1, 2. Mutumwa Paulo wamwesheshe byepi amba wasanchijile Lesa pa lusa lwanji lukatampe?

MUTUMWA Paulo waambile’mba: “Lusa lwa [Lesa] lukatampe lo ammwesheshe kechi lwatutu ne.” (Tangai 1 Kolinda 15:9, 10.) Paulo wayukile’mba lusa lukatampe lwa Lesa kechi lwamufwainwe ne. Wamanyikanga bena Kilishitu.

² Byo ajinga pepi kufwa, Paulo wanembejile Timoti amba: “Namusanchila Kilishitu Yesu Nkambo yetu, wampele bulume, mambo wammwene’mba ne wa kishinka kupichila mu kumpa mwingilo.” (1 Timo. 1:12-14) Wajinga ñanyi mwingilo? Paulo wabuujile bakulumpe mu kipwilo kya mu Efisesa amba: “Kechi natesha muchima ku bumi bwami nobe kyo kintu kyanema ne, bino kyo mbena kukebesha ke kupwisha kikonkwanyi kyami ne mwingilo ye natambwile kwi Nkambo Yesu wa kushimuna bulongo mambo awama a lusa lukatampe lwa Lesa.”—Byu. 20:24.

3. Ñanyi mwingilo wanema ye bapele Paulo? (Monai kipikichala kitanshi.)

 ³ Ñanyi “mambo awama” asapwilanga Paulo, kabiji amwesheshe byepi lusa lukatampe lwa Yehoba? Paulo waambijile bena Kilishitu mu Efisesa amba: “Mwaumvwa pa mambo a bukalama bo bampele bwa lusa lukatampe lwa Lesa na mambo a anweba.” (Efi. 3:1, 2) Yesu waambijile Paulo kusapwila mambo awama ku boba babujile Bayudea. Kino kyo kimye bantu ba mu bisaka bikwabo po baikele lubaji lwa Bufumu bukalamwanga ne Mesiasa. (Tangai Efisesa 3:5-8.) Paulo wasapwijilenga na mukoyo kabiji bena Kilishitu nabo byo byo bafwainwa kubanga. Wamwesheshe’mba lusa lukatampe lwa Lesa “kechi lwatutu” nangwa’mba lwamonaikijiletu ne.

4, 5. Mambo ka o twafwainwa kwambila’mba “mambo awama a Bufumu” o mambo awama a “lusa lukatampe lwa Lesa”?

⁴ Mu kino kimye kya ku mpelo, bantu ba Yehoba baji na mwingilo wa kusapwila “mambo awama a Bufumu . . . pano pa ntanda ponse kwikala bukamonyi ku bisaka byonse bya bantu.” (Mat. 24:14) Mambo awama a Bufumu atelwa ne kuba’mba “mambo awama a lusa lukatampe lwa Lesa.” Mambo ka o kyaikela bino? Bufumu bwa Lesa buketubila bintu byawama na mambo a lusa lukatampe lwa Yehoba. (Efi. 1:3) Paulo wamwesheshe kusanta pa lusa lukatampe lwa Yehoba kupichila mu kusapwila na mukoyo. Nanchi tubena kulondela byaubilenga Paulo nyi?—Tangai Loma 1:14-16.

⁵ Mu mutwe wafumako, twafunjile atweba bandengamambo byo tumwenamo mu lusa lukatampe lwa Yehoba mu mashinda avula. Na mambo a kuba’mba twamwenamo bingi, tuji na mwingilo wa kufunjisha bantu Yehoba byo amwesha butemwe bwanji bubula kwaluka ne byo bakonsha kumwenamo. Mu ñanyi mashinda mo twakonsha kukwashisha bantu kusanchila Lesa pa lusa lwanji lukatampe?

6, 7. Tusampanya byepi mambo awama a lusa lukatampe lwa Lesa inge twalumbulwila bantu bukuzhi?

⁶ Lelo jino, bantu bavula kechi bezhachisha inge balenga mambo ne, onkao mambo, kechi bayuka ene mambo bantu o bakebela bukuzhi ne. Bantu bavula kechi bayuka bundengamambo byo buji, byo bwitulengela kwikala ne byo twafwainwa kuba pa kuba’mba tufume mu buzha bwa bundengamambo ne, kanatu besambapo na Bakamonyi ba kwa Yehoba. Inge bayuka biji bundengamambo, bantu ba kishinka basanta bingi pa kufunda’mba Yehoba watumine Mwananji pano pa ntanda kwiya na kwitukuula ku bundengamambo ne lufu. Yehoba waubile bino na mambo a butemwe ne lusa lwanji lukatampe.—1 Yoa. 4:9, 10.

⁷ Akimonai byaambile Paulo pa Mwana wa Yehoba ye atemwisha amba: “Na mambo a aye [Yesu] betukuula na bukuzhi bwa mashi anji, ko kuba’mba, kwitulekela mambo pa mizhilulwila yetu, monka mwayila kuvula kwa lusa lwanji [Yehoba] lukatampe.” (Efi. 1:7) Kitapisho kya bukuzhi kya Kilishitu kimwesha Lesa byo etutemwa ne lusa lwanji lukatampe. Kitutekenesha bingi inge twaitabila mu kitapisho kya kwa Yesu, mambo etu akalekelwa kabiji tukekala na jiwi ja mu muchima jatoka. (Hebe. 9:14) Ano  ke mambo awama o twafwainwa kubuulako bantu.

8. Mambo ka bandengamambo o bafwainwa kupwaina ne Lesa?

⁸ Inge bantu babula kwitabila mu kitapisho kya kwa Yesu, Lesa wibamona’mba balwanyi. Onkao mambo, tuji na mwingilo wa kwibakwasha kuyuka’mba bakonsha kwikala balunda na Lesa. Mutumwa Yoano wanembele’mba: “Awa wamwitabila Mwana ukekala na bumi bwa myaka ne myaka; awa ubula kukookela Mwana kechi ukekala na bumi ne, bino bukaji bwa Lesa bukekala pe aye.” (Yoa. 3:36) Tuji bingi na lusekelo na mambo a kuba’mba kitapisho kya Kilishitu kitulengela kwikala balunda na Lesa. Paulo walumbulwile’mba: “Anweba kala mwajingatu bangi kabiji balwanyi na mambo a kuba mwalangulukangatu pa mingilo yatama, pano wimupwanya kupichila mu mubiji wa yewa wipaine mwine ku lufu.”—Kolo. 1:21, 22.

9, 10. (a) Ñanyi mwingilo Kilishitu ye apele balongo banji bashingwa? (b) “Mikooko ikwabo” ikwasha byepi bashingwa?

⁹ Kilishitu wapa balongo banji bashingwa baji pano pa ntanda “mwingilo wa kupwainyamo bantu.” Paulo wibabuujile’mba: “Bintu byonse byafuma kwi Lesa, yenka witupwainye kwi aye mwine kupichila mwi Kilishitu kabiji witupele mwingilo wa kupwainyamo bantu, ko kuba’mba kupichila mwi Kilishitu Lesa wapwainye ba pano pa ntanda kwi aye mwine, kwa kubula kutongola mizhilulwila yabo kabiji witupele byambo bya kupwainyamo bantu. Onkao mambo, atweba twi bantomesha bemenako Kilishitu uba nobe Lesa ubena kwimusashijila kupichila mwi atweba. Byo tuji ba kwimenako Kilishitu tusashijila bantu namba: ‘Pwanai na Lesa.’”—2 Ko. 5:18-20.

¹⁰ Ke kintu kyawama bingi “mikooko ikwabo” kukwasha bashingwa mu uno mwingilo. (Yoa. 10:16) Byo baji “bantomesha” nangwa’mba baluwe ba kwa Kilishitu, “mikooko ikwabo” ibena kwingila lubaji lwabaya lwa mwingilo wa kusapwila, kufunjisha bantu bukine ne kwibakwasha kwikala balunda na Yehoba. Luno lo lubaji lwanema lwa mwingilo wa kusapwila mambo awama a lusa lukatampe lwa Lesa.

11, 12. Mambo ka o kyawamina bantu kufunda bya kulomba kwi Yehoba?

¹¹ Bantu bavula balomba mambo kibalengela kumvwa bulongo, bino kechi baitabila’mba Lesa umvwa milombelo ne. Bafwainwa kuyuka’mba Yehoba ‘umvwa milombelo.’ Nyimbi wa masalamo wanembele’mba: “Anweba mumvwa milombelo, bantu ba mitundu yonse bakeya kwi anweba. Bubi bwami bwamvujila, bino anweba muvweta pa mizhilulwila yetu.”—Sala. 65:2, 3.

¹² Yesu waambijile baana banji ba bwanga amba: “Umvwe mwalomba kintu mu jizhina jami, nkekyuba.” (Yoa. 14:14) Kino kilumbulula’mba twakonsha kulomba “kintu” kyonse monka mwayila kyaswa muchima wa Yehoba. Yoano wanembele’mba: “Luno lo luketekelo lo tuji nalo mwi aye amba kintu kyonse kyo twakonsha kumulomba mwayila kyaswa muchima wanji, aye witumvwa.” (1 Yoa. 5:14) Kyawama bingi kukwasha bantu kuyuka’mba lulombelo kechi lukwashatu muntu kukasuluka ne, bino ke jishinda ja kusolomokelamo “jitanda ja lusa  lukatampe” lwa Yehoba. (Hebe. 4:16) Inge twafunjisha bantu bya kulomba mu jishinda jawama, kubula kulomba kuba lesa bangi ne kulomba pa bintu byafwainwa, twibakwasha kwikala balunda ba Yehoba ne kutaana lutekenesho inge ke bamaname.—Sala. 4:1; 145:18.

13, 14. (a) Ñanyi bintu byawama Yehoba byo akobila bashingwa? (b) Ñanyi mwingilo bashingwa ye bakobila bantu?

¹³ Yehoba ukamwesha lusa lukatampe lwavula “mu bwikalo bukeya.” Ukoba byepi bino? Lesa ukobila ba 144,000 bakalamanga pamo ne Kilishitu mwiulu bintu byawama bingi. Paulo walumbulwile bino bintu byo anembele’mba: “Lesa byo aji na lusa lwavula ne butemwe bwanji bukatampe bo etutemenwe, witusangwile kwikala bomi pamo ne Kilishitu nangwa kya kuba twafwile mu mizhilulwila yetu, bino bemupulusha na mambo a lusa lukatampe lwa Lesa. Kabiji witusangwile pamo ne aye ne kwitwikazha pamo ne Kilishitu Yesu mu mapunzha a mwiulu, pa kuba’mba mu bwikalo bukeya akamweshe kuvula kwa lusa lwanji lukatampe kupichila mu bibusa byanji byo etubila atweba tuji mwi Kilishitu Yesu.”—Efi. 2:4-7.

¹⁴ Kyakatazha bingi kuyuka bintu byawama Yehoba byo anengezhezha bena Kilishitu bashingwa kimye kyo bakalamanga pamo ne Kilishitu mwiulu. (Luka 22:28-30; Fili. 3:20, 21; 1 Yoa. 3:2) Yehoba ‘ukamwesha kuvula kwa lusa lwanji lukatampe’ ku bashingwa. Bakekala “Yelusalema Mupya,” ko kuba’mba musongwa wa Kilishitu. (Lum. 3:12; 17:14; 21:2, 9, 10) Bakengijila pamo ne Yesu mwingilo wa ‘kubuka bisaka bya bantu.’ Bakapokolola bantu ku bundengamambo ne lufu ne kwibakwasha kwikala balumbuluka.—Tangai Lumwekesho 22:1, 2, 17.

15, 16. Yehoba ukamwesha byepi lusa lwanji lukatampe ku “mikooko ikwabo” kulutwe?

¹⁵ Efisesa 2:7 waamba’mba Lesa ukamwesha lusa lukatampe “mu bwikalo bukeya.” Pa kyo kya kimye, bantu bonse pano pa ntanda bakemwena “kuvula kwa lusa lwanji lukatampe.” (Luka 18:29, 30) Kabiji jishinda janema Yehoba jo akamwesheshamo lusa lwanji lukatampe ke kusangula bantu kufuma ‘mu bilende.’ (Yoba 14:13-15; Yoa. 5:28, 29) Bañanyi bakasangulwa? Banabalume ne banabakazhi ba kishinka bafwile Kilishitu saka akyangye kufwa kabiji ne ba “mikooko ikwabo” bafwa ba kishinka kwi Yehoba mu moba a kupelako. Abano bonse bakebasangula pa kuba’mba bakatwajijile kwingijila Yehoba.

¹⁶ Bantu bavula bafwile kwa kubula kuyuka Lesa nabo bakebasangula. Yoano wanembele’mba: “Namwene bantu bafwile bakatampe ne bacheche saka baimana kulutwe ya jitanda, kabiji mivungilo beivungulwile. Bino muvungilo mukwabo bamuvungulwile; uno ye muvungilo wa bumi. Bafwa bebachibijile mambo monka mwayijile mingilo yabo kwesakana na bintu byanembelwe mu mivungilo. Kabiji kalunga ka mema kasolwele bantu bafwijilemo, ne lufu ne Kilende byasolwele bafu bajingamo, kabiji bebachibijile mambo pa muntu pa muntu monka mwayijile byubilo byabo.” (Lum. 20:12, 13) Bantu bo bakasangula bakebapa kimye kya kufunda pe Yehoba ne kuswa bukalama bwanji. Bakakebewa kufunda ne kulondela mafunde a mu Baibolo ne mikambizho ya katataka ikekala “mu  mivungilo.” Ino mikambizho ya katataka jo jishinda jikwabo Yehoba jo akamwesheshamo lusa lukatampe.

17. Ñanyi bintu byo twafwainwa kuvulukanga kimye kyo tubena kusapwila?

¹⁷ Kino kyo kimye kyo twafwainwa kwingilako pakatampe mwingilo wa kusapwila mambo awama a Bufumu, mambo mpelo ijitu pepi. (Mako 13:10) Twafwainwa kuvulukanga’mba ene mambo o tusapwila mambo awama ke kunemeka Yehoba. Twakonsha kuba byepi bino? Twafwainwa kubulanga bantu bintu byawama byo tukeyowa mu ntanda ipya bikeyako na mambo a lusa lukatampe lwa Yehoba.

18, 19. Tutumbijika byepi lusa lukatampe lwa Yehoba?

¹⁸ Pa kusapwila bantu, twakonsha kulumbulula’mba Bufumu bwa kwa Kilishitu bubena kulama, kabiji amba bantu bakamwenamo bingi mu bukuzhi ne kwikala balumbuluka. Baibolo waamba’mba: “Bilengwa bikapokololwe ku buzha bwa bubole ne kwikala na bwana bwa bene bwa lukumo lwa baana ba Lesa.” (Loma 8:21) Bino bikobiwa na mambo a lusa lukatampe lwa Yehoba.

¹⁹ Tuji na mwingilo wa kubuula bantu bintu byawama byanembwa pa Lumwekesho 21:4, 5 bya kuba’mba: “[Lesa] ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.” Kabiji mwine waikala pa jitanda, aye Yehoba waambile’mba: “Tala! Mbena kulenga bintu byonse kwikala ke bipya.” Kabiji waambile’mba: “Nemba, mambo bino byambo bya kishinka kabiji bya kine.” Inge ke tusapwile ano mambo awama na mukoyo ku bantu, tutumbijika lusa lukatampe lwa Yehoba.