Yesu byo ajiilenga kajo mu nzubo ya Mufaliseo, bantu bavula bakonkene pangye na kumupembelela. Bano baubile byonka byaubile jibumba ja bantu mu Ngalilea. (Mako 1:33; 2:2; 3:9) Mu Yudea, bantu bavula bakebelenga kumumona ne kuteleka kwi aye. Byubilo bya bano bantu byapuseneko na bya Bafaliseo bo ajinga nabo ku kijiilo.

Byambo byaambile Yesu byakwashishe bingi baana banji ba bwanga. Waambile’mba: “Jimukai na mbizho ya Bafaliseo, ko kuba’mba bukamfutumfutu.” Yesu wajimwineko baana banji ba bwanga kimye kitanshi pa kino kintu, pano bino, bintu byo amwene pa kijiilo byamulengejile kubwezhapo luno lujimuno. (Luka 12:1; Mako 8:15) Bafaliseo bafilenga bubi bwabo kupichila mu kwibepekezha koloka, pano bino, bwasolokele patoka. Yesu walumbulwile’mba: “Kafwako kintu kyo bafya pa nkonkoso kikabula kusololwa ne, kabiji kafwako kyafyamika kikabula kuyukanyikwa ne.”—Luka 12:2.

Kyamweka bantu bavula baishile kwi Yesu bajinga bena Yudea babujile kumvwapo byo afunjishenga mu Ngalilea. Onkao mambo, wabwezhezhepo bishinka bikatampe byo aambile kimye kitanshi. Waambijile bantu bamutelekelenga’mba: “Kange muchine aba bepaya mubiji ne, kabiji inge bauba kino kafwako kintu kikwabo kyo boba ne.” (Luka 12:4) Byonka byo aubile kunyuma, Yesu walayilenga baana banji ba bwanga amba Lesa kechi ukebavulama ne. Bafwainwe kwitabila Mwana muntu, ne kuyuka kuba’mba Lesa ukebakwasha.—Mateo 10:19, 20, 26-33; 12:31, 32.

Muntu umo mu jibumba wabuujile Yesu lukatazho lo ajinga nalo amba: “Mufunjishi, ambilai mulongo wami twabane nanji bya buswanyi.” (Luka 12:13) Mizhilo ya Mosesa yaambile’mba mubeji wamulume wafwainwe kutambula lubaji lubiji lwa bya buswanyi. Onkao mambo, abo kechi bafwainwe kwitobosha ne. (Mpitulukilo ya mu Mizhilo 21:17) Bino kyamweka awa muntu wakebelenga byakila pa bya buswanyi byo afwainwe kutambula. Yesu wakaine kwivwangamo. Wamwipwizhe’mba: “Obewa mukwetu, ñanyi wantongwele kwikala mutonyi nangwa wa kwimwabanya bipe anweba babiji?”—Luka 12:14.

Kepo ajimwine jibumba amba: “Labainga ne kuchinuzhuka lwiso lonse, mambo muntu nangwatu ekale na bintu byavula, bintu byo aji nabyo kechi byo bimulengela kwikala na bumi ne.” (Luka 12:15) Muntu nangwa ekale na bintu byavula, ukafwa ne kwibisha byonse. Pa kukosesha kino kishinka kyo aambilengapo, Yesu waingijishe kishimpi kimwesha buneme buji mu kwikala na bulunda bwawama na Lesa. Waambile’mba:

“Mu bujimi bwa munonshi umo mwafumine kajo kavula. Onkao mambo, walangulukile’mba, ‘Pano byo nabula pa kulonga kajo kami, nsakuba byepi?’ Kepo aambile’mba, ‘Nsakuba kino: Nsakushimukulula matala ami ne kushimika akatampe, kabiji nkalongamo kajo kami konse ne bintu byami byonse, kabiji nkamba namba: “Nji na bintu byavula byawama bya kwingijisha pa myaka yavula; nsakukokolokangatu, na kuja, ne kutoma ne kwiyowa.”’ Bino Lesa wamwambijile’mba, ‘Obewa kilubi, buno bonka bufuku babena kukeba bumi bobe. Pano nga abya byo walongele mu matala bikekala bya kwa ñanyi?’ Onkao mambo, byo biji ne muntu wibikila nsabo aye mwine bino saka abula kwikala nonshi kwi Lesa.”—Luka 12:16-21.

Baana ba bwanga ba kwa Yesu ne bakwabo batelekelenga kwi aye bakonsheshe kufwa mu kano kakose ka kukebesha bunonshi. Nangwa bintu bya pa juba pa juba bya mu bwikalo byakonsheshe kwibalengela kubula kwingijila Yehoba na muchima yense. Onkao mambo, Yesu wabwezhezhepo kwamba jibiji pa lujimuno lwawama lo ebajimwineko mwaka umo ne kichika wapichilepo kimye kyo aambile Jashi ja pa Mutumba. Wibambijile’mba:

“Kilekai kubambisha michima pa bwikalo bwenu na byo mukaja nangwa na byo mukavwala. . . . Langulukai pa bikwangala: Abyo kechi bikusa nkunwa nangwa kunowa ne; kabiji kechi biji  na matala ne; bino Lesa wibijiisha. Nanchi anweba kechi mwanema kukila bañonyi nenyi? . . . Langulukai pa maluba byo akoma: Kechi engila mwingilo nangwa kwisonena kivwalo ne; pakuba amiwa nemwambila namba nangwatu Solomone mu lukumo lwanji lonse kechi wavwajile pamo nobe maluba ne. . . . Onkao mambo, kilekai kubambisha michima na byo mukaja, na byo mukatoma, kabiji kilekai kukizhamo kwakamwa . . . Shenu wayuka’mba mwibikeba bino bintu. . . . Twajijilai na kukeba Bufumu bwanji ne bino bintu byonse bikemubikilwapo.”—Luka 12:22-31; Mateo 6:25-33.

Bañanyi bafwainwe kukeba Bufumu bwa Lesa? Yesu walumbulwile’mba kajibumba kacheche, ko kuba’mba “kajitanga kacheche” ka bantu ba kishinka bo babena kuba bino. Mu kuya kwa kimye, kyasolokele kuba’mba bakekalatu 144,000. Ñanyi kintu kyo bakebapa? Yesu wibalayile’mba: “Shenu wimutongwela kwimupa Bufumu.” Bano kechi bata muchima pa kwikala na nsabo pano pa ntanda paji bangivi beba ne. Abo batatu muchima pa “nsabo ibula kupwa mwiulu,” mo bakalamanga pamo ne Kilishitu.—Luka 12:32-34.