MUTWE WA PA NKUPIKO
Bumi Bwatendekele Byepi?
Pwishai uno mukuku.
BUMI ․․․․․.
BWITENDEKEJILETU BWINE
BWALENGELWE
BAMO bakonsha kulanguluka’mba muntu wafunda sayansi wakonsha kwamba’mba “bwitendekejiletu bwine,” kabiji amba muntu upopwela Lesa wakonsha kwamba’mba “bwalengelwe.”
Pano bino, bavula kechi byo byo balanguluka ne.
Shayuka ufunjisha sayansi pa sukulu mukatampe wa McMaster University mu Canada, aye Rama Singh waambile’mba: “Bantu baji mu bupopweshi kechi bo bonkatu bakana lufunjisho lwa kuba’mba bumi bwitendekejiletu bwine ne, bino ne bantu bafunda bavula nabo bakana luno lufunjisho.”
Akilangulukai pe Gerald Hertel, mufunjishi mukulumpe wafunjishanga pa byalengwa bilongolo pa sukulu mukatampe kabiji wafunjile’mba bintu bilengeletu bine. Waambile’mba: “Pa kunemba mpeso, nanembanga mikumbu yakebanga bafunjishi bami, pano bino, kechi nebitabijile ne.”
Mambo ka bantu bamo bafunda bya sayansi o bakankelwa kuswa’mba bumi bwitendekejiletu bwine? Pa kuba’mba tukumbule buno bwipuzho, twayai twisambe pa mepuzho abiji akatazha bantu bavula bapesa pesa bya kupesa pesa: (1) Bumi bwatendekele byepi? ne (2) Bilengwa byumi byaishileko byepi?