Yesu waingijile mwingilo wanji wa kusapwila mu Ngalilea pa kimye kyabaya bingi, kabiji bantu batangako bingi muchima kukila ba mu Yudea. Kabiji byo abukile mwanamulume pa juba ja Sabado kimye kyo ajinga mu Yelusalema, “Bayudea bakebelenga kumwipaya.”—Yoano 5:18; 7:1.

Kyajinga kimye kya kibundo mu 32 C.E., kabiji Kijiilo kya Matente (nangwa’mba kya Mimba) kyajinga pepi. Kino kijiilo baikalanga nakyo moba atanu na abiji, apa bino palondela kubuñana kwazhila pa juba ja butanu na busatu. Kino kijiilo kyo kyamweshanga’mba kimye kya kunowa kyapwa, kabiji kyajinga kimye kya kusangalala ne kusanta.

Bankasanji Yesu, ba Yakoba, Shimona, Yosefwa ne Yudasa bamwambijile’mba: “Fumai kuno muyenga ku Yudea.” Yelusalema ye wajinga muzhi mukatampe ko bayanga na kupopwela. Mu uno muzhi mwayulanga bingi bantu kimye kya bijiilo bya pa mwaka pa mwaka. Bankasanji Yesu baambilenga’mba: “Kafwako muntu uba kintu mu bufyamfya inge ukeba kuyukanyikwa ku bantu ne. Umvwe mubena kuba bino bintu, kemweshai anwe bene ku ba pano pa ntanda.”—Yoano 7:3, 4.

Bano bankasa ne kolo bana “kechi bamwitabijile” amba ye Mesiasa ne. Pano bino, bakebelenga’mba amweshepo bya kukumya bantu bataainwe ku kijiilo. Yesu wayukile kizumba kyo ajingamo. Onkao mambo, wibabuujile’mba: “Ba pano pa ntanda kechi bakonsha kwimushikwa ne, bino amiwa banshikwa, mambo nshimuna kuba’mba mingilo yabo yatama. Anweba yainga ku kijiilo; amiwa kechi nsakuyako ne, mambo kimye kyami kikyangye kufika.”—Yoano 7:5-8.

Byo papichile moba amo kufuma kimye bankasanji Yesu kyo bayijile pamo na jibumba, Yesu ne baana banji ba bwanga bafumineko ku ino mpunzha kwa kubula kwibamona ku bantu bavula ne. Kechi bapichile mu jishinda jaingijishanga bantu bavula japichile ku Mukola wa Yodano ne, bino bapichile mu jishinda japichile mu Samaliya. Yesu ne baana banji ba bwanga bakebelenga kwa kufikila mu muzhi wa Samaliya, onkao mambo, watumineko baluwe kuya na kunengezha mwa kufikila. Bantu mu mpunzha imo bakaine kwibatambwila mambo bayukile’mba Yesu wayilenga ku Yelusalema na kutanwa ku kijiilo kya Bayudea. Ba Yakoba ne Yoano byo bazhingijile, bamwipwizhe’mba: “Nkambo, nanchi mubena kukeba’mba twambile mujilo afume mwiulu ebasoke nyi?” (Luka 9:54) Byo baambile bino, Yesu wibakajipijile, kabiji bayile ku muzhi mukwabo.

Byo bayilenga mu jishinda, munembeshi umo wamwambijile Yesu amba: “Mufunjishi, nsakwimulondelanga konse ko mubena kuya.” Bino Yesu wamwambijile’mba: “Balubwala baji na mimbwa ne bañonyi nabo baji na binsa, pakuba Mwana muntu kechi ujipo ne na pa kushakamina mutwe ne.” (Mateo 8:19, 20) Yesu walumbulwilenga’mba awa munembeshi wakonsheshe kupita mu makatazho umvwe kya kuba waikele mwana wa bwanga wa kwa Yesu. Kabiji kyamweka na mambo  a kwilundumika, awa munembeshi kechi wakonsheshe kuswa bwikalo bwa uno mutundu ne. Onkao mambo, atweba bonse pa muntu pa muntu twafwainwa kwishikisha’mba, ‘Nanchi nepana kulondela Yesu nyi?’

Yesu waambijile mwanamulume mukwabo amba: “Ndondelenga.”Aye wakumbwile’mba: “Nkambo, patanshi nswishai ngye nkazhiike batata.” Na mambo a kuba’mba Yesu wayukile byalangulukilenga uno muntu, wamwambijile’mba: “Leka bafu bazhiike bafu babo bene, pakuba obewa yanga ukasapwile Bufumu bwa Lesa konse konse.” (Luka 9:59, 60) Awa muntu kyamweka bashanji bakijinga bomi. Mambo umvwe bafwile, mwanabo inge kechi waishile na kwisamba ne Yesu ne. Awa mwana kechi winengezhezhe kutangizhako Bufumu bwa Lesa mu bwikalo bwanji ne.

Byo bakiyilenga ku Yelusalema, muntu mukwabo waambijile Yesu amba: “Nsakwimulondela, Nkambo, bino patanshi nswishai nkashajikepo ba mu nzubo yami.” Yesu wamwambijile’mba: “Kafwako muntu ukwata kuboko kwanji ku pulao ne kutala ku bintu biji kunyuma wafwainwa Bufumu bwa Lesa ne.”—Luka 9:61, 62.

Aba bakeba kwikala baana ba bwanga ba kwa Yesu bafwainwa kuta muchima ku mwingilo wa Bufumu. Inge muntu wakwata pulao ke abule kutala kulutwe, tumimpalala twakonsha kukonkomana. Kabiji umvwe watulapo pulao amba mmone biji kunyuma, mingilo yakonsha kulaala. Byo byo kiji ne ku muntu yense utala kunyuma mu buno bwikalo, wakonsha kwituntula ne kufuma mu jishinda ja ku bumi bwa myaka ne myaka.