KU MUSEZHO wa mukola wa Motoyasu, mu muzhi wa Hiroshima mu Japan, kuji kishimikwa kyo baonawine lubaji lumo mu mwaka wa 1945. Mambo ka o babujila kwikishimukulula pa myaka 70 yapitapo?

Kino kishimikwa kya mazubo asatu o batentakanya kuya peulu kyo bashimikile mu mwaka wa 1915 bekingijishanga kutentemeshamo bintu byapusana pusana. Pano bino, bintu byapimpwilwe pa 6 August 1945. Pa jino juba, lukelo pa kimye kya 8:15, bomba washinta bingi wavumine mwiulu palepa mamita 550 kufuma panshi mu muzhi wa Hiroshima peulu ya kino kishimikwa. Kyo kyajinga kimye kitanshi kyo baingijishepo uno bomba. Bonse bajinga mukachi ka kino kishimikwa bafwile ponkapotu. Pano bino, mashiki ene paimenejile kino kishimikwa kechi akundukile ne.

Ne lelo jino, kino kishimikwa kechi bekishimukulula ne. Sawakya washimwine kipamo kya UNESCO * waambile’mba kino kishimikwa ke “kiyukilo kikatampe kimwesha bilwilo byashinta byalenga bantu bileta lono lukatampe.” Mu 1996, kino kishimikwa bekibikile pa mutanchi wa UNESCO World Heritage List ne kwikitela’mba Hiroshima Peace Memorial.

Nangwa byonkabyo, kuvuluka bino bintu bileta bulanda kechi kwalengela makondo kupwa ne. Makondo atwajijila kwikalako na mambo a kichima, misalululo pakachi ka byalo, ne lupato lwaimena pa bupopweshi, mikoka ne mitundu ya bantu. Pano nanchi ko kuba’mba nkondo kechi ikapwa ne nyi?

Baibolo wakumbula’mba ikapwa. Salamo 46:9 waamba’mba: ‘Lesa ukapwisha nkondo pa ntanda ponse. Ukachimauna buta bwa mukanda ne jifumo; ukasoka makalaki a nkondo mu mujilo.’ Pa kyokyo kimye, Lesa ukafumyapo makafulumende a bantu ne kupingishapo Bufumu bwanji bukalamanga Yesu Kilishitu, yeatongola kwikala “Mfumu wa bamfumu.”—Lumwekesho 11:15; 19:16.

Kufuma kyokyo kimye, kechi kukekala kuvuluka nkondo ne. Isaya 65:17 waamba’mba: “Bintu bya kala,” ko kuba’mba bya malwa bipitamo bantu lelo jino, “kechi bakebivulukapo jibiji ne, kabiji kechi bikeyapo jibiji mu michima yabo ne.”