“Yehoba, . . . yenka walengele ntanda, . . . kechi wiilengele kwikala yatutu ne, bino wiilengele’mba mukekalenga bantu.”—Isaya 45:18.

BYAMBA BANTU

Bavula bamba’mba ntanda yaishilekotu ine kafwako wiilengele ne. Bupopweshi bumo bufunjisha’mba ntanda yo mpunzha Lesa yo esekelapo bantu kumona inge bafikilamo kwibapa mfweto ya bumi mwiulu nangwa kwibataya mu mujilo wa helo.

BYAMBA BAIBOLO

Baibolo waamba’mba: “Lesa walengele jiulu ne ntanda.” (Ntendekelo 1:1) Wabuujile ba mulume ne mukazhi batanshi amba: “Semainga ne kusemununa, muyuzhe ntanda ne kwiijima kabiji mwikale na bunkambo pa . . . bilengwa byumi byonse byenda pa ntanda.” (Ntendekelo 1:28) Lesa waambiletu pa lufu kimye kyo ebabuujile’mba inge babula kukookela bakafwa. (Ntendekelo 2:17) Onkao mambo, Lesa walengele ntanda kuba’mba mukekalenga bantu myaka ne myaka. Mu ntanda mwafwainwe kuyula bantu ba lukookelo ba kwiilama ne kwikalamo myaka ne myaka.

“Waikajika ntanda pa bitendekesho byayo; kabiji ikekalanga pa mpunzha yayo myaka ne myaka.”—Salamo 104:5.

BYAMBA BANTU

Bashayuka ba bya sayansi bambapo bintu bimo byo balanguluka’mba byakonsha konauna ntanda kya kuba’mba kechi mwakonsha kwikala bantu jibiji ne. Bebitela’mba bintu byakonsha kuzhiisha bantu bonse, nabiji mabwe akatampe apita mwiulu amweka nobe kabangabanga kabena kuteema mujilo, kutubika kwa mitumba, juba kutubika ne konaika, nangwa kukaba kwa mwela, ne bya malwa biletako bantu nabiji makondo a mabomba ashinta.

BYAMBA BAIBOLO

Mulanguluko wa Lesa ku ntanda kechi wapimpulwa ne. Mambo a Lesa aamba’mba: “Ntanda yaikala myaka ne myaka.” (Musapwishi 1:4) Kabiji mu ntanda mukekalanga bantu myaka ne myaka. Baibolo waamba’mba: “Baoloka bakaswana ntanda, Kabiji bakekalangamo myaka ne myaka.”—Salamo 37:29.

MAMBO KA O KYANEMENA?

Kwitabila’mba ntanda ikonaunwa kwalengela bantu bamo kutendeka konauna bintu byawama bijimo. Kabiji kwalengela bakwabo kubula kwikala na luketekelo lwa kulutwe ne kwikelatu monka mo bakebela. Kino kyakonsha kulengela bantu kubula kwikala bwikalo bwalumbuluka. Pano bino, inge twaitabila’mba twakonsha kwikala myaka ne myaka pano pa ntanda, tukafuukulangapo bintu biketukwasha atweba bene ne bisemi byetu luno ne kimye kya kulutwe.

“Jiulu jo ja kwa Yehoba, pakuba ntanda wiipana ku baana ba bantu.”—Salamo 115:16.

BYAMBA BANTU

Bantu bavula baitabila’mba bantu bawama baya mwiulu.

BYAMBA BAIBOLO

Mwiulu mwa Lesa, pano pa ntanda pa bantu. Baibolo waamba’mba “ntanda ikeya” mukekala bantu. (Bahebelu 2:5) Yesu ye muntu mutanshi wayile mwiulu, kabiji Baibolo umwesha’mba bantu bachechetu bo basalwa kuya mwiulu na kwingila mwingilo wanema. Bano basalwa “bakekala bamfumu ba kulama ntanda” pamo ne Yesu.—Lumwekesho 5:9, 10; Luka 12:32; Yoano 3:13.

MAMBO KA O KYANEMENA?

Lufunjisho lwa kuba’mba bantu bonse bawama bakaya mwiulu kechi lwakwatankana na bifunjisha Baibolo ne. Inge kya kuba Lesa ukatwala bantu bonse bawama mwiulu, ko kuba’mba wakankalwa kufikizha mulanguluko wanji ye alengejile ino ntanda, kabiji mulaye wanji wa kupa bantu bumi bwa myaka ne myaka pano pa ntanda kechi ukafika ne. Pano bino, Mambo a Lesa alaya’mba: “Ketekela mwi Yehoba ne kulondela jishinda janji, ne aye ukakutumbijika kuba’mba ukaswane ntanda.”—Salamo 37:34.