NANCHI mwayukapo mulongo nangwa nyenga wayile na kwingijila ku kyalo kingi kwakepa basapwishi ba Bufumu nyi? Tutela bano Bakamonyi amba bengijila kwakepa basapwishi. Nanchi mwakishikishapo’mba: ‘Ki ka kibalengejile kuya na kwingijila ku kyalo kingi nyi? Benengezha byepi pa kuba’mba bengileko uno mwingilo? Nanchi ne amiwa nakonsha kwingilako nyi?’ Pa kuba’mba mutaane mikumbu ya ano mepuzho, mwafwainwa kwisamba na balongo ne banyenga baingijilapo kuji kukajilwa. Twayai twambeko pa bamo.

Ñanyi bintu bimulengejile kuya na kwingijila ku kyalo kingi kwakepa basapwishi? Umvwai byashimikizha Amy uji na myaka ya mu ma 30 wikala mu United States. Waambile’mba: “Pa myaka yavula, nalangulukanga kuya na kwingijila ku kyalo kingi, bino namwenenga’mba kyakatazha kuba bino.” Ki ka kyamukwashishe kupimpula ndangulukilo yanji? Waambile’mba: “Mu 2004 bamulume ne mukazhi baingijilanga mu Belize bangichile kuya na kwibafwakesha ne kwingila nabo bupainiya pa ñondo umo. Nayile kabiji kino kyandetejile bingi lusekelo. Byo papichile mwaka umo, nayile na kwingila bupainiya ku Ghana.”

Pa myaka yavula, Stephanie uji mu myaka ya mu ma 20 wikala mu United States, walangulukilepo bingi pa byajinga bwikalo bwanji ne kwamba’mba: ‘Kechi nkolwakolwa ne, kabiji kechi njipo na mitembo ya kisemi ne. Nakonsha kwingijilako Yehoba pakatampe.’ Kulanguluka bulongo pa byajinga bwikalo bwanji kwamulengejile kuya na kwingijila ku Ghana. Bamulume ne mukazhi abo ba Filip ne Ida baji mu myaka ya mu ma 60 bekala mu Denmark, bakebelenga bingi kuya na kwingijila ku nyaunda kuji kukajilwa. Bakebelepo mashinda akonsha kwibakwasha kufikizha byo bakebelenga. Ba Filip baambile’mba: “Kimye byo kyafikile, kyajingatu nobe Yehoba ubena  kwitwambila’mba, pano kimye kyafika kya kuya!” Mu 2008 bayile ku Ghana kabiji baingijileko myaka kukila pa isatu.

Bamulume ne mukazhi bakwabo ba Hans ne Brook, bapainiya baji mu myaka ya mu ma 30 babena kwingijila mu United States. Mu 2005, bakwashisheko mu mwingilo wa kukwasha baponenwa na bya malwa byo kwanokele mvula wa kinkunkwila mu Katrina. Palutwe kacheche, batumine nkalata ya kwipuzha inge bakonsha kwingilako mu mwingilo wa buntungi, bino kechi bebakumbwile ne. Hans uvuluka’mba: “Pa kushonkena kwa kijiiji, twatelekele ku jashi jaambilenga pa Mfumu Davida byo babujile kumuswisha kushimika Nzubo ya Lesa, onkao mambo, wafuukwilepo kwingilako mingilo ikwabo. Kino kishinka kitukwashishe kuba’mba kijitu bulongo kupimpula bikonkwanyi byetu.” (1 Moba 17:1-4, 11, 12; 22:5-11) Brook wanungapo’mba: “Yehoba wakebelenga’mba twingileko mwingilo mukwabo.”

Hans ne Brook byo bebashimikizhe bintu byawama ku balunda nabo baingijilepo mu byalo bingi, kibatundaikile bingi kufuukulapo kuya na kwingijila bupainiya mu byalo bingi. Mu 2012, bayile ku Ghana kabiji baingijile bañondo bana, bakwashishengako kipwilo kya mulaka wa kwamba na maboko. Nangwa kya kuba babwelele ku United States, kwingijilako mu Ghana kwibalengejile kwikala na kizaku kya kutangizhako Bufumu mu bwikalo bwabo. Kabiji kufumatu kyokya kimye, bakwashako mu mwingilo wa kutunga musampi wa mu Micronesia.

Mwinengezhezhe byepi pa kuba’mba muye na kwingijila kuji kukajilwa? Stephanie waambile’mba: “Nakebelekebele mitwe yajinga mu Kyamba kya Usopa yaambilenga pa kwingijila kuji kukajilwa. * Kabiji naipwizheko ne bakulumpe mu kipwilo ne kalama wa mwanzo ne mukazhanji pa byo nakebelenga  kuya na kwingijila ku kyalo kingi. Nabuujile ne Yehoba mu milombelo byo nakebelenga kuba.” Kabiji Stephanie wapezhezheko bwikalo bwanji, kino kyamukwashishe kulamapo mali a kukekwashishangamo inge waya ku kyalo kingi.

Hans washimikizha’mba: “Twalombele Yehoba kwitutangijila, mambo twakebelenga kuya ko asakwitubuula. Kabiji twamubuujile ne juba jo twafuukwilepo kuya.” Bano bamulume ne mukazhi batumine makalata ku misampi ina. Byo batambwijile mukumbu kufuma ku musampi wa ku Ghana, bayile na kwingijilako pa bañondo babiji. Hans waambile’mba: “Twajinga bingi na lusekelo kwingijila pamo na kipwilo. Kabiji kino kitulengejile kunungako moba.”

Bamulume ne mukazhi abo ba George ne Adria, baji na myaka ya mu ma 30 bekala mu Canada, bayukile’mba Yehoba upesha bikonkwanyi byawama. Onkao mambo, bebikileko kufikizha kikonkwanyi kyabo. Besambile na nyenga waingijilenga kuji kukajilwa kukatampe ku Ghana ne kumushikisha mepuzho avula. Kabiji batumine makalata ku musampi wa mu Canada ne wa mu Ghana. Adria waambile’mba, “twapezhezheko bwikalo bwetu.” Kuba bino kwibakwashishe kuya ku Ghana mu 2004.

Ñanyi makatazho o mwapichilemo kimye kyo mwayile, kabiji mwaubile byepi? Lukatazho lwajinga ne Amy ke kuvuluka kwabo. Waambile’mba: “Bintu byonse byajingatu byenyi kwi amiwa.” Ki ka kyamukwashishe? Walumbulula’mba: “Kuntumina mafoni ku kisemi ne kumbuula byo bantemenwe pa kwingilako uno mwingilo, kwankwashishe kwingila  bulongo. Palutwe kacheche, twisambanga na ba mu kisemi kwingijisha mavidyo. Mambo a kuba twisambanga na ba mu kisemi saka twimona, kechi bamonanga amba nji kwalepa ne.” Amy washimikizhe’mba kwikala balunda na nyenga wa konkakwa kwamukwashishe kuyuka bisho bya mu kyalo kyo aingijilengamo. Waambile’mba: “Uno nyenga wankwashishe kuyuka kyalengelanga bantu kuba bintu mu jishinda japusanako. Wankwashishe kuyuka bintu byo nafwainwa kuba ne byo nakonsha kuchinuzhuka. Kuba bino kwankwashishe kwingila mwingilo na lusekelo.”

George ne Adria bashimikizhe’mba kimye kitanshi kyo bayile ku Ghana, bamwenenga nobe babwela ku bwikalo bwa kala. Adria waambile’mba: “Kechi twaingijishanga munkinyi pa kuchapa bivwalo ne, bino twaingijishangatu mbekete. Kabiji papitanga maola avula pa kuba’mba kajo kapye. Pano bino, byo papichile kimye, twapijijilwe mu buno bwikalo bwamwekanga kukatazha.” Brook waambile’mba: “Nangwa kya kuba atweba bapainiya tupita mu makatazho, tuji bingi na lusekelo mu bwikalo. Inge ke tuvuluke bintu byawama byo twapitamo, bituletela bingi lusekelo.”

Mambo ka o mwakonsha kutundaikila bakwenu kwingilako uno mwingilo wa Bufumu? Stephanie waambile’mba: “Kusapwila mu nyaunda muji bantu bakeba kwibafunjisha bukine bwa mu Baibolo kimye kyonse kuleta bingi lusekelo. Kuya na kwingijila kuji kukajilwa kukatampe ke kintu kyawama bingi kyo naubile!” Mu 2014, Stephanie wasongwelwe kwi Aaron, kabiji bengijila pa musampi wa ku Ghana.

Christine, painiya uji na myaka ya mu ma 30 wikala mu Germany waambile’mba: “Ke kintu kyawama bingi kwingijila kuji ku kukajilwa.” Christine saka akyangye kuya ku Ghana, waingijilanga mu Bolivia. Wanungilepo’mba: “Nalombanga kimye kyonse Yehoba kunkosesha mambo balongo bami bashajile kwalepa. Yehoba ke mulunda nami wa kine. Kabiji nemwena ne byakwatankana bantu ba Yehoba. Uno mwingilo wandengela kwikala na lusekelo mu bwikalo bwami.” Katatakatu, Christine wasongwelwe kwi Gideon, kabiji babena kwingijila mu Ghana.

Ba Filip ne Ida betubuula byo boba pa kuba’mba bakwashe bo bafunjisha Baibolo kuyilako palutwe. Baambile’mba: “Twaikalanga na bantu ba kufunjisha Baibolo 15 nangwa kukilapo, pano twapelejilengatu pa bantu 10 pa kuba’mba twibafunjishenga bulongo.” Nanchi bantu bo bafunjishenga Baibolo bamwenejilemo nyi? Ba Filip bashimikizha’mba: “Nafunjishanga nsongwalume aye Michael. Twafundanga nanji pa juba pa juba, onkao mambo, twapwishishe buku wa Baibolo Ufunjisha mu ñondotu umo. Palutwe kacheche, Michael waikele musapwishi wabula kubatizhiwa. Juba jitanshi jo ayile mu mwingilo, wangipwizhe’mba: ‘Nanchi mwakonsha kunkwashako kufunjisha bantu bo mfunjisha Baibolo nyi?’ Nakuminye bingi. Michael waambile’mba wajinga na bantu basatu bo afunjishanga, kabiji wakebelenga kumukwashako pa kufunjisha.” Bafunjishi bavula babena kukebewa bingi mambo ne bafunda Baibolo baji na bantu bo bafunjisha Baibolo!

Amy washimikizha byo ayukile’mba kwajinga kukajilwa kukatampe mu Ghana: “Byo twafikiletu mu Ghana, twasapwijile mu muzhi mucheche ne kukebamo bantu bashinka matwi. Twataainemo bantu bashinka matwi batanu na basatu!” Pa kino kimye, Amy wasongolwa kwi Eric kabiji babena kwingijila pamo bupainiya bwiikajila. Bakwashako kipwilo kingijisha mulaka wa kwamba na maboko pa kuba’mba bakwashe basapwishi bashinka matwi kukila pa 300 ne bakeba kufunda Baibolo mu Ghana. George ne Adria bengijila mu Ghana bemwena byawama mwingilo wa bumishonale. Basangalele bingi byo batambwijile nkalata ya kwibeta kuya na kutaanwa ku sukulu wa Gileada wa nambala 126. Lelo jino babena kwingila mwingilo wa bumishonale mu Mozambique.

Kitusangajika bingi pa kumona bavula bafuma mu byalo bingi byo bengijila pamo na balongo ne banyenga mwingilo wa kunowa. (Yoa. 4:35) Inge kwibabanya, ko kuba’mba bantu 120 bo babatizhiwa pa mulungu pa mulungu mu Ghana. Byonka byauba basapwishi 17 babena kwingijila kuji kukajilwa ku Ghana, kutemwa Yehoba ko kulengela basapwishi bavula mwaya ntanda ‘kwipana na muchima yense.’ Bengijila mu mapunzha mubena kukebewa basapwishi ba Bufumu bavula. Bano ba mingilo bepana basangajika muchima wa Yehoba.—Sala. 110:3; Maana 27:11.