Panyuma ya Kijiilo kya Lupitailo mu kimye kya mwela wa mebele mu 30 C.E., Yesu ne baana banji ba bwanga bafumine mu Yelusalema. Pano bino, kechi babwelele ku mazubo abo mu Ngalilea ne. Bayile ku kyalo kya Yudea ko bakabatizhe bantu bavula. Yoano Mubatizhi waingijile uno mwingilo nobe mwaka umo, kabiji wakijinga ne na baana ba bwanga bo aingijilenga nabo kampe ku musezho wa Mukola wa Yodano.

Yesu kechi ye wabatizhenga bantu ne, bino baana banji ba bwanga bo babatizhenga monka mo ebabuujijile. Pa kikye kimye, Yesu ne Yoano bafunjishenga Bayudea balapijile ku mambo o balengele a kuzhilulula lulayañano lwa Mizhilo ya Lesa.—Byubilo 19:4.

Bino baana ba bwanga ba kwa Yoano baubile kichima ne kunyinyita pe Yesu amba: “Muntu [Yesu] ye mwajinga nanji . . . ubena kubatizha, ne bonse babena kuya kwi aye.” (Yoano 3:26) Pakuba Yoano kechi waubile kichima ne. Aye wasekejile bingi pa mwingilo wa kwa Yesu kabiji wakebelenga ne baana banji ba bwanga nabo kusekela. Yoano wibavulwilemo’mba: “Anweba mwayuka kushimuna kwami byo nemubuujile namba, ‘Kechi yami Kilishitu ne, bino bantuma kulutwe yanji.’” Kepo aingijishe kino kishimpi kyawama pa kuba’mba ebakwashe kukwatakanya kyo ambilengapo. Waambile’mba: “Awa uji na musongwa ye musongoshi. Nangwa byonkabyo, mulunda wa musongoshi umvwe waimana kwipi na musongoshi ne kumvwa byo abena kwamba, wikala na lusekelo lukatampe na mambo a kumvwa jiwi janji. Onkao mambo, amiwa nasekela bingi.”—Yoano 3:28, 29.

Yoano byo ajinga mulunda wa musongoshi wasekejile bingi kimye kyo atwajile baana banji ba bwanga kwi Yesu saka papita kala ne bañondo bamo. Bamo mwi abo balondejile Yesu kabiji mu kuya kwa kimye bashingilwe na mupashi wazhila. Yoano wakebelenga baana banji ba bwanga kulondela Yesu. Mwingilo wa kwa Yoano wajinga wa kunengezha jishinda ja mwingilo wa kwa Kilishitu. Yoano walumbulwile’mba: “Aye wafwainwa kuyilangako palutwe, pakuba amiwa nafwainwa kubwelanga panyuma.”—Yoano 3:30.

Muntu mukwabo wa jizhina ja Yoano, waikele mwana wa bwanga wa kwa Yesu, wanembele kwafumine Yesu ne mwingilo wanji wa kupulusha bantu. Yoano wanembele’mba: “Awa wafuma mwiulu wakila bantu bonse. . . . Shanji wamutemwa Mwana kabiji wapana bintu byonse mu kuboko kwanji. Awa wamwitabila Mwana ukekala na bumi bwa myaka ne myaka; awa ubula kukookela Mwana kechi ukekala na bumi ne, bino bukaji bwa Lesa bukekala pe aye.” (Yoano 3:31, 35, 36) Buno ke bukine bwanema bingi bwafwainwa kuyuka bantu.

Kufuma kimye Yoano Mubatizhi kyo aambile’mba mwingilo wanji ukabwela panyuma, kechi papichile ne kimye kyabaya ne, bamukashile kwi Mfumu Heloda. Heloda wasongwele Helodyasa muka Filipa kolojanji. Yoano byo amubujile’mba kechi wafwainwa kuba kino ne, Heloda wamutayile Yoano mu kaleya. Yesu byo aumvwine’mba Yoano bamukasa, wafumineko ku Yudea na baana banji ba bwanga ne ‘kuya ku Ngalilea.’—Mateo 4:12; Mako 1:14.