MUTWE WA PA NKUPIKO | NANCHI BAIBOLO WINGILA ANO MOBA NYI?
Mafunde A Myaka Ne Myaka Akwasha Bantu Bonse —Kwikanya
JIFUNDE JA MU BAIBOLO: “Muntu wakosama usolola bukaji bwanji bonse, bino muntu wa maana wikanya.”—Byambo bya Maana 29:11.
Cassius wafunjile bya kufwomona bukaji ne kulekela mambo
BYAWAMA BIFUMAMO: Inge mukeba kunemba mutanchi bya byawama bifuma mu kwikanya mwafwainwa kwikala na mulumba wa mapepala. Kino kyubilo kikwashako ne kwikala na butuntulu bwa mubiji. Baibolo waamba’mba: “Muchima watekanya upana bumi [nangwa’mba, “butuntulu bwawama,” tubyambo twa munshi] ku mubiji.” Kabiji wanungapo ne kuba’mba: “Muchima wa lusekelo ye muchi wawama.” (Byambo bya Maana 14:30; 17:22) Bafunda bya butuntulu bwa mubiji bataana kuba’mba kuzhingila bukiji ne kuba bukaji byakonsha kulengela muntu kukolwa, kikatakata kikola kya muchima. Bino, butuntulu bwa mubiji kechi bo bonkatu buwame bufumamo mu kwikanya ne.
Cassius, uji na myaka ya mu ma 30, waambile’mba: “Natobokanga bingi na bakwetu ne kuzhingila bukiji, kabiji nalwanga bingi na bantu. Kechi najinga na lusekelo ne. Pano bino, napimpwile byubilo byami kimye kyo natendekele kulondela mafunde a mu Baibolo. Nafunjile bya kufwomona bukaji, kwipelula, ne kulekela bakwetu mambo. Inge ne kuba byobyo ne, kampe inge bankashile. Kine, ñumvwatu nobe nafwile pano nasanguka.”
“Ñumvwatu nobe nafwile pano nasanguka”