BYAMBA BANTU

Bantu bamo balanguluka’mba bantu bakonsha kwingijisha banyama mu jishinda jo bamona’mba jafwainwa. Bakwabo balanguluka’mba banyama bakebewa kwibalama byonka byo balama bantu.

• Muntu umo ulwilako luusa lwa banyama waambile’mba “bantu bafwainwa kunemeka luusa lwa banyama, kechi kwibamona nobe bipe bya kumwenamo mali ne.” Wanungilepo’mba: “Kechi twafwainwa kumonanga banyama nobe bipe ne.”

• Mwanamukazhi wanonkele bingi aye Leona Helmsley washile mali a kina America 12 milyonyi a kulaminamo kabwa wanji kabiji walayile ne kuba’mba inge uno kabwa wafwa, bakamuzhike pepi na kilende kyanji.

Kya kulangulukapo: Mulanguluka’mba banyama bafwainwa kulamwa byepi?

BYAMBA BAIBOLO

Mulenga wa bumi, Yehoba Lesa, wabuujile bantu kuba’mba bakekala na “bunkambo pa masabi a mu kalunga ka mema ne pa bilengwa bipita mwiulu ne pa bilengwa byumi byonse byenda pa ntanda.” (Ntendekelo 1:28) Onkao mambo, twakonsha kupwisha kuba’mba Lesa umona bantu amba banema kukila banyama.

Byambo byatendekelapo mu kinembelo kyo twaambapo kala bikosesha kino kishinka. Baibolo waamba’mba “Lesa walengele muntu mu kipasha kyanji, mu kipasha kyanji mwine mo mo amulengejile; walengele mwanamulume ne mwanamukazhi.”—Ntendekelo 1:27.

Mambo a kuba’mba bantu balengelwe ‘mu kipasha kya Lesa,’ tumwesha byubilo bya Lesa, nabiji maana, bunchibamambo bwaoloka ne butemwe. Bantu basemwa na bulume bwa kwikala na byubilo byawama ne kukeba kwikala na bulunda bwawama na Lesa. Banyama kechi baji na buno bulume bwa kumwesha bino byubilo ne, mambo kechi balengelwe ‘mu kipasha kya Lesa’ ne. Banyama kechi baesakana pamo na bantu ne, onkao mambo, kechi twafwainwa kwibalama byonka byo tulama bantu ne.

Nanchi kino kilumbulula’mba bantu bafwainwa kumanyikanga banyama nyi? Ine.

• Mu Mizhilo yo apele bena Isalela, Lesa wibabuujile kuba’mba banyama bafwainwa kukokoloka, kuja kajo, kwibakwasha inge paji bibena kwibakatazha ne kwibazhikijila.—Kulupuka 23:4, 5; Mpitulukilo ya mu Mizhilo 22:10; 25:4.

“Mu moba atanu na jimo, mwafwainwa kwingila mingilo yenu; bino pa juba ja butanu na bubiji kechi mwafwainwa kwingila ne, pa kuba’mba ñombe wenu mulume ne mbongolo wenu bakakokoloke.”—Kulupuka 23:12.

BYAMBA BANTU

Ba bibinda bamo ne bakwata masabi bomvwatu bulongo kupangisha banyama ne kwibepaya nangwa kumwesha’mba baji na bulume kukila banyama. Bakwabo bakonsha kwitabizha byaambile mwina Russia wanembanga mashimikila aye Leo Tolstoy amba kwipaya banyama ne kuja nyama “kwatama.”

BYAMBA BAIBOLO

Lesa waswisha bantu kwipaya banyama pa kuba’mba bazhikijile bantu ku banyama bakaji nangwa kufumyako bya kuvwala. (Kulupuka 21:28; Mako 1:6) Kabiji Baibolo waamba’mba bantu bakonsha kwipaya banyama ba kuja. Pa Ntendekelo 9:3 paamba’mba: “Byumi byonse byenda bikekala ke kajo kenu.” Yesu naye wakwashishe baana banji ba bwanga kukwata masabi o bayile na kuja.—Yoano 21:4-13.

Nangwa byonkabyo, Baibolo waamba’mba Lesa “washikwa muntu yense watemwa bukapondo.” (Salamo 11:5) Kino kibena kumwesha kuba’mba Lesa kechi ukeba’mba tumanyikenga nangwa kwipaya banyama kipaye ipaye ne.

Baibolo umwesha kuba’mba Lesa wanemeka bingi bumi bwa banyama.

• Baibolo waamba’mba kimye kyo alengelenga bintu, “Lesa watendekele kulenga banyama ba mungye monka mwayila mitundu yabo ne banyama ba kulela monka mwayila mitundu yabo ne byonse bikalaba panshi monka mwayila mitundu yabyo. Kabiji Lesa wibimwene’mba byawama.”—Ntendekelo 1:25.

• Baibolo waamba pe Yehoba amba: “Upa banyama kajo.” (Salamo 147:9) Lesa walengele bijimwa bipana kajo ku banyama ne mwa kulaala.

• Mfumu wa bena Isalela Davida waambile mu lulombelo lwanji amba: “Anweba Yehoba, mulama bantu ne banyama.” (Salamo 36:6) Kimye kya Muyulo, Yehoba wazhikijile bantu batanu na basatu ne mitundu yonse ya banyama saka akyangye konauna babi.—Ntendekelo 6:19.

Kya kine, Yehoba wanemeka banyama, kabiji ukeba’mba bantu balamenga banyama bulongo.

“Muntu waoloka ulama bulongo banyama banji bo alela.”—Byambo bya Maana 12:10.