Yesu ne baana banji ba bwanga bafikile ku Beteseda. Bantu bamuletejile mwanamulume mpofu ne kumusashijila’mba amukwate ne kumubuka.

Yesu wakwachile ku kuboko kwa uno mwanamulume ne kumulupwila pangye ya muzhi. Byo amushipijile mate mu meso, wamushikishe’mba: “Ki ka kyo wamona?” Uno mwanamulume wakumbwile’mba: “Namona bantu, bino babena kumweka nobe bichi bibena kwenda.” (Mako 8:23, 24) Byo amukwachile mu meso, Yesu walabishe meso a uno muntu. Kepo amutumine uno muntu ku nzubo saka abena kumonatu bulongo, kabiji wamukainye kutwela mu muzhi.

Byo bafumine kuno, Yesu ne baana banji ba bwanga bayile ku kabeta ka buyeke bwa kibunji kya Kesalea Filipai. Palepele bingi, pajinga nobe makilomita 40. Kino kibunji kyaikajile patuntama mamita 350, kabiji ku buyeke musela kwajinga Mutumba wa Helemone wajinga na mabebe peulu. Kyamweka baendelepo moba abiji.

Byo bafikile pa mpunzha imo, Yesu wayile kwa bunke na kulomba. Kwashajiletu bañondo batanu na bana nangwa jikumi kuba’mba afwe, kabiji walangulukilenga bingi pa baana banji ba bwanga. Bavula balekele kumulondela, kabiji bakwabo kampe bavulañene nangwa kwibafita ku muchima. Kampe balangulukilenga pa ene mambo o akainjile byakebelenga bantu amba ekale mfumu, nangwa kyo akainjile kumwesha kiyukilo kuba’mba bamuyuke bulongo.

Baana banji ba bwanga byo baishile ko alombejilenga, Yesu wibashikishe’mba: “Bantu bamba’mba Mwana muntu ñanyi?” Bamukumbwile’mba: “Bamo bamba’mba, Yoano Mubatizhi, bakwabo amba Elaija, bakwabo nabo amba Yelemiya nangwa amba umo wa mu bangauzhi.” Kya kine, bantu balangulukilenga’mba Yesu ke mwanamulume umo wasanguka. Pa kuba’mba ayuke byo balangulukilenga, Yesu waipwizhe baana banji ba bwanga amba: “Nga anweba muntela’mba yami ñanyi?” Petelo wamukumbwile’mba: “Anweba mwi Kilishitu, Mwana Lesa mumi.”—Mateo 16:13-16.

Yesu waambile’mba Petelo wakonsheshe kwikala na lusekelo mambo Lesa wamusolwejile kino. Wamwambijile’mba: “Nakwambila namba: Obewa wi Petelo, kabiji pa jonka jino jibwe jikatampe po po nkashimikila kipwilo kyami, ne Kilende kechi kikakonsha kwikishinda ne.” Yesu walumbulwilenga’mba ukashimika kipwilo kya kuba nangwatu lufu kechi lukebashinda inge batwajijila kwikala bakishinka pano pa ntanda ne. Kepo abuujile Petelo amba: “Nkakupa makii a Bufumu bwa mwiulu.”—Mateo 16:18, 19.

Yesu kechi wapele Petelo kifulo kikatampe kukila batumwa bakwabo nangwa kwikala kitendekesho kya kipwilo ne. Yesu mwine ye Jibwe pashimikwa kipwilo. (1 Kolinda 3:11; Efisesa 2:20) Bino Petelo bamupele makii asatu. Waingijishe ano makii  kushinkwila jibumba ja bantu kutwela mu Bufumu bwa mwiulu.

Petelo waingijishe kii mutanshi pa Pentekosita mu 33 C.E. kulumbulwila Bayudea ne bantu baalukile ke Bayudea balapijile kintu kyo bafwainwe kuba pa kuba’mba bakapuluke. Kabiji waingijishe kii wa bubiji kukwasha bena Samaliya baitabijile kutwela mu Bufumu bwa Lesa. Kepo mu 36 C.E. waingijishe kii wa busatu kukwasha ba mu bisaka bikwabo babujile kuya kumukanda, Koneleusa ne bakwabotu.—Byubilo 2:37, 38; 8:14-17; 10:44-48.

Byo besambilenga, Yesu walengejile batumwa kwakamwa byo ebabuujile’mba ukamanama ne kufwa mu Yelusalema. Petelo byo akankelwe kuyuka’mba Yesu ukasangukila ku bumi bwa mwiulu, wasendele Yesu ku mbaji ne kumukanya amba: “Kwakamwa ne, Nkambo; kino kechi kikemumwekela ne.” Yesu byo aalulukile wamwambijile’mba: “Pichila kunyuma yami, Satana! Obewa wi kya kwituntulako kyami, mambo ulanguluka milanguluko ya bantu kechi ya Lesa ne.”—Mateo 16:22, 23.

Kepo Yesu aichile jibumba ne baana banji ba bwanga ne kwibabuula’mba: “Umvwe muntu ukeba kundondela, ekane mwine ne kusenda kichi kyanji kya lumanamo, kabiji andondelenga. Mambo yense ukeba kupulusha bumi bwanji ukebwela, pakuba yense wela bumi bwanji na mambo a amiwa ne na mambo a mambo awama ukebupulusha.”—Mako 8:34, 35.

Kya kine, aba balondela Yesu umvwe bakeba kutalwa bulongo kwi aye, bafwainwa kuchinchika ne kwipana. Yesu waambile’mba: “Muntu yense umvwa bumvu na mambo a amiwa ne na mambo a byambo byami mu kino kisemi kya bankende kabiji kyatama, Mwana muntu naye ukamumvwina bumvu kimye kyo akeya mu lukumo lwa Shanji na bamalaika bazhila.” (Mako 8:38) Kimye Yesu kyo akeya, “ukafweta bantu monka mwayila byubilo byabo.”—Mateo 16:27.