Bantu bavula mu mapunzha a kwalepa baumvwine nkuwa ya kwa Yesu. Bavula baendelenga miseke yalepa bingi kuya na kumvwa byo afunjishanga ne kumona mingilo yanji ya kukumya. Bino, byo papichile moba acheche wabwelele ku Kapenama, ko aingijilanga bimye byavula. Kabiji nkuwa ya kuba’mba wabwela yaumvwanyikile mu uno muzhi wajinga ku musezho wa Kalunga ka Ngalilea. Onkao mambo, bantu bavula baishile ku nzubo ko aikelenga. Pa bano bantu pajinga Bafaliseo ne bafunjishi ba Mizhilo bafumine mu Ngalilea, mu Yudea ne mu Yelusalema.

“Bantu bavula bakonkene mu nzubo kya kuba kafwapo pashajile ne, kufikatu ne mu kibelo monse, ne aye watatwile kwibasapwila byambo bya Lesa.” (Mako 2:2) Pa kikye kimye, kwamwekele kintu kyanema bingi. Kino kintu kyamwekele kitukwasha kuyuka’mba Yesu uji na bulume bwa kufumyapo kine kintu kilengela bantu kumanama ne kubuka bantu bonse bo akeba kubuka.

Yesu byo afunjishenga jibumba, banabalume bana baletele muntu wa kalepu ye batembekele pa kamwanya. Bakebelenga’mba Yesu abuke uno mulunda nabo. Bino, “bakankelwe kumuleta kwi Yesu na mambo a jibumba.” (Mako 2:4) Bafwainwa baumvwine bingi bibi ku muchima. Bakanjijile pa musemi ne kusabapo. Kabiji byo basabilepo, bashikwile muntu wa kalepu wajinga pa kamwanya ne kumwikizhizha mu nzubo.

Nanchi Yesu wibazhingijile pa byo baubile nyi? Ine. Aye wasekejile bingi pa kumona lwitabilo lwabo kabiji waambijile muntu wa kalepu amba: “Mambo obe alekelwa.” (Mateo 9:2) Bino nanchi Yesu wakonsha kulekela bantu mambo nyi? Banembeshi ne Bafaliseo bazhingijile ne kutendeka kwamba mu michima yabo amba: “Mambo ka uno muntu o abena kwambila bino? Ubena kwamba mwenga. Kafwako wakonsha kulekela muntu mambo ne, kanatu Lesa yenka kwapwa.”—Mako 2:7.

Yesu byo ayukile byo balangulukilenga, wibashikishe’mba: “Mambo ka o mubena kulangulukila bino bintu mu michima yenu? Nanchi kyepi kyapela, kwambila muntu wa kalepu amba, ‘Mambo obe alekelwa’ nyi, inyi amba, ‘Imana usende kamwanya kobe wende?” (Mako 2:8, 9) Ee, na mambo a kitapisho kya bumi bwanji kyo aishile kupana, Yesu wakonsheshe kulekela yewa mwanamulume mambo anji.

Kepo Yesu amwesheshe jibumba, kuvwangakotu ne bamulengulwilenga, kuba’mba uji na luusa lwa kulekela bantu mambo abo pano pa ntanda. Waalulukile ne kwambila muntu wa kalepu amba: “Nakwambila namba, Imana, usende kamwanya kobe uyenga ku nzubo yobe.” Kabiji waimene ne kusenda kamwanya kanji ne kulupukamo bonse saka bamutala. Bonse bakuminye bingi ne kutumbijika Lesa saka bamba’mba: “Tukyangye kumonapo kintu kya uno mutundu.”—Mako 2:11, 12.

Twamona kuba’mba Yesu waambile pa bundengamambo pamo na kukolwa ne kuba’mba paji lukwatankano pa kulekelwa mambo ne kwikala na butuntulu bwa mubiji. Baibolo ufunjisha’mba nsemi wetu mutanshi, Adama, walengele mambo kabiji atweba bonse tukolwa ne kufwa mambo twaswana bundengamambo. Bino mu Bufumu bwa Lesa, Yesu ukalekela mambo bantu bonse batemwa Lesa ne kumwingijila. Kabiji ukafumyapo bikola byonse myaka ne myaka.—Loma 5:12, 18, 19.