1, 2. (a) Lumbululai kishimpi kya kwa Yesu kya mwina bujimi bwa miñanzañanza. (b) Jino jishimikila jamwesha byepi bumpanyi ne lusa lukatampe?

JUBA jimo mwina nzubo wakelejile lukelo pa kisankanyi na kukeba ba mingilo ba kwingila mu bujimi bwanji bwa miñanzañanza. Waumvwañene nabo kwibafweta mali ne abo baswile. Mambo mwina bujimi wakebelenga ba mingilo bakwabo, wayile bimye byavula pa kisankanyi na kukeba ba mingilo. Wibabuujile’mba ukebapa mali ebafwainwa. Byo kyafikile ke mabanga, mwina bujimi waichile ba mingilo kuba’mba ebafwete. Nangwa kya kuba bamo baingijile juba jonse bakwabo jiola jimotu, bino wibapeletu mali aesakana. Pano bino, banabalume baingijile juba jonse byo batendekele kwijizhanya, mwina bujimi wibambijile’mba: ‘Nanchi kechi yo mfweto yo twaji kumvwañana nenyi? Nanchi kechi nji na luusa lwa kupa ba mingilo bami kyo mbena kukeba nenyi? Inyi mwauba lwiso na mambo a kuba’mba nempanyi?’—Mat. 20:1-15, tubyambo twa munshi.

² Jishimikila ja kwa Yesu muji lufunjisho lwanema bingi pa “lusa lukatampe” lwa Yehoba. ^[1] (Tangai 2 Kolinda 6:1.) Mu ñanyi jishinda? Bamo bakonsha kwamba’mba ba mingilo baingijile juba  jonse bafwainwe kutambula mali avula kukila baingijiletu jiola jimo. Bino mwina bujimi wamwesheshe lusa lukatampe ku ba mingilo baingijiletu maola acheche. Shayuka umo walumbulwile byambo bya “lusa lukatampe” biji mu Baibolo amba: “Bino byambo bilumbulula bupe bobapa muntu bo aji kubula kuketekela nangwa kintu kyo bapa muntu kyabula kumufwainwa.”

3, 4. Mambo ka Yehoba o amweshesha lusa lukatampe kabiji waubile byepi bino?

³ Baibolo witubuula’mba lusa lukatampe lwa Lesa ke “bupe.” (Efi. 3:7) Na mambo a kuba’mba tukankalwa kukookela Yehoba mu byonse, kechi twafwainwa lusa lukatampe lwa Lesa ne. Twafwainwatu kufwa. Mfumu Solomone wanembele’mba: “Kafwako muntu nangwa umo pano pa ntanda ubatu byawama kimye kyonse kwa kubula kulengapo mambo ne.” (Sapwi. 7:20) Mu kuya kwa kimye, mutumwa Paulo waambile’mba: “Bonse baleenga mambo kabiji kechi bafika ku lukumo lwa Lesa ne,” ne kuba’mba “mfweto ya bundengamambo lo lufu.”—Loma 3:23; 6:23a.

⁴ Mambo a kuba Yehoba watemwa bingi bantu watumine “Mwananji yenkawa umotu” kwiya kwitufwila. Kino kyamwesheshe lusa lukatampe lwa Lesa. (Yoa. 3:16) Paulo waambile’mba Yesu “luno bamuvwika lukumo ne buneme na mambo a kuba wafwile, pa kuba’mba mu lusa lukatampe lwa Lesa, atompele lufu bantu bonse.” (Hebe. 2:9) Kya kine, “bupe bo apana Lesa ke bumi bwa myaka ne myaka kupichila mwi Kilishitu Yesu Nkambo yetu.”—Loma 6:23b.

5, 6. Ñanyi bintu bifumamo inge ke betutangijile (a) ku bundengamambo? (b) ku lusa lukatampe?

⁵ Mambo ka o tulengela mambo ne kufwa? Baibolo waamba’mba: “Na mambo a mizhilulwila ya muntu umo [Adama], lufu lwalaminenga nobe mfumu.” Na mambo a kuba’mba twi baana ba kwa Adama, twibambulwa kulumbuluka kabiji tufwa. (Loma 5:12, 14, 17) Nangwa byonkabyo, twakonsha kusalapo kwitutangijilanga ku bundengamambo nangwa ne. Kino kyakonsha kubiwa byepi? Umvwe twaitabila mu kitapisho kya bukuzhi kya kwa Kilishitu, tumwenamo mu lusa lukatampe lwa Yehoba. Baibolo waamba’mba: “Bantu byo balengele mambo avula, lusa lukatampe nalo lwavujijileko. Mambo ka? Kuba’mba byonka bundengamambo byo bwalaminenga nobe mfumu pamo ne lufu, ne lusa lukatampe lwa Lesa nalo lulama nobe mfumu mu bololoke ne kutangijila bantu ku bumi bwa myaka ne myaka mwi Yesu Kilishitu.”—Loma 5:20, 21.

⁶ Nangwa kya kuba tukiji bandengamambo, kechi twafwainwa kuleka bundengamambo kwitutangijilanga ne. Onkao mambo, inge twalenga mambo, twafwainwa kulomba Yehoba kwitulekelako mambo. Paulo witujimwineko’mba: “Bundengamambo kechi bwafwainwa kwikala na bunkambo pe anweba ne, mambo kechi mukiji mu mizhilo ne, bino muji mu lusa lukatampe lwa Lesa.” (Loma 6:14) Pano twakonsha kumwenamo byepi mu lusa lukatampe lwa Lesa? Paulo waambile’mba: “Lusa lukatampe lwa Lesa . . . lwitufunjisha kukana byubilo bya bumbulwa kwakamwa Lesa ne bya kusakasaka bya pano pa ntanda kabiji lwitulengela kulanguluka bulongo, ne kwikala baoloka ne kumwesha munema wa kunemeka Lesa mu buno bwikalo.”—Titu. 2:11, 12.

7, 8. Byambo bya kuba’mba lusa lukatampe lwa Lesa “lumwekela mu mashinda apusana pusana” bilumbulula ka? (Monai bipikichala bitanshi.)

⁷ Mutumwa Petelo wanembele’mba: “Monka muntu yense mo atambwijile kya bupe, ekingijishenga  kukwashishamo bakwabo byo aji kalama wa lusa lukatampe lwa Lesa lumwekela mu mashinda apusana pusana.” (1 Pe. 4:10) Byambo bya kuba’mba lusa lukatampe lwa Lesa “lumwekela mu mashinda apusana pusana” bilumbulula ka? Bilumbulula’mba inge ketupite mu makatazho apusana pusana mu bwikalo, Yehoba uketupa bikebewa pa kuba’mba tuchinchike. (1 Pe. 1:6) Kimye kyonse uketupanga byonse byo tukeba pa kuba’mba tuchinchike meseko.

⁸ Mutumwa Yoano wanembele’mba: “Atweba bonse witubijile lusa lukatampe lwavula.” (Yoa. 1:16) Na Mambo a kuba’mba Yehoba umwesha lusa lukatampe mu mashinda apusana pusana, tumwenamo bingi. Ñanyi bintu byo tumwenamo?

9. Tumwenamo byepi mu lusa lukatampe lwa Yehoba, kabiji twakonsha kumwesha byepi amba tumusanchila?

⁹ Yehoba witulekelako mambo. Tumusanchila bingi Yehoba pa lusa lwanji lukatampe, mambo witulekelako mambo etu. Pano ubatu bino inge twalapila ne kutwajijila kukana miteeto ya bundengamambo. (Tangai 1 Yoano 1:8, 9.) Paulo walumbulwijile bena Kilishitu bashingwa bajingako mu kimye kyanji Yehoba byo alekelako mambo. Waambile’mba: “[Yehoba] witupokolwele ku luusa lwa mfishi ne kwitutwala mu bufumu bwa Mwananji ye atemwa, na mambo a aye betukuula na bukuzhi, ko kuba’mba kwitulekelako mambo etu.” (Kolo. 1:13, 14) Tumusanchila bingi Lesa pa lusa lwanji kya kuba tukeba kumutota. Mambo a kuba Yehoba witulekelako mambo, twakonsha kumwenamo bintu bikwabo byawama bingi.

10. Ñanyi bintu byo tumwenamo mu lusa lukatampe lwa Lesa?

¹⁰ Twakonsha kwikala na bulunda bwawama na Lesa. Twibambulwa kulumbuluka, onkao mambo, inge twasemwatu twikala balwanyi ne Lesa. Pano bino, Paulo waambile’mba: “Byo twakijinga balwanyi twapwaine ne Lesa kupichila mu lufu lwa Mwananji.” (Loma 5:10) Na mambo a bukuzhi, tupwana ne Lesa, ko kuba’mba twikala balunda na Lesa. Paulo walumbulwile kino byo kyakwatankana na lusa lukatampe lwa Yehoba byo aambijile balongo bashingwa’mba: “Byo twatelwa’mba baoloka na mambo a lwitabilo, twayai twikalenga mu mutende ne Lesa monka mwi Nkambo yetu Yesu Kilishitu, na mambo a kumwitabila, jishinda jitushinkukila ja kubilwa lusa lukatampe lwa Lesa lo tubena kubilwa lonka luno.” (Loma 5:1, 2) Tusanta bingi pa kwikala balunda na Yehoba.

11. Bashingwa baleta byepi “mikooko ikwabo” mu bololoke?

¹¹ Twikala baoloka mu meso a Lesa. Ngauzhi Danyela wanembele’mba mu kimye kya ku mpelo, “aba baji na maana,” ko kuba’mba bashingwa, bakaleta “bavula ku bololoke.” (Tangai Danyela 12:3.) Bashingwa boba byepi bino? Basapwila mambo awama ne kufunjisha “mikooko ikwabo” yavula. (Yoa. 10:16) Bebakwasha kwikala baoloka mu meso Lesa, kabiji kino kyakonsheka na mambo a lusa lukatampe lwa Yehoba. Paulo walumbulwile’mba: “Kino ke bupetu byo ebatela’mba baoloka na mambo a lusa lwanji lukatampe [lwa Lesa] kupichila mu bukuzhi bwapaine Kilishitu Yesu.”—Loma 3:23, 24.

12. Lulombelo lwakwatankana byepi na lusa lukatampe lwa Lesa?

¹² Tufwenya kwipi na Lesa mu lulombelo. Na mambo a lusa lwanji lukatampe, twakonsha kulomba kwi Yehoba. Paulo watelele jitanda ja Yehoba amba, “jitanda ja lusa lukatampe,” kabiji Lesa witubuula kumusolomoka “saka twakasuluka pa kwamba.”  (Hebe. 4:16a) Twakonsha kulomba kimye kyonse kwi Yehoba kupichila mwi Yesu. Uno ke munema mukatampe bingi. Paulo waambile’mba: “Atweba twakasuluka pa kwamba kabiji tusolomoka Lesa na luketekelo na mambo a lwitabilo mwi aye.”—Efi. 3:12.

13. Lusa lukatampe lwa Lesa lwakonsha “kwitukwasha byepi pa kimye kyafwainwa”?

¹³ Twakonsha kutaana bukwasho pa kimye kyafwainwa. Paulo witutundaika kulomba kwi Yehoba kimye kyonse “pa kuba’mba betubile kifyele ne lusa lukatampe lwa kwitukwasha pa kimye kyafwainwa.” (Hebe. 4:16b) Inge ketupite mu meseko nangwa makatazho mu bwikalo bwetu, twakonsha kulomba bukwasho bwa Yehoba. Kabiji ukumbula milombelo yetu nangwa kya kuba kechi kibena kukebewa kuba bino ne. Javula wingijisha balongo ne banyenga kwitukwasha. Yehoba ukumbula milombelo yetu “kuba’mba tukose ne kwamba’mba: ‘Yehoba ye nkwasho wami; kechi nakonsha kuchina ne, muntu angube ka?’”—Hebe. 13:6.

14. Tumwenamo byepi mu lusa lukatampe lwa Yehoba?

¹⁴ Lesa witutekenesha. Kyawama bingi kuba’mba Yehoba witutekenesha inge twaikala na binyenge. (Sala. 51:17) Kimye bena Kilishitu mu Tesalonika kyo bebamanyikilenga, Paulo wanembele’mba: “Aye Nkambo yetu Yesu Kilishitu ne Lesa Shetu, yenka witutemwa kabiji witupele lutekenesho lwa myaka ne luketekelo lwawama mu lusa lwanji lukatampe, atekeneshenga michima yenu ne kwimukosesha.” (2 Tesa. 2:16, 17) Kitutekenesha bingi pa kuyuka’mba Yehoba witutemwa ne kwituta muchima.

15. Na mambo a lusa lukatampe lwa Lesa, ñanyi luketekelo lo tuji nalo?

¹⁵ Tuji na luketekelo lwa bumi lwa myaka ne myaka. Mambo twibandengamambo, kechi twakonsha kwikala na luketekelo kwa kubula bukwasho bwa Yehoba ne. (Tangai Salamo 49:7, 8.) Bino Yehoba witupa luketekelo lwawama. Ñanyi luketekelo? Yesu waambile’mba: “Kino kyo kyaswa muchima wa Batata, kuba’mba  yense wayuka Mwana ne kumwitabila, akekale na bumi bwa myaka ne myaka.” (Yoa. 6:40) Onkao mambo, tuji na luketekelo lwa kwikala na bumi bwa myaka ne myaka na mambo a lusa lukatampe lwa Lesa. Paulo waambile’mba: “Lusa lukatampe lwa Lesa lwamweka kabiji lwaleta lupulukilo ku bantu bonse.”—Titu. 2:11.

16. Bena Kilishitu bamo batanshi baingijishe byepi kutama lusa lukatampe lwa Lesa?

¹⁶ Tubilwa bibusa byavula na mambo a lusa lukatampe lwa Yehoba. Nangwa byonkabyo, kechi twafwainwa kwingijishanga lusa lukatampe lwa Lesa kubilamo bubi ne. Pa bena Kilishitu batanshi, pajinga bamo ‘baalwile lusa lukatampe lwa Lesa ke mwa kubila byubilo bya kwizozola.’ (Yuda 4) Bano bena Kilishitu babujile bukishinka kyamweka balangulukilenga’mba bafwainwa kulengatu mambo kabiji Yehoba ukebalekelangakotu mambo. Kabiji baongwelenga bakwabo nabo kuba’mba bobenga byo baubilenga. Ne lelo jino, bantu boba bino babena “kuba mwenga mupashi wa lusa lukatampe.”—Hebe. 10:29.

17. Ñanyi lujimuno Petelo lo apaine?

¹⁷ Satana ulengela bena Kilishitu bamo kulanguluka’mba bakonsha kulenga mambo kabiji amba Yehoba wibalekelako mambo nangwa kya kuba kechi balapila ne. Ibyo kuba’mba Yehoba waswila jimo kulekelako bandengamambo balapila, bino ukeba’mba twibikengako kuleka miteeto yatama. Yehoba watangijile Petelo kunemba’mba: “Onkao mambo, anweba batemwe, byo mwayukila jimo bino bintu, jimukai pa kuba’mba babule kwimutwala mungi na byubilo byatama bya bantu ba mizhilulwila ne kwimulengela kubula kushikimana bulongo. Pakuba komainga mu lusa lukatampe lwa Nkambo yetu kabiji Mupulushi aye Yesu Kilishitu ne kumuyuka.”—2 Pe. 3:17, 18.

18. Ñanyi mwingilo ye tuji nanji na mambo a lusa lukatampe lwa Yehoba?

¹⁸ Tusanchila bingi Yehoba pa lusa lwanji lukatampe. Onkao mambo, twafwainwa kwingijishanga bya bupe byetu kunemeka Yehoba ne kukwasha bantu. Ye mwingilo wetu. Twakonsha kwingijishanga byepi bino bya bupe? Paulo waambile’mba: “Byo tuji na bya bupe byapusana pusana byo betupa monka mwayila lusa lukatampe lwa Lesa lo etumwesheshe, . . . umvwe kya mwingilo, tutesheko muchima kumwingila; nangwa awa ufunjisha, naye atesheko muchima konka ku kufunjisha kwanji; kabiji awa utundaikañana atesheko muchima ku kutundaikañana kwanji; . . . ne yewa uba lusa, naye elubenga na lusekelo.” (Loma 12:6-8) Onkao mambo, na mambo a lusa lukatampe lwa Yehoba twafwainwa kwingilanga na ngovu mwingilo wa kusapwila, kufunjisha bantu Baibolo, kutundaika balongo ne banyenga ne kulekelako bonse betulenga mambo.

19. Ñanyi mwingilo ye tukesambapo mu mutwe walondelapo?

¹⁹ Byo betubila lusa lukatampe kwi Yehoba, twafwainwa kwibikako “kushimuna bulongo mambo awama a lusa lukatampe lwa Lesa.” (Byu. 20:24) Tukesamba pa uno mwingilo mu mutwe walondelapo.