Yesu ne baana banji ba bwanga bana byo bayile na kusapwila mu ‘mashinagoga monse mu Ngalilea,’ nkuwa ya bintu byawama byaubile Yesu yakumbene monse. (Mako 1:39) Byambo bya mingilo yanji byaumvwanyikile mu muzhi umo mwajinga muntu wa mbumba. Shayuka wa michi aye Luka walumbulwile uno muntu amba “wajinga na mbumba yavula.” (Luka 5:12) Kikola kya mbumba inge kyabaya, kitendeka konauna binungwa bya mubiji pachepache.

Onkao mambo, uno muntu wa mbumba wajinga bingi na bulanda, kabiji na mambo a kino kikola, wafwainwe kwikala kwalepa na bantu. Kabiji inge bantu bakwabo baiya kwipi ne aye, wafwainwe kubijika’mba “Ne wa muzhilo, ne wa muzhilo!” pa kuba’mba abo bantu babule kusambula kikola kyanji. (Bena Levi 13:45, 46) Bino uno muntu wa mbumba waubile byepi? Wafukamine ne kusashijila Yesu amba: “Nkambo umvwe mwaswa, mbukai.”—Mateo 8:2.

Uno muntu kine waketekejile mwi Yesu. Kabiji kino kikola kyanji kyamulengejile kwikala bingi na bulanda. Yesu waubilepo byepi? Umvwe mwajingako inge mwaubile byepi? Yesu wamubijile lusa, kabiji watanyikile kuboko kwanji ne kumukwata, ne kumwambila’mba: “Naswa! Bukwa.” (Mateo 8:3) Kabiji ponkapotu mbumba yapwile, ne kubukwa wabukilwe. Kyajinga kya kukumya bingi.

Nanchi mwakonsha kutemwa kwikala na mfumu wa lusa ne bulume byonka biji Yesu nyi? Yesu byo aubile na uno muntu wa mbumba bitukwasha kuketekela’mba kimye kyo akekala Mfumu wa ntanda yonse, ukafikizha bungauzhi bwa mu Baibolo bwaamba’mba: “Ukobila lusa mulanda ne muyanji, kabiji ukapulusha bumi bwa bayanji.” (Salamo 72:13) Yesu ukakwasha bantu bonse babena kumanama mambo kyo kyasakisha muchima wanji.

Vulukai kuba’mba Yesu saka akyangye ne kubuka yewa muntu wa mbumba, mwingilo wanji wasangajikile bingi bantu bavula. Kabiji bantu baumvwine ne kino kintu kyawama kyo aubile. Bino, Yesu kechi wakebelenga bantu kumwitabila na mambotu a masawakya o baumvwinenga ne. Wayukile bungauzhi bwaambile’mba aye “kechi ukalengela jiwi janji kumvwanyika mu mukwakwa,” ko kuba’mba, kwingijisha mashinda a kukumya ne. (Isaya 42:1, 2) Onkao mambo, Yesu wakambizhe uno muntu wa mbumba ye abukile amba: “Kange ubuulepo muntu nangwa umo ne, bino yanga ukemweshe ku bañanga, ne kupana bupe monka mwaambila Mizhilo ya Mosesa.”—Mateo 8:4.

Bino, byonka byo mwayuka, uno mwanamulume wasangalele bingi kya kuba kechi wakonsheshe kufya kintu kya kukumya kyamumwekejile ne. Byo afumineko, watatwile kubulañana ne kukumbanya konse konse kino kyamwekele. Kino kyalengejile bantu kukeba bingi kumona Yesu. Onkao mambo, Yesu kechi wakonsheshe kutwela mu muzhi saka bamumona ne, bino waikeletu kimye kicheche ku mpunzha kwa bunke. Nangwa byonkabyo, bantu baishilenga kwi aye kufuma konse konse kabiji wibafunjishenga ne kubuka bikola byabo.