BYAMBAPO BAIBOLO
Butooto
Nanchi butooto bwetu bwa ku mubiji bwanema kwi Lesa nyi?
“Twayai twitokeshe ku bubipisho bonse bwa mubiji ne bwa mupashi.”—2 Kolinda 7:1.
BYAMBA BAIBOLO
Mulenga wetu witutemwa kabiji ukeba’mba twikalenga na butuntulu bwa mubiji bwawama ne kwikala bwikalo bwawama ne myaka yavula. Lesa waamba’mba: “Mwanami, kange uvulame byo mbena kukufunjisha ne, . . . mambo bikakulengela kwikala moba avula ne myaka yavula ya bumi ne mutende.” (Byambo bya Maana 3:1, 2) Mizhilo Lesa yo apele bena Isalela imwesha’mba Lesa watemwa bantu, mambo mu ino mizhilo mwavwangilwe mikambizho yaambile pa kwikala na butooto. (Mpitulukilo ya mu Mizhilo 23:12-14) Kimye bena Isalela kyo bakokelanga ino mikambizho, baikalanga na butuntulu bwa mubiji bwawama kabiji bazhikijilwanga ku myalo yajinga mu byalo bikwabo nabiji mu Ijipita mwabujile Mizhilo ya Mosesa.—Mpitulukilo ya mu Mizhilo 7:12, 15.
Ne lelo jino, bantu ‘betokesha ku bubipisho bonse bwa mubiji,’ nabiji kupepa fwanka, kukizhamo kutoma maalwa ne kwingijisha bizhima bezhikijila ku bikola kabiji kechi bafwa bukiji ne. Kabiji na mambo a kuba’mba javula twikala mu bimasamasa muji bantu bavula, kulondela mizhilo ya Lesa yaamba pa butooto kumwesha’mba tulangulukilako bakwetu.—Mako 12:30, 31.
Nanchi Lesa ukeba’mba twikalenga ba butooto mu byubilo ne mu mpopwelo nyi?
“Ipayai binungwa bya mibiji yenu . . . na mambo a bulalelale, bubipisho, milanguluko yatama ibindankanya muchima, kusakasaka kubi, ne lunkumbwa, ko kupopwela bankishi. Na mambo a bino bintu, bukaji bwa Lesa bubena kwiya.”—Kolose 3:5, 6.
BYAMBA BAIBOLO
Byonka byo twaambapo kala, Baibolo witutundaika ‘kwitokesha ku bubipisho bonse bwa mubiji ne bwa mupashi.’ Kimye Yesu Kilishitu kyo ajinga pano pa ntanda, bantu bavula, kubikapotu ne bantangi ba bupopweshi bwa Bayudea, bakizhizhemo kuta muchima pa butooto bwa ku mubiji kya kuba kechi bateleko maana ku mizhilo yaamba pa byubilo byawama ne pa butooto mu mpopwelo ne. (Mako 7:1-5) Pa kuba’mba ebakwashe kwikala na ndangulukilo yawama, Yesu waambile’mba: “Kafwako kintu kifuma pangye ya muntu ne kutwela mwi aye kyakonsha kumuzhilulula, byo kiji kuba’mba kitwela . . . munda ne kufumamo kuya mu kyolonyi.” Kepo anungilepo amba: “Akya kifuma mu muntu kyo kimuzhilulula. Mambo mu michima ya bantu, mo mufuma milanguluko yatama, bulalelale, bwivi, kwipayañana, bukende, lunkumbwa, byubilo byatama, bujimbijimbi, kwizozola, meso a lwiso, . . . ne kubula maana. Abino bintu byonse byatama . . . byo bizhilulula muntu.”—Mako 7:18-23.
Kwesakana na byaambile Yesu, bantu bakizhamo butooto bwa ku mubiji bino saka balengulula mizhilo ya Lesa yaamba pa byubilo byawama ne butooto bwa mu mpopwelo baji nobe tutomeno to baovwatu pangye bino saka twabula kutoka mukachi.—Mateo 23:25, 26.
Nanchi kyakatazha kulondela mizhilo ya mu Baibolo nyi?
“Mambo kutemwa Lesa kulumbulula’mba tulondelenga mikambizho yanji; kabiji mikambizho yanji kechi yakatazha ne.”—1 Yoano 5:3.
BYAMBA BAIBOLO
Pa Mika 6:8 paamba’mba: “Ñanyi kintu Yehoba kyo abena kukeba’mba ube? Kanatu kuba byaoloka, kwikala wa kishinka, ne kwenda na Lesa wobe saka wipelula!” Kine, kino kintu kechi kyakatazha kuba ne. Kunungapo, Mulenga wetu ukeba’mba tumukokelenga mambo twamutemwa. Umvwe twauba bino, tukekala na lusekelo lukatampe. (Salamo 40:8) Kabiji inge twalenga mambo, kuyuka’mba Lesa witubila lusa kwitutekenesha bingi. Baibolo waamba’mba: “Byonkatu nsemi wa mulume byo obila lusa baana banji, ne Yehoba byo byo aubila lusa aba bamwakamwa. Mambo aye wayuka bulongo byo twalengwa, uvuluka’mba twi lukungu,” ko kuba’mba wayuka bukooke ne bumbulwa kulumbuluka bwetu.—Salamo 103:13, 14.
Kya kine, mizhilo ya Lesa yaamba pa butooto bwa ku mubiji, byubilo byawama, ne pa butooto bwa mu mpopwelo imwesha’mba Lesa witutemwa. Umvwe ke tulondele ino mizhilo, tumwesha’mba twi ba maana kabiji twamutemwa.
Mwakonsha Kutemwa
KYAMBA KYA USOPA
Lesa Umona Byepi Kupepa Fwanka?
Baibolo kechi waambapo pa fwanka ne, onkao mambo, twakonsha kuyuka byepi?
