JIFUNDE JA MU BAIBOLO: “Ñanyi wakonsha kwikala mwenyi mu tente [wa Lesa]? . . . Kanatu yewa wabula kaneneno, uba bintu byaoloka kabiji wamba bya kine mu muchima wanji.”—Salamo 15:1, 2.

BYAWAMA BIFUMAMO: Bantu bavula banemeka bukishinka. Pano bino, boba byepi inge bataanapo jishinda ja kumwenamo mali mu bujimbijimbi kwa kubula kwibakwata? Luno lwikala lweseko lumwesha biji mu muchima wa muntu.

Raquel, wingila mwingilo wa kupotapota bintu bya kwingijisha pa kampanyi waambile’mba: “Bantu bamo bapotesha mu shitolo bakebelenga’mba mpote bintu bya kwingijisha pa kampanyi mu shitolo wabo, onkao mambo, bandayile’mba basa kumbwezhezhako mutengo wa bintu ne kumpa mali asakushalapo ekale ami. Byo navulukile lujimuno lwa mu Baibolo lwaamba pa bukishinka, nakaine. Bakulumpe ba mingilo byo baumvwine kino kyo naubile, banketekejile bingi.”

Umvwe Raquel wajimbaikilwe na byamubuujile bapoteshenga mu shitolo, inge waikele na mali avula pa ka kimye kachechetu. Pano bino, ñanyi bintu byakonsheshe kumumwekela inge kya kuba bakulumpe ba mingilo bayukile? Nanchi Raquel inge watwajijile na mingilo yanji nyi? Abya inge waketekejile kutwela nkito ikwabo nyi? Bino kyakijilemo kunema kwi Raquel ke jiwi janji ja mu muchima ne mushingi ye bamupanga. Byambo bya Maana 22:1 byaamba’mba: “Kyawama kwikala na jizhina jawama kukila bunonshi bwavula; kunemekwa kwawama kukila siliva ne ngolode.”

Jessie naye wajinga wa kishinka kabiji waketekelwa, onkao mambo, bakulumpe banji ba mingilo bamutemenwe bingi. Ñanyi buwame bwafuminemo? Bamupele kifulo kikatampe pa kampanyi kabiji bamupele ne luusa lwa kwilengela aye mwine mutanchi wa mingilo yanji pa kampanyi. Kino kyamulengejile kwikala kimye kyabaya kya kutaanwa pamo na kisemi kyanji ne kwingilako mingilo ya kipwilo.

Bakulumpe ba makampanyi bamo inge babena kukeba bamingilo, baya ku bantu bayukanyikwa amba bakishinka. Mukulumpe wa mingilo pa kampanyi umo mu kyalo kya Philippines watumine nkalata ku ofweshi wa Bakamonyi ba kwa Yehoba ya kwipuzha inge kwajingapo Bakamonyi bakebelenga kutwela nkito. Waambile’mba Bakamonyi ba kwa Yehoba “bengila na ngovu, ba kishinka, kabiji batako bingi muchima ku mingilo.” Bino, munema yense uya kwi Yehoba Lesa witufunjisha ‘kushikwa byatama ne kutemwa byawama.’—Amosi 5:15.