MUTWE WA PA NKUPIKO | NANCHI MUJI NA BULUME PA BUMI BWENU NYI?
Lukatazho: Milanguluko Yatama
NANCHI milanguluko yatama nabiji bulanda, bukaji nangwa kuzhingila bimulengela kumvwa kutama nyi? Inge byobyo kiji, ko kuba’mba kechi mwakonsha kwikala na kimye ne na bulume bwa kuba bintu byanema ne. Mwakonsha kuba byepi? *
WA KUMWENAKO WA MU BAIBOLO: DAVIDA
Mfumu Davida wajinga na milanguluko yavula kuvwangakotu ne kijikila ne bulanda. Ki ka kyamukwashishe kutwajijila kwingila? Davida waketekejile mu bulume bwa Lesa. (1 Samwela 24:12, 15) Kabiji wanembele ne byo alangulukilenga. Kabiji byo ajinga mwanamulume wa lwitabilo, walombanga javula. *
BYUBA GREGORY
Byonkatu byo baamba mu kibaaba kitanshi, Gregory ukolwa kikola kiiya na mambo a bijikila. Waamba’mba: “Nakijilemo kulanguluka pa makatazho.” Gregory waubile byepi na luno lukatazho? Waamba’mba: “Pa kukepeshako kijikila, natambwilanga bukwasho bwafumanga ku mukazhami ne balunda nami. Kabiji nesambile na dokotala ne kufunda mwakwikela na kikola kyami. Byo napimpwileko mu bintu bimo, nayukile mwakwikela na lukatazho lwami. Nangwa kya kuba bimye bimo ngikala na bijikila, luno nayuka bilengela bijikila kabiji nayuka ne mwakubila.”
“Muchima wa lusekelo ye muchi wawama.”—Byambo bya Maana 17:22
BYO MWAKONSHA KUBA
Inge kya kuba mwikala na milanguluko yatama, esekai kuba bino:
-
Nembai mu buku bintu byo mulangulukapo.
-
Buulaiko wakilongo nangwa mulunda nenu byo mubena kulanguluka.
-
Kange mulanguluke’mba byo mubena kulanguluka bijitu bulongo ne. Kya kumwenako, ishikishai’mba, ‘Nanchi kujipo bishiino bibena kumwesha’mba ino milanguluko yatama ijitu bulongo nyi?’
-
Kange mutwajijile kwikala na kijikila, bukaji nangwa kuzhingila ne. Ingijishainga bulume bwenu ku bintu byawama. *
Kishinka: Javula milanguluko yatama kechi iiya na makatazho ne, bino iiya na mambo a byo tulanguluka pa oo makatazho.
^ par. 3 Milanguluko yatama imo iiya na mambo a kukolwa kabiji ikebewa kutambula bukwasho ku ba dokotala. Labainga! kechi utongolapo jishinda jo mwafwainwa kulondela ne. Muntu mwine wafwainwa kulangulukapo bulongo ne kusala jishinda jo afwainwa kulondela.
^ par. 5 Masalamo avula a mu Baibolo, ke milombelo ya kwa Davida yo anembele.
^ par. 13 Pa kuba’mba muyukilepo byavula, monai mutwe wa pa nkupiko ubena kwamba’mba “Bya Kuba na Bijikila,” mu Kyamba kya Usopa kya July 1, 2015.
Mwakonsha Kutemwa
KYAMBA KYA USOPA
“Maana a Muntu Afwomona Bukaji Bwanji”
Bintu byamwekejile Davida, mfumu wa mu Isalela byakonsha kwimukwasha kuyuka bya kuba inge mwazhingila
LABAINGA!
Bintu Bilengela Bantu Kwikala ba Lusekelo
Nanchi maana a mu Baibolo akonsha kwimukwasha kwikala ba lusekelo nyi? Kino kibaba kyaamba pa mafunde ana a mu Baibolo akwasha bantu.
