BYO mwajinga banyike, bi ka byo mwakebelenga kuba mu bwikalo bwenu? Kampe mwalangulukilenga pa kusongola nangwa kusongolwa, kufunda mingilo imo nangwa kutwela nkito. Pano bino, bintu mu bwikalo kechi bikela monka mo mwalangulukijilenga ne. Mu bwikalo mumweka bintu byo mwabujilenga kuketekela byakonsha kwimulengela kubula kuba byo mwakebelenga. Akino kyo kyamwekejile Anja, Delina ne Gregory.

• Anja, wikala mu Germany bamutaaine na kikola kya kansa saka aji na myaka 21 kabiji kino kimye wikalatu pa nzubo.

• Delina, wikala mu United States ukolwa kikola kilengela mubiji kukola kitelwa’mba dystonia. Kabiji ye ulama ne bakolojanji basatu balemana.

• Gregory, wikala mu Canada ukolwa kikola kiiya na mambo a bijikila.

Nangwa kya kuba Anja, Delina ne Gregory baji na ano makatazho, bayuka mwakwikela na makatazho abo. Boba byepi?

Baibolo wamba’mba: “Inge walefulwa mu bimye bya makatazho, ngovu yobe ikakepa.” (Byambo bya Maana 24:10, tubyambo twa munshi) Kishinka ke kino: Byo mulangulukapo byakonsha kwimukwasha nangwa ne. Bantu balanguluka byatama javula kechi bekala na bulume bwa kuba bintu ne, bino aba balanguluka byawama bekala na bulume bwa kuba bintu.

Akimonai kino kishinka byo kyakwashishe Anja, Delina ne Gregory.