BIBENA KUMWEKA MU NTANDA
Kwamba pa Africa
Bipamo byavula ne bantu batwajijila kwingila na ngovu kukeba kuwamishako bwikalo mu Africa. Pano bino, kino kibunji kibena kupita mu makatazho abaya bingi.
Kwipaya Bilangwa
Mu mwaka wa 2013 bilangwa byo baipayile kwa kubula kusonkela ku kafulumende mu South Africa byajinga 1,004 kukila byo baipayile mu 2007 byajingatu 13. Nangwa kya kuba meno a bilangwa avula bingi bantu o bapotesha, bino, bantu batwajijilatu na kukeba ano meno mambo kajiino kachechetu ka kilangwa kapotwa mali avula bingi. Jiino jimo ja kilangwa jipotwa mali a kina America 500,000.
BYA KULANGULUKAPO: Nanchi makafulumende akakonsha kupwisha bumpupabizhila nyi?—Yelemiya 10:23.
Mazhikakanwa Abula Kusololwa
Sawakya wa kipamo kitala pa mazhikakanwa (Transparency International) washimuna’mba mu byalo bya ku musela wa Africa mo mwavula bingi mazhikakanwa. Pano bino, bantu bavula bingi batanwa mu makatazho a mazhikakanwa kechi basolola ne. Wambilako kipamo kitala pa bya mazhikakanwa mu Kenya waambile’mba: “Bangikazhi kechi baketekela’mba makafulumende akonsha kwingijilapo ne.”
BYAMBA BAIBOLO: “Mazhikakanwa akonsha kutwala mungi bamitonyi bachiba mambo bulongo.”—Kulupuka 23:8.
Bena Africa Babena Kwingijisha Intaneti
Sawakya wa kipamo kitala pa mafoni kitelwa’mba International Telecommunication Union umwesha kuba’mba bena Africa bachechetu baingijishe intaneti pa kufika ku mpelo ya mwaka wa 2014. Bantu babena kupana mali pa kuba’mba bengijishe intaneti pa mafoni mu Africa babena kuvujilako bingi.
