Kyatanwa kuba’mba mema kufika ku 500,000 cu km abula mukele wavula ataanwa panshi ya tulunga. Vincent Post wa ku Flinders Yunivesiti mu Adelaide waambile’mba, “Mema a mu kalunga akeepele kukila byo aji lelo.” Onkao mambo, kitulu kyabayile. Pa kyokya kimye, mvula “yo yalengelanga mema kuyula momwa muji mema a mu kalunga lelo jino.” Basayansi baketekela kuba’mba bino bizhiba bya mema a panshi mu kuya kwa moba byakonsha kukwasha bantu kukila pa 700 milyonyi babula mema atooka.

Kichika kya mitundu ya banyama bakatampe bataanwa mu Sahara baleka kumweka nangwa bashajilatu mu mapunzha acheche mo bekala. Malwañano a bantu ne kwipaya banyama nabyo byo byalengela amba bakepe. Nangwa kya kuba banyama bataanwa mu biselebwa bavula kukila bataanwa mungye, bapesapesa bamba’mba “banyama ba mu biselebwa bavulatu byonka biji ba mungye, bino basayansi kechi batako muchima ku ba mu biselebwa ne, mambo kechi baji na mali avula ne.” Onkao mambo, aba balama bilengwa kibakatazha kuzhikijila banyama ba mu biselebwa.

Kyatanwa’mba muntu umo pa bantu 8 bafwilenga mu 2012 wafwile na mambo a mwela watama. Kwesakana na ba World Health Organization, “kutamisha mwela lo lukatazho lukatampe luji mu ntanda lwakonsha kwipaya bantu.”