Mu mwaka wa 2007, kyalo kya Ecuador kyafuukwilepo kukeba mali a kuzhikijilamo mpunzha ya bichi yabaya makilomita 10,000 mu bula ne mu bwipi itelwa’mba Amazon, munoka mvula mwaka yense. Kechi bakebelenga’mba bapoyengamo manyi ne. Bino, basankilapo byo bafuukwile kuba na mambo a kuba’mba byalo bikwabo bipaine kupana bukwasho bwa mali a kuzhikijilamo ino mpunzha kechi byapaine ano mali ne. Mpunzha ya Amazon ke mpunzha imo muji banyama bavula bingi ba mitundu yapusana pusana.

Pepala wa byambo utelwa’mba The Japan News waambile’mba pa kupima mashi, kyakatazha bingi kukwata twishi tonse tujimo tuleta bikola. Bino byambo byanembelwe kimye sawakya umo kyo ashimwine kuba’mba mu 2013 mwanamulume uji na myaka ya mu ma 60 watambwile kikola panyuma ya kumubikamo mashi ajinga na twishi twa HIV. Inge muntu wapana mashi po po atambulatu twishi twa HIV, pakonsha kupita bañondo bacheche kwa kubula kwitukwata tuno twishi.

Nangwa kya kuba nkondo yalwilenga bena Zimbabwe ku mupaka wa kyalo kyabo na kyalo kya Mozambique yapwile kala papita ne myaka 30, bino mabomba o batele atwajijila kulemeka bantu ne kwibepaya. Kavoto ka mu kipamo kikwasha bantu bo bakozha mu nkondo ne baponenwa na bya malwa (International Committee of the Red Cross) kaambile’mba: “Kufuma mu mwaka wa 1980, bantu kukila pa 1,500 ne banyama 120,000 bebepayile, kabiji bantu bakwabo 2,000 bebalemekele ku mupaka wa Zimbabwe ne Mozambique.”

Kupesa pesa kumo kwaubiwe kumwesha kuba’mba bantu babana mu masongola balwila ne pa bilelwa. Inge bantu baji mu masongola baabana, bipe byabo bileta bingi lutobo pa kwibyabana ke mazubo, mali, bilelwa ne bipetu bikwabo.