Byo papichile bañondo nobe batanu na umo kufuma kimye Yoano Mubatizhi kyo atatwile kusapwila, Yesu wayile kwi aye ku Mukola wa Yodano saka aji na myaka nobe 30. Wayile na kuba ka? Yesu kechi wayiletu na kupempula Yoano nangwa kukebatu kumona byaendelenga mwingilo wanji ne. Yesu wayile ku Yodano kuba’mba bamubatizhe kwi Yoano.

Pakuba Yoano wamukanyijile’mba: “Anweba yenu mwafwainwa kumbatizha, nanchi mwaiya kwi amiwa amba nemubatizhe nyi?” (Mateo 3:14) Yoano wayukile’mba Yesu Mwana Lesa. Vulukai kuba’mba Yoano wafunkile munda mwa inanji na lusekelo kimye Maliya saka aimita Yesu kyo apempwile inanji Yoano aye Elisabeta. Kwa kubula nangwa kuzhinaukatu ne, Yoano bamubuujile kino kwi inanji. Kabiji kyamweka wamubuujile ne byambo byaambile malaika bya kusemwa kwa kwa Yesu ne byamwekele bamalaika ku bakafunga bufuku bwa juba jasemekelwe Yesu.

Onkao mambo, Yoano wayukile’mba kechi wafwainwe kubatizha Yesu ne, mambo luno lubatizhilo lwajinga lwa boba balapila ku bundengamambo bwabo. Pano bino, Yesu kechi walengelepo mambo ne. Nangwa kya kuba Yoano wakaine, Yesu wakoselepotu na kumwambila’mba: “Leka kikale byonka bino, mambo kitufwainwa kufikizha akya kyakeba Lesa.”—Mateo 3:15.

Mambo ka Yesu o afwainwe kubatizhiwa? Lubatizhilo lwa kwa Yesu kechi lwajinga kiyukilo kya kulapila ku bundengamambo ne. Bino, lubatizhilo lwanji lwamwesheshe kuba’mba wipana aye mwine kuba kyaswa muchima wa Shanji. (Bahebelu 10:5-7) Yesu wajinga kalipentala, pano kimye kyafikile kya kutatula kwingila mwingilo Shanji wa mwiulu ye amutumijile pano pa ntanda. Nanchi mwalanguluka’mba Yoano waketekejile kumona kintu kya kukumya pa kubatizha Yesu nyi?

Palutwe kacheche, Yoano waambile’mba: “Awa yenka wantumine na kubatizha mu mema, wañambijile’mba: ‘Yenka ye ukamona saka bamwikijila ku mupashi ne kwikala pe aye, uno ye ukabatizhanga na mupashi wazhila.’” (Yoano 1:33) Onkao mambo, Yoano waketekejilenga mupashi wa Lesa kwiya pa muntu ye abatizhe. Byonkabyo, Yesu byo atuntukile mu mema, Yoano kechi wakuminye pa kumona “mupashi wa Lesa saka ekila pe [Yesu] nobe nkunda” ne.—Mateo 3:16.

Kuji ne bintu bikwabo byamwekele kimye kyabatizhiwe Yesu. “Jiulu jashinkukile.” Kino kyalumbulula ka? Kyamweka kino kilumbulula’mba kimye Yesu kyo  abatizhiwe, wavulukile bwikalo bwanji byo bwajinga mwiulu saka akyangye kwiya pano pa ntanda. Onkao mambo, Yesu wavulukile byo ajinga saka aji mwana wa kwa Yehoba wa ku mupashi, kuvwangakotu ne bukine Lesa bo amufunjishe mwiulu saka akyangye kwiya pano pa ntanda.

Kunungapo, Yesu kimye kyo abatizhiwe, jiwi jafumine mwiulu amba: “Uno ye Mwanami ye natemwa, mo mmwena lusekelo.” (Mateo 3:17) Jino jiwi jajinga ja kwa ñanyi? Kechi jajinga jiwi ja kwa Yesu ne, mambo wajinga ponkapa ne Yoano. Jajinga jiwi ja Lesa. Kine, Yesu mwana Lesa. Yesu kechi ye Lesa ne.

Byo ajinga muntu pano pa ntanda wajinga mwana Lesa byonkatu byajinga muntu mutanshi Adama. Panyuma ya kulumbulula lubatizhilo lwa kwa Yesu, mwana wa bwanga aye Luka wanembele’mba: “Yesu byo atendekele mwingilo wanji, wajinga na myaka nobe 30, kyayukanyikilwe amba mwana wa kwa Yosefwa, mwana wa kwa Heli, . . . mwana wa kwa Davida, . . . mwana wa kwa Abalahama, . . . mwana wa kwa Nowa, . . . mwana wa kwa Adama, mwana wa kwa Lesa.”—Luka 3:23-38.

Byonka Adama byo ajinga “mwana wa kwa Lesa,” ne Yesu byo byo ajinga. Nangwa byonkabyo, kimye kyo abatizhiwe, Yesu watwelele mu bulunda bupya na Lesa ne kwikala Mwana Lesa wa ku mupashi. Onkao mambo, Yesu wafikijilemo kufunjisha bukine bwa Lesa ne kumwesha bantu jishinda ja ku bumi. Yesu watendekele kunengezha jishinda jo akapainamo bumi bwanji kwikala kitapisho kya bantu bandengamambo.