Kechi Wasankijilepo Lwitabilo Lwanji Ne
Song Hee byo ajinga na myaka 11, bainanji bamwene kuba’mba musana wanji wakonkomana. Dokotala wamupimine ne kumutaana na kikola kilengela longololo kukonkomana byonka biji kisopelo kya “C” nangwa “S” kitelwa’mba scoliosis. Kino kikola kyabayile kya kuba wakebewenga kumutumbula pa kuba’mba bamubuke. Pano bino, Song Hee kechi waswile kumubikamo mashi ne. Banembi ba Labainga! besambile nanji pa bintu byo apichilemo.
Kimye kitanshi kyo bemutaaine na kino kikola, nanchi badokotala bemukwashishe nyi?
Pa myaka isatu, kwajinga badokotala babiji bampanga muchi ne kumona kikola kyami byo kyajinga, pano bino, longololo watwajijiletu na kukonkomana. Wakonkomene kya kuba ke afinankenye muchima ne mapwapwa mukachi ne kupeema ke kukatazhe. Onkao mambo, nakebewenga kuntumbula pa kuba’mba mpeemenga bulongo.
Mwaswile kwimutumbula nyi?
Ee. Pano bino, bambuujile’mba kikakatazha bingi pa kuba’mba bantumbule. Pa kikye kimye longololo wami wakonkomene kya kine kine. Nangwa byonkabyo, pa kuba’mba bantumbule napo kwaikele lukatazho. Na mambo a bintu byo naitabilamo byaimena pa Baibolo, kechi naswile kumbikamo mashi ne. *
Mwataaine dokotala wa kwimutumbula kwakubula kwimubika mashi nyi?
Amiwa ne ba mama twamwene shayuka umo monka mu kyalo mo twikala mu Florida, U.S.A. Nangwa byonkabyo, byo namubuujile’mba kechi nsakuswa kumbikamo mashi ne, aye waambile’mba kafwako dokotala wakonsha kubuka kikola kyami kwa kubula kwingijisha mashi ne. Kikwabo, waambile’mba inge babule kuntumbula kechi nkafikizha ne myaka 20 ne. Pa kyo kya kimye najinga na myaka 14.
Abya mwamulumbulwijile bintu byo mwaitabilamo nyi?
Ee. Namubuujile namba byo naitabilamo byaimena pa Baibolo, ne kuba’mba Lesa waambile’mba mashi onsetu azhila, a muntu nangwa a nyama. * Bena Isalela bebabuujile ne kuba’mba kuja mashi ajinga mambo akatampe bingi kya kuba inge babula kukookela uno mukambizho bafwainwe kwibepaya. * Namumwesheshe kinembelo kya Byubilo 15:19, 20. Kino kinembelo kyakambizha bena Kilishitu amba: “Bakanenga . . . mashi.” Kino kilumbulula’mba mashi kechi afwainwa kubikwa mu mubiji nangwa kwiaja mu jishinda jiji jonse ne.
Uno dokotala waubile byepi?
Wakoselepotu’mba kana bambike mashi. Kabiji kyo nakuminyeko ke kya kuba’mba ba mu kipatela bambuujile’mba umvwe nswe kumbika mashi, kechi nsakupana mali pa kuba’mba bantumbule ne.
Kine bakebeshe bingi kwimukwasha. Pano anweba ne bainenu mwaubilepo byepi?
Nangwa kya kuba kafwako nangwa umo wakebelenga kuntumbula kwa kubula kumbika mashi ne, bino kechi twakebelenga kusankilapo bintu byo twaitabilamo ne. Pano bino, bintu byakijilemo ne kutama. Mwayila mizhilo, nakijingatu mwanyike. Na mambo a kuba’mba kikola kyami kyabayijilengako, mambo ami beatwajile ku kije kya mambo. Nangwa byonkabyo, kyawamineko ke kya kuba’mba wimenako kafulumende mu mambo mu kyalo kya Florida witupeele moba 30 a kukeba dokotala wakonsheshe kunemeka byo naitabilamo.
Wamwekele nyi?
Ee! Kavoto ka Bakamonyi ba kwa Yehoba ka Bambañana na ba Mingilo mu Bipatela kesambile na dokotala wa ku New York wayuka kubuka kikola kikonkomeka longololo waswile kumbuka kwa kubula kwingijisha mashi, kabiji waishile na kummona. Onkao mambo, twataaine dokotala moba 30 etupeele kije kya mambo saka akyangye kupwa. *
Kuno kwimutumbula kwaendele byepi?
Kwaendeletu bulongo. Pa kuba’mba olole longololo wami, uno dokotala wa jizhina ja Robert M. Bernstein, wakujile tubyela mu musana. Wantumbwile pa bimye bibiji. Wantumbwile jitanshi, kabiji byo papichile milungu ibiji wabwelele wantumbula jikwabo.
Mambo ka o aubijile byobyo?
Waubile bino kuba’mba inge kimye kitanshi kya kuntumbula mashi avula afuma, pa kupitapo milungu ibiji maselo achila alengela mashi kuvula mu mubiji inge avujile saka akyangye kuntumbula jikwabo. Pano bino, pa bimye byonse bibiji byo antumbwile mashi achechetu afumine, nebasanchila bingi badokotala pa byo banengezhezhe bulongo bya kuntumbula, pa busendwe bwabo ne kwingila bulongo. Kabiji natendekele kukosa kwa kubula kwikala na makatazho akonsheshe kwiyako umvwe kya kuba bambikilemo mashi. *
Dokotala wimutumbwile waumvwine byepi pa byafuminemo?
Badokotala bafwainwa kulanguluka pa ubena kukolwa ne kunemeka bintu byo aitabilamo
Watemenwe bingi. Kabiji waambile’mba: “Kubuka muntu kechi kwaimenatu pa kumutumbula ne.” Wanungilepo amba badokotala bafwainwa kulanguluka pa ubena kukolwa ne kunemeka bintu byo aitabilamo ne byo anemeka. Bakamonyi ba kwa Yehoba ne bantutu bakwabo bavula betabizha kino kishinka kyo aambile.
^ par. 7 Bainanji Song Hee Bakamonyi ba kwa Yehoba. Song Hee naye waitabila mu bintu byaitabilamo bainanji kabiji wabatizhiwe mu 2012 saka aji na myaka 16.
^ par. 17 Tuvoto twa Bambañana na ba Mingilo mu Bipatela tukwasha Bakamonyi bakolwa kutaana badokotala bafwainwa kwibabuka bulongo kwa kubula kwingijisha mashi.
^ par. 21 Mu kibaba kyaamba pa bizumba biji mu kubika muntu mashi, kipamo kitala pa bya kubuka bantu mu New South Wales (Australia) kitelwa’mba Clinical Excellence Commission, kyaambile’mba: “Kubika muntu mashi kujitu pamo na kumubikamo kinungwa kya mubiji wa muntu mukwabo. Inge mwabika muntu kinungwa kya mubiji wa muntu mukwabo, mubiji kechi wikala bulongo ne, mambo kechi biswañana ne. Kyanema bingi kuyuka bizumba biji mu kubikamo muntu mashi a muntu mukwabo.”
