JIFUNDE JA MU BAIBOLO: “Masongola aneme ku bonse, kabiji kange azhilululwe ne.”—Bahebelu 13:4.

BYAWAMA BIFUMAMO: Bantu bamo balanguluka’mba abino byambo bya kala kechi bingila ano moba ne. Pano bino, ino ndangulukilo yatama bingi. Byonkatu byo kyajinga kimye kyanembejilwengamo Baibolo, ne ano moba kubula bukishinka kukozha bingi ku muchima.—Byambo bya Maana 6:34, 35.

Jessie, mwanamulume wasongola uji ne na baana wanembele’mba: “Bukishinka mu masongola bwakosesha bulunda bwami na mwinakwami kabiji bwitulengela ne kwikala na lusekelo. Kine, kwiketekela kwanema bingi mu masongola. Kubula bukishinka kulengela luketekelo kupwa,” kabiji kulengela ne baana kubula kukoma bulongo.

Ligaya * wabikile masongola anji mu kizumba. Waambile’mba: “Natendekele kupwanañana na bantu baji na byubilo byatama. Onkao mambo, natendekele kutanwa mu bishimikwa mo batomena maalwa ne kukaya makayo atama kabiji nalaalanga na banabalume bakwabo.” Nanchi bwikalo bwa uno mutundu bwamulengejile kwikala na lusekelo nyi? Kimye kyonse watobokangatu na balume, kabiji kechi wajingapo na lusekelo nangwa pacheche ne. Wanungapo’mba: “Byo nalungukile pa byubilo byatama byo netwezhezhemo, nemwenejile bukine buji mu byambo byaambanga bansemi bami bya kuba’mba, ‘Kupwanañana na babi konauna byubilo byawama.’”—1 Kolinda 15:33.

Ligaya watwajijila kwamba’mba: “Bintu saka bikyangye kuya mu nsunya, nafuukwilepo kuleka byubilo byatama, kabiji natendekele kufunda Baibolo ne kwingijisha byo nafundanga.” Ki ka kyafuminemo? Masongola abo kechi apwile ne, kabiji mwatawanji watendekele kumunemeka ne kumubila lusa. Ligaya wanungilepo amba: “Baibolo wapimpula bwikalo bwami, kabiji kechi nelangulusha pa kuleka byubilo byatama ne kuleka kupwanañana na bantu baji na byubilo byatama ne.”