BYAMBAPO BAIBOLO
Misiasa
Baibolo waambijile jimo amba Mesiasa ukeya pano pa ntanda na kupokolola bantu ku bikola, buyanji ne lufu. Nanchi Yesu Kilishitu ye Mesiasa nyi?
Bantu bakonsheshe kumuyuka byepi Mesiasa?
Bungauzhi bwa mu Baibolo bwaambile’mba Mesiasa, nangwa’mba Kilishitu ukeya na kwingila mingilo ibiji, yo akengila pa bimye byapusana. * Bungauzhi bwaambile’mba mwingilo wanji mutanshi ukamwingila mu bumuntu. Pa kuba’mba bantu bamuyuke bulongo, banembi ba Baibolo baambijile jimo byavula pa bikekala bwikalo bwanji ne mwingilo wanji. Kya kine, “mwingilo wa kushimuna bukamonyi pe Yesu” kyo kishina kya bungauzhi bwa mu Baibolo.—Lumwekesho 19:10.
Yesu byo ajinga pano pa ntanda, wamwesheshe bintu byo akoba mu ntanda yonse kimye kyo akekala kilengwa kya mupashi na bulume bukatampe
BYAMBA BAIBOLO
Mesiasa . . .
-
Ukafuma mu kisemi kya Mfumu Davida.—Isaya 9:7; Luka 3:23-31. *
-
Ukasemekelwa mu muzhi wa Betelema.—Mika 5:2; Luka 2:4-7.
-
Ukekala kimote ukasapwila “mambo awama.”—Isaya 61:1; Luka 4:43.
-
Bakamulengulula, kabiji bakamumonanga nobe watutu.—Isaya 53:3; Mateo 26:67, 68.
-
Bakamusolola na “mashekele a siliva 30.”—Zekaliya 11:12, 13; Mateo 26:14, 15.
-
Ukazhindama pa kumupamo mambo a bubela ne kumwipaya.—Isaya 53:6, 7; Mateo 27:12-14.
-
Ye “mwana mukooko” ukafumyapo bundengamambo ne kulengela bantu kwikala batoka kwi Lesa.—Isaya 53:7; Yoano 1:29, 34, 36.
-
Pa kumwipaya, kafwako kikupa kyanji nangwa kimo kyo bakachimuna ne.—Salamo 34:20; Yoano 19:33, 36.
-
Bakamuzhiika konka ko bazhiika banonshi.—Isaya 53:9; Mateo 27:57-60.
-
Bakamusangula pa juba ja busatu.—Mateo 16:21; 28:5-7.
Yesu wafikizhe buno bungauzhi bonse ne bukwabotu. Wabukile ne bakolwa ne kusangula bafwa. Onkao mambo, kechi wapainetu kishiino kimwesha’mba ye Mesiasa ne, bino byo aubile bikosesha lwitabilo lwetu mu milaye ya mu Baibolo kuba’mba abino byo aubile ukebyuba mu ntanda yonse. (Luka 7:21-23; Lumwekesho 21:3, 4) Panyuma ya lusanguko, Yesu waikele ku ‘kuboko kwa Lesa kwa kilujo,’ na kupembela kimye kya kupwisha mwingilo wanji wa Bumesiasa.—Salamo 110:1-6.
“Umvwe Kilishitu waiya, nanchi ukoba biyukilo byakila byaubapo uno muntu nyi?”—Yoano 7:31.
Mesiasa ukapwisha byepi mwingilo wanji?
Bayudea bajingako kimye Yesu kyo ajinga pano pa ntanda baketekejile’mba Mesiasa ukebafumya mu buzha ku bena Loma ne kubwezha bufumu ku bena Isalela pa kyonkakya kimye. (Byubilo 1:6) Pano mu kuya kwa kimye, baana banji ba bwanga po po bayukile’mba Yesu ukapwisha kwingila uno mwingilo mwiulu byo akekala kilengwa kya mupashi na luusa lukatampe lo bakamupa kwi Shanji.—Mateo 28:18.
BYAMBA BAIBOLO
Mu mwingilo wanji wa bubiji, Mesiasa . . .
-
Ukekala Mfumu wa Bufumu bwa Lesa, ko kuba’mba kafulumende ukalamanga ntanda yonse.—Danyela 7:13, 14; Lumwekesho 11:15.
-
Ukapesha bantu bonse bamwitabila.—Ntendekelo 22:17, 18; Salamo 72:7, 8.
-
Ukalengela “bisaka bya bantu bavula kukumya” ne bamfumu babo pamo kimye kyo akebonauna na mambo a kumulwisha.—Isaya 52:15; Lumwekesho 19:19, 20.
-
Ukatwezha “jibumba jikatampe” ja bantu baoloka mu ntanda ipya ya mutende.—Lumwekesho 7:9, 10, 13-17.
-
Ukengijila pamo ne Yehoba Lesa pa kusangula bafu bakekale bomi mu Paladisa pano pa ntanda.—Luka 23:43; Yoano 5:21, 28, 29.
-
Ukafunjisha bangikazhi banji kwikala mu mutende wa kine.—Isaya 11:1, 2, 9, 10.
-
Ukafumyapo bundengamambo, bwaleta bikola ne lufu.—Yoano 1:29; Loma 5:12.
-
Ukonauna mingilo ya kwa Satana yonse ne kukwatankanya bantu mu bukalama bwa kwa Yehoba Lesa.—1 Kolinda 15:25-28; 1 Yoano 3:8.
Yesu wafikizhe mwingilo wanji mutanshi wa Bumesiasa. Kabiji ukapwisha ne mwingilo wanji wa bubiji. Onkao mambo, bantu ba maana bafunda mwingilo wanji, mambo Yesu waambile’mba: “Amiwa yami jishinda ne bukine ne bumi.”—Yoano 14:6.
“Mu kimye kya bukalama bwanji baoloka bakekalanga bulongo, ne mutende ukavula moba onse kufikatu ne ñondo byo akabula kwikalako. Aye ukekala na bangikazhi . . . kukafika ne konse kwapela ntanda.”—Salamo 72:7, 8.
^ par. 5 Kyambo kya kuba’mba “Mesiasa” kyafuma ku Kihebelu. Kyambo kya “Kilishitu” kyafuma ku Kingiliki kabiji kilumbululatu kimo na kya Mesiasa.—Yoano 1:41.
^ par. 7 Kinembelo kitanshi kibena kwamba pa bungauzhi, kya bubiji kibena kwamba pa byo bwafikile.
Mwakonsha Kutemwa
MEPUZHO A MU BAIBOLO A KUMBULWA
Nanchi Bungauzhi Bwaamba pe Mesiasa Bumwesha’mba Yesu ye Mesiasa Nyi?
Nanchi bantu bavula bo bafwainwe kufikizha bungauzhi bwaamba pe Mesiasa nyi?
