.”—Mateo 19:17-19.

Uno muntu wakumbwile’mba: “Abino bintu byonse nebilama; ñanyi kintu kikwabo kyo nafwainwa kuba?” (Mateo 19:20) Kampe walangulukilenga’mba kuji bimo byo abulanga kuba nabiji byubilo byawama byafwainwe kumulengela kwikala na bumi bwa myaka ne myaka. Yesu byo aumvwine byambo byaambile uno muntu bya kufuma panshi ya muchima, ‘wamutemenwe.’ (Mako 10:21) Nangwa byonkabyo, kwajinga kimo kyamukatezhe bingi kuba.

Uno muntu watemenwe bingi bunonshi, onkao mambo, Yesu wamwambijile’mba: “Kuji kintu kimo kyo wafwainwa kuba: Yanga ukapoteshe bintu byo uji nabyo ne kupana mali ku bayanji, kabiji ukekala na nsabo mwiulu; apa bino wiye undondelenga.”  Kya kine, uno mwanamulume wafwainwe kupana mali anji ku bayanji bakonsheshe kubula kumubwezhezha, apa bino waikala mwana wa bwanga wa kwa Yesu. Yesu wamutajilenga uno muntu na lusa byo aimene ne kufumapo na bulanda. Kutemwisha bunonshi, ko kuba’mba “bintu byavula” byo ajinga nabyo kwamulengejile kubula kuyuka buneme bwa nsabo ya kine. (Mako 10:21, 22) Yesu waambile’mba: “Kikakatazha bingi aba baji na mali kutwela mu Bufumu bwa Lesa!”—Luka 18:24.

Baana ba bwanga bakuminye bingi pa bino byambo byaambile Yesu ne bikwabo byo anungilepo bya kuba’mba: “Kyapela ngamela kupita mu jiso ja nguya kukila nonshi kutwela mu Bufumu bwa Lesa.” Abino byambo byalengejile baana ba bwanga kwipuzha’mba: “Nanchi ñanyi wakonsha kupuluka?” Nanchi lupulukilo lwakatazha kya kuba kafwako muntu wakonsha kufikilamo kupuluka nenyi? Yesu wibatajile ne kwibambila’mba: “Bintu byonse byakatazha ku bantu, kwi Lesa kechi byakatazha ne.”—Luka 18:25-27.

Petelo wamwesheshe kuba’mba abo basajilepo kintu kyapusene na kyasajile awa mwanamulume nonshi. Waambile’mba: “Talai! Twasha bintu byonse ne kwimulondela; pano ñanyi bintu byo tukamwenamo?” Yesu waambile kintu kyawama kikafumamo amba: “Pa kukalenga jibiji bintu, kimye Mwana muntu kyo akekala pa jitanda janji ja lukumo, anweba mwandondela mukekala pa matanda 12 na kuchibila mambo bisaka 12 bya Isalela.”—Mateo 19:27, 28.

Yesu wamwesheshe’mba kulutwe kukekala kulenga jibiji bintu ke bipya pano pa ntanda kuba’mba bikekale byonka byo byajinga mu bujimi bwa Edena. Petelo ne baana ba bwanga bakwabo bakatambula mfweto ya kulama pamo ne Kilishitu ntanda yonse ya Paladisa. Kine, bintu byo bashile kechi byaesakana pamo na ino mfweto ne.

Pano bino, ano mapesho kechi ajitu kulutwe ne. Nangwatu pa kino kimye baana banji ba bwanga babena kumwenamo byawama. Yesu waambile’mba: “Kafwako washa nzubo nangwa mukazhanji nangwa bakolojanji nangwa bankasanji ba balume, bansemi nangwa baana na mambo a Bufumu bwa Lesa ukabula kutambula bintu byavula mu kino kimye ne mu bwikalo bukeya, bumi bwa myaka ne myaka ne.”—Luka 18:29, 30.

Byonkatu Yesu byo alayile, konse kuya baana banji ba bwanga pano pa ntanda, beyowa bulunda bwawama na bakwabo bena Kilishitu kabiji bwanema kukila bulunda bujipo na ba mu kisemi. Kyatamakotu ke kya kuba’mba nsongwalume ntangi nonshi kyamweka washajilepo pa ino mfweto ne mfweto ya kwikala na bumi bwa myaka ne myaka mu Bufumu bwa Lesa bwa mwiulu.

Yesu wanungilepo’mba: “Bino bavula batanshi bo bakapelako, kabiji bapelako bo bakekala batanshi.” (Mateo 19:30) Watazhizhe mu ka?

Awa nsongwalume munonshi wajinga pa bantu “batanshi,” ko kuba’mba bantangi ba Bayudea. Na mambo a kuba’mba walamanga mikambizho ya Lesa, wafwainwe kuba bintu byavula. Pano bino, aye watangizheko bunonshi mu bwikalo bwanji. Bino, bantutu bamwene kuba’mba Yesu wafunjishenga bukine ne jishinda ja ku bumi. Bano bo ‘bapeleleko,’ pano baikala “batanshi.” Babena kutengela kwikala pa matanda mwiulu pamo ne Yesu ne kulama ntanda ya Paladisa.