Bufuku bwapeleleko kwikala na batumwa banji, Yesu wibambijile’mba: “Byo nkasangulwa, nkatangilako ku Ngalilea.” (Mateo 26:32; 28:7, 10) Baana banji ba bwanga bavula baimene lwendo kuya ku Ngalilea. Bayilenga na kuba ka?

Petelo wabuujile batumwa bakwabo batanu na umo amba: “Naya na kukwata masabi.” Abo bamwambijile’mba: “Ne atweba tubena kuya nobe.” (Yoano 21:3) Bufuku bonse kechi bakwachilepo nangwa jimotu ne. Byo bwayilenga na kukya, Yesu wamwekele ku kitulu, pakuba batumwa kechi bamuyukile’mba ye iye ne. Yesu wabijikile’mba: “Anweba baana, nanchi muji na kajo ka kuja nyi?” Abo bakumbwile’mba: “Ine!” Yesu wibambijile’mba: “Telai bukonde ku kilujo kya bwato kabiji musakukwatapo amo.” (Yoano 21:5, 6) Mwafwile masabi avula bingi kya kuba bakankelwe kukokela bukonde mu bwato.

Yoano wabuujile Petelo amba: “Nkambo wa!” (Yoano 21:7) Petelo bukiji bukiji wavwajile kivwalo kyanji kya peulu kyo avujile kimye kyo akwachilenga masabi. Witayile pa kalunga ne kufwenka pa mema mamita 90 kuya ku kitulu. Bino baana ba bwanga bakwabo baishilenga mu bwato saka bakoka bukonde bwayujile masabi.

Byo batuntukile, bamwene “mujilo wa mashanga ne jisabi saka jiji peulu, ne shinkwa.” Yesu wibambijile’mba: “Letai masabi amo o mwakwata.” Petelo wakokele bukonde bwayujile masabi akatampe 153. Yesu wibambijile’mba: “Iyai mwiaule.” Kafwako nangwa umo wakonsheshe kumushikisha’mba: “Yenu bañanyi?” ne, mambo bayukile’mba ye iye Yesu. (Yoano 21:10-12) Kino kyo kyajinga kimye kya busatu Yesu kumweka ku baana banji ba bwanga bavula.

Yesu wibapele bonse shinkwa ne jisabi kuba’mba baje. Kabiji kyamweka byo atajilenga pa masabi o bakwachile, waipwizhe’mba: “Shimona mwana wa kwa Yoano, nanchi wantemwa kukila ano nyi?” Nanchi Petelo watesheshe muchima pa busulu bwa masabi kukila kwingila mwingilo Yesu ye akebelenga’mba ingilenga nyi? Petelo wamukumbwile’mba: “Ee Nkambo, anweba mwayuka’mba nemutemwa.” Onkao mambo, Yesu wamwambijile’mba: “Jiisha twana twami twa mikooko.”—Yoano 21:15.

Yesu wamwipwizhe ja bubiji amba: “Shimona mwana wa kwa Yoano, nanchi wantemwa nyi?” Kampe Petelo wakuminye, bino wamukumbwile na muchima yense amba: “Ee Nkambo, anweba mwayuka’mba nemutemwa.” Yesu wamwambijile byambo bipasha na byo amwambijile patanshi amba: “Funganga twana twami twa mikooko.”—Yoano 21:16.

Yesu wamwipwizhe ja busatu amba: “Shimona mwana wa kwa Yoano, nanchi wantemwa nyi?” Kyamweka pa kikye kimye Petelo walangulukilenga’mba kampe Yesu ubena kuzhinauka bukishinka bwanji. Petelo wakumbwile na bulanda amba: “Nkambo, mwayuka bintu byonse; kabiji mwayuka’mba nemutemwa.” Kabiji Yesu wabwezhezhepo jikwabo kwamba pa mwingilo wafwainwe kwingila Petelo amba: “Jiisha twana twami twa mikooko.” (Yoano 21:17) Kya kine, aba batangijila, bafwainwa kwingijila boba Lesa bo abena kuleta mu jitanga janji.

Yesu bamukashile ne kumwipaya na mambo a kwingila mwingilo Lesa ye amukambizhe. Pano Yesu wasolwele’mba Petelo ukapita mu bya malwa bintutu bimo. Yesu waambile’mba: “Byo wakijinga mwanyike, wavwalanga ne kuya konse ko wakebanga kuya. Bino byo ukakota, ukatanyikanga maboko obe ne muntu mukwabo ukakuvwikanga ne kukutwala ko ukabulanga kukeba kuya.” Bino Yesu wamutundaikile’mba: “Twajijila kundondela.”—Yoano 21:18, 19.

Petelo byo amwene Yoano washikishe’mba: “Nkambo, nga uno muntu kikekala byepi?” Ñanyi bintu uno mutumwa ye batemenwe bingi kwi Yesu byafwainwe kuba kulutwe? Yesu wakumbwile’mba: “Umvwe kyo kyaswa muchima wami kuba’mba ekale posotu ne byo nkeya, pano obewa waakaminwa ka?” (Yoano 21:21-23) Petelo wafwainwetu kulondela Yesu kwa kubula kwakamwa pa bikobanga bakwabo. Pano bino, Yesu walumbulwilenga’mba Yoano ukekala myaka yavula kukila batumwa bakwabo kabiji ukamumwesha kimwesho kya kwa Yesu byo akeya mu bulume bwa Bufumu.

Kuji ne bintu byavula bingi byaubile Yesu, bino kafwako mivungilo yo bafwainwe kwibinembamo byonse ne.