Elisabeta wajinga pepi na kupaapa. Maliya mulongo wanji waikele nanji bañondo basatu. Pano kimye kyafikile kya kuba’mba Maliya amushajikepo ne kubwela kwabo ku Nazala. Kabiji pa kupitapo bañondo nobe batanu na umo, Maliya naye ukasema mwana wamulume.

Aku Maliya uyatu, Elisabeta wapaapile. Kyaletele bingi lusekelo Elisabeta byo apaapiletu bulongo kabiji aye ne mwananji bajingatu bulongo. Elisabeta byo amwesheshe uno mwananji ku bakwabo ne balongo banji, bonse basekejile bingi.

Kwesakana na Mizhilo Lesa yo apele bena Isalela, pa juba ja butanu na busatu panyuma ya kusemwa, mwana wamulume bafwainwe kumutwala ku mukanda ne kumutuma jizhina. (Bena Levi 12:2, 3) Bamo balangulukilenga’mba uno mwana bamutumbe jizhina ja shanji amba, Zekaliya. Pano bino, Elisabeta wakaine. Waambile’mba: “Ine mwane ne! Usakutelwa’mba Yoano.” (Luka 1:60) Vulukai’mba malaika Ngabaliela waambile’mba uno mwana bafwainwe kumutumba’mba Yoano.

Nangwa byonkabyo, balunda nanji ne balongo banji bakaine’mba: “Mu balongo bobe kafwamo uji na jino jizhina ne.” (Luka 1:61) Kepo baipwizhe Zekaliya kwingijisha maboko jizhina jo akebele’mba atumbe mwananji. Zekaliya wibalombele kya kunembapo kyapapakana ne kunembapo’mba: “Jizhina janji Yoano.”—Luka 1:63.

Aku upwishatu kunemba, Zekaliya watatwile kwamba. Vulukai kuba’mba walekele kwamba mambo kechi waswile byamubuujile malaika amba Elisabeta ukasema mwana ne. Zekaliya byo atatwile kwamba, balunda nanji bakuminye bingi ne kwishikisha mulwabo amba: “Nanchi uno mwana ukekala muntu wa mutundu ka?” (Luka 1:66) Na mambo a jishinda jo bamutumbijilemo jizhina, bantu bamwene’mba kuboko kwa Lesa kwajinga pe Yoano.

Zekaliya byo ayujile na mupashi wazhila waambile’mba: “Atotwe Yehoba, Lesa wa Isalela, mambo wavuluka bantu banji ne kwibapokolola. Kabiji wituletela lusengo wa lupulukilo mu nzubo ya kwa Davida kalume wanji.” (Luka 1:68, 69) Uno “lusengo wa lupulukilo” ye aambilengapo ke Nkambo Yesu waishile kusemwa. Zekaliya waambile’mba kupichila mwi aye, Lesa uketupokolola “mu maboko a balwanyi kuba’mba etupe kimye kya kumwingijila kwa kubula moyo, na bukishinka ne bololoke ku meso anji mu moba etu onse.”—Luka 1:74, 75.

Kepo Zekaliya aambile pa mwananji Yoano amba: “Pakuba obewa mwana mucheche, ukatelwa’mba ngauzhi wa Mwine Wakila, mambo Yehoba ukakutangizhako na kunengezhezha jimo mashinda anji, na kusapwila byambo bileta lupulukilo ku bantu kupichila mu kwibalekelako mambo abo, na mambo a kifyele kya Lesa wetu. Na mambo a kino kifyele, tukamona kyeya kufuma mwiulu kikasama nobe juba, ne kupana kyeya ku baji mu mfishi ne ku baji mu kimvule kileta lufu, ne kutangijila maulu etu mu jishinda ja mutende.” (Luka 1:76-79) Buno bungauzhi bwitutundaika bingi.

Pa kikye kimye, Maliya wafikile mu muzhi wa Nazala, kabiji kyamweka wakijinga muzhike. Ñanyi kintu kyakonsheshe kumumwekela umvwe kyayukanyikwa amba waimita?