HILTON watemenwe bingi makayo a kwipuma binkonyi. Saka akijitu na myaka itanu na ibiji, walwanga bingi na bakwabo ne kukaya makayo a kwipuma binkonyi. Kimye kyo ajinga ku sukulu wa sekondale, wapitañananga na bakwabo na kukeba bantu ba kupuma. Hilton waambile’mba: “Naibanga, kukaya bisela bya kuchikapo mali, kutamba bya mulekese, kuyanjisha banabakazhi ne kwambila bansemi bami mwenga. Byubilo byami byatamine bingi kya kuba bansemi bami balangulukilenga’mba kafwapo byawama byo nkobapo mu bwikalo bwami ne. Panyuma ya kupwisha sukulu, nafumine pa nzubo pa bansemi bami.”

Hilton byo abwelele ku nzubo panyuma ya kupitapo myaka 12, bansemi banji bakuminye pa kumona byubilo byo ajinga nabyo. Watekenye, kechi wazhingilanga bukiji ne, kabiji wajinga bingi na mushingi. Ki ka kyamukwashishe kupimpula byubilo byanji? Kimye kyo akekele kwabula bansemi, watendekele kulangalukapo bulongo pa bwikalo bwanji. Kabiji watendekele kupesa pesa Baibolo kumona inge wakonsha kumukwasha kupimpula byubilo byanji. Hilton waambile’mba: “Natendele kulondela byo natangilenga mu Baibolo, onkao mambo, nalekele byubilo byami bya kala ne kukookela mukambizho uji pa kinembelo kya Efisesa 6:2, 3 wa kunemeka bansemi. Kyo kimye kitanshi kyo naikelepo na lusekelo lwa kine mu bwikalo bwami ne kusangajika bansemi bami.”

Jishimikila ja kwa Hilton jimwesha kuba’mba Baibolo wingila kabiji uji na bulume bwa kupimpula bwikalo bwa bantu. (Bahebelu 4:12) Twayai twisambe pa mafunde amo aji mu Baibolo aamba pa bukishinka, kwikanya, bukishinka mu masongola, ne butemwe, ne kumona byo akonsha kwitukwasha mu bwikalo bwetu.