Nataaine Bukwasho mu Kimye kya Malwa
Nabazhimukiletu nalaala kinkuvumene panshi ya mukola. Naesekele kwinuna mutwe amba mpeme, bino nakankelwe. Naumvwine bingi moyo, kabiji naesekele namba ngaluluke, bino maulu ne maboko ami kechi byaingijilenga ne. Ponkapo natendekele kutomena. Pa joja juba mu kimye kya kisalo mu 1991, bwikalo bwami bwapimpwilwe.
NASEMEKEJILWE mu muzhi mukatampe wa Szerencs, kabiji nakomejile mu muzhi mucheche wa Tiszaladány ku buyeke musela mu kyalo kya Hungary. Mu June 1991, nayile na balunda nami na kukayila pa mukola wa Tisza. Byo nalangulukile’mba pazhika, netayile pa mema. Nalubankenye bingi kuba bino mambo nemokwele nshingo ne longololo. Balunda nami byo bamwene amba nakankalwa kufumapo baishile bukiji bukiji ne kunshikula ne kuntwala kumutunta.
Nayukile kuba’mba kuji byalubankana. Mulunda nami umo watumijile foni bapana bukwasho bwa bukiji bukiji, kabiji baishile na kabotolo ne kuntwala ku kipatela ko bakantumbwile badokotala ne kubwezha bulongo bikupa pa kuba’mba longololo wami abule konaikilako. Pa kupitapo kimye, bantwajile ku kipatela kiji mu muzhi mukatampe wa Budapest ko bakankwashishe kubwezha bulongo bikupa byamokokele. Pa bañondo basatu, nalaalangatu. Nangwa kya kuba naalulanga mutwe wami, bino mubiji yense kufuma mu nshingo kufika ku maulu kechi waingijilenga ne. Nangwa kya kuba najinga na myaka ya kusemwa 20, kafwako kyo neubilanga amiwa mwine ne. Nelangulushanga bingi kya kuba nakebelengatu amba mfwe.
Kimye kyo nabwelele ku nzubo, bansemi bami bebafunjishe bya kundama. Bino uno mwingilo wibakokeshanga bingi ne kwibalengela kwikala na milanguluko yavula. Byo papichile mwaka umo, natendekele kwikala na binyenge. Bino, bantu bafunda bya kukwasha bantu baji na bulanda bankwashishe ne kumbula bya kuba pa kukepeshako binyenge.
Natendekele ne kulanguluka bingi pa bumi. Mambo ka o twaikelako? Mambo ka bino bya malwa o byamwekejile? Natangile mabuku ne magazini apusana pusana amba ntane mikumbu ya ano mepuzho. Naesekele ne kutanga Baibolo, pano bino, nakankelwe kukwatakanya byo natangilenga. Onkao mambo nekilekele kumutanga. Kabiji nesambilepo na pulishiti, pano bino kechi natondelwe na mikumbu yanji ne.
Mu mwaka wa 1994, mu kimye kya mwela wa mebele, Bakamonyi ba kwa Yehoba babiji bafwakashishe batata. Kepo batata baambijile bano Bakamonyi amba besambeko ne amiwa. Natelekelenga byo bandumbulwijilenga amba Lesa ukalula ino ntanda kwikala ke paladisa ne kupwisha bikola ne buyanji. Bino bintu byaumvwanyikile kuwama bingi, pano bino nakizhinaukilenga. Nangwa byonkabyo, natambwile mabuku abiji o baingijishanga pa kufunda Baibolo. Panyuma ya kutanga ano mabuku, naswile kufunda Baibolo na bano Bakamonyi. Kabiji batundaikile kulomba.
Nashiinwe kuba’mba Lesa wanta bingi muchima
Byo natwajijile kufunda Baibolo, nataaine mikumbu ya mepuzho ami avula bingi. Kabiji nashiinwe kuba’mba Lesa wanta bingi muchima. Panyuma ya kufunda Baibolo pa myaka ibiji, nabatizhiwe pa 13 September 1997, pa nzubo mu kishomeka kikatampe kya kowelamo. Jino jajinga juba ja lusekelo bingi mu bwikalo bwami.
Mu 2007, bantwajile na kwikala mu muzhi wa Budapest mu kishimikwa mo balamina bantu balemana. Kwikala kuno kwankwasha kubulako bakwetu bintu byawama byo nafunda. Inge bwakyatu bulongo, ngya pangye na kwisamba na bantu. Nji na kakinga ka bantu balemana kenda kwa kubula kwikashinjika, ko ñendesha kwingijishatu kalevu kami.
Kisemi kimo mu kipwilo kyampele mali a kupota kompyuta wawama bingi wingila kupichila mu kukopa ne kulondela bibena kwenda mutwe wami. Uno kompyuta unkwasha kutumina bantu mafoni kwingijisha Intaneti ne kutuma makalata ku bena mazubo babula kutanwapo inge ba mu kipwilo baya pa mazubo abo. Kukwasha bantu mu jino jishinda kwandengela kuwamishako busendwe bwami bwa kwisamba na bantu kabiji kwankwasha ne kukepeshako bijikila.
Kusapwila byambo bya mu Baibolo pa Intaneti kwingijisha kompyuta ukopa byenda mutwe wami
Ntanwa ne ku kupwila kwa bwina Kilishitu. Inge nafika pa Nzubo ya Bufumu, balongo ba mu kipwilo banshikwilatu kumo na kakinga kami ne kunkanjizha peulu paikela nzubo ya Bufumu yo tupwilamo. Pa kupwila, inge nkeba’mba nkumbulepo, mulongo ye ngikala nanji pepi untambikilako kuboko kwanji. Kepo andaminako Baibolo nangwa buku ye tubena kufundamo kimye kyo mbena kukumbula.
Misongo kechi yapwa ne, kabiji bakwetu bo bangubilatu byonse. Onkao mambo, kimye kimo ngikala bingi na bulanda. Bino, ntana lutekenesho pa kuyuka kuba’mba nji na bulunda bwawama na Yehoba Lesa, ne kuba’mba uteleka kimye kyo na mulumbulwila makatazho ami mu lulombelo. Kutanga Baibolo pa juba pa juba ne lutundaiko kufuma ku balongo ne banyenga ba mu kipwilo binkosesha bingi. Bulunda ne lutekenesho lwabo, kubikapotu ne milombelo yo bandombelako, binkwasha bingi kubula kwinyengaika.
Yehoba wantekeneshe mu kimye kya malwa. Kabiji wankwashishe kwikala na luketekelo lwa kuba’mba mu ntanda ipya nkekala na butuntulu bwa mubiji bwawama. Onkao mambo, mbena kutonga bingi kimye kyo ‘nkendanga, kukilauka ne kumutota’ na mambo a butemwe bwanji ne lusa lwanji lukatampe.—Byubilo 3:6-9.
