Papichile myaka 17 kufuma kimye Yesu kyo ashikishenga bafunjishi mu nzubo ya Lesa saka ajitu na myaka 12. Kyajinga kimye kya mwela wa mebele mu mwaka wa 29 C.E. Kabiji kyamweka bavula baambilenga pe Yoano mulongo wa kwa Yesu, wasapwijilenga monse mu kyalo kyajinga ku musela wa Mukola wa Yodano.

Yoano wajinga kitonzhi mu mwekelo ne mu ñambilo. Wavwalanga kivwalo kya boya bwa ngamela ne mushipi wa kiseba mu lubunda wanji. Wajanga nzhiye ne buki. Byambo ka byo asapwijilenga? Wasapwijilenga’mba: “Lapilai, mambo Bufumu bwa mwiulu bwafwenya pepi.”—Mateo 3:2.

Byambo byasapwijilenga Yoano byasangajikile bingi bantu bamutelekelenga. Bavula bamwene’mba bafwainwe kulapila, ko kuba’mba kupimpula byubilo byabo ne kusankilapo bwikalo bwabo bwatama bwa kala. Bantu bavula kufuma “mu Yelusalema ne bonse ba mu Yudea ne mu mapunzha onse ajinga pepi na Yodano baishilenga kwi aye.” (Mateo 3:5) Bavula baishile kwi Yoano balapijile. Wibabatizhenga saka ebebizha mu mema a mu Yodano. Mambo ka?

Yoano wabatizhenga bantu kwikala kiyukilo kya lulapilo lwabo lwa kufuma panshi ya muchima pa mambo o balengele a kuzhilulula lulayañano lwa Mizhilo ya Lesa. (Byubilo 19:4) Bino kechi bonse balapijile ne. Bantangi ba bupopweshi, Bafaliseo ne Basadusea bamo byo baishile kwi aye, Yoano wibatelele’mba “baana ba bipiji.” Waambile’mba: “Mweshainga bipangwa bimwesha kulapila. Kange mulangulukenga mu michima yenu amba, ‘Tuji na shetu Abalahama’ ne. Amiwa nemwambila namba, Lesa wakonsha kwalula ano mabwe kwikala baana ba kwa Abalahama. Kapasa bekatula kala ku mizhazhi ya bichi. Kichi kyonse kibula kupanga bipangwa byawama, bakekitema ne kwikitaya mu mujilo.”—Mateo 3:7-10.

Na mambo a kuba bantu bonse batele muchima kwi Yoano waambilenga byambo bya bulume, kabiji wabatizhenga ne bantu bavula, Bayudea batumineko bañanga ne bena Levi kwi aye ne kumushikisha’mba: “Nanchi yobe ñanyi?”

Yoano waambile’mba: “Kechi yami Kilishitu ne.”

Abo bamushikishe’mba: “Nanchi wi ñanyi? Nanchi yobe Elaija nyi?”

Aye wakumbwile’mba: “Kechi yami iye ne.”

Kabiji bamushikishe’mba: “Nanchi yobe ngauzhi nyi?,” ko kuba’mba Ngauzhi waambilepo Mosesa amba ukeya.—Mpitulukilo ya mu Mizhilo 18:15, 18.

Yoano wibakumbwile’mba: “Ine!”

Abo bakoselepotu na kumushikisha’mba: “Nanchi yobe ñanyi? Tubuule pa kuba’mba tuye na kwibabuula aba baji kwitutuma. Nanchi witela obe mwine amba wi ñanyi?” Yoano wakumbwile’mba: “Amiwa yami jiwi ja yewa ubena kubijika mungye amba, ‘Ololai jishinda ja Yehoba,’ byonka byaambile ngauzhi Isaya.”—Yoano 1:19-23.

Abo bakebele kuyuka ene mambo o a batizhenga bantu. Onkao mambo, bamushikishe’mba: “Pano mambo ka o ubatizhizha umvwe kechi wi Kilishitu nangwa Elaija nangwa Ngauzhi ne?” Aye wibakumbwile mukumbu walumbuluka amba: “Amiwa mbatizha mu mema. Mukachi kenu mwaimana muntu ye mwabula kuyuka, yenka ubena kundondela.”—Yoano 1:25-27.

Kya kine, Yoano waswile kuba’mba wanengezhezhenga jishinda kupichila mu kukwasha bantu kwikala na muchima wawama wa kwitabila Mesiasa ukekala Mfumu. Yoano waambile pe aye amba: “Awa ubena kundondela wankila bulume, kabiji kechi nakonsha kumuvuula makwabilo anji ne.” (Mateo 3:11) Yoano waambile ne kuba’mba: “Awa ubena kundondela watangilako kala kulutwe yami, mambo wajingako amiwa saka nkyangye kwikalako.”—Yoano 1:15.

Onkao mambo, byambo bya kwa Yoano bya kuba’mba “Lapilai, mambo Bufumu bwa mwiulu bwafwenya pepi” byaishile pa kimye kyafwainwa. (Mateo 3:2) Mambo byakwashishe bantu kuyuka’mba Yesu Kilishitu, Mfumu ye batongola kwi Yehoba wajinga pepi kutatula mwingilo wanji.