BIBENA KUMWEKA ANO MOBA

Kuzhokoloka ntanda yonse, bantu babula kuswisha byubilo bya bakwabo babena kuvujilakotu, ne bibena kulengela ke misalululo ya bikoba, nshiji, kutumbijika byalo, misalululo ya milaka ne bisho bya bupopweshi byakilamo kutama.

BYAMBA BAIBOLO

Kimye Yesu Kilishitu kyo aingijilenga mwingilo wanji pano pa ntanda, waikelenga na bantu babulanga kunemeka bakwabo. Bayudea ne bena Samaliya kechi baumvwañananga ne. (Yoano 4:9) Banabakazhi kechi bebanemekanga ne. Bantangi ba bupopweshi bwa Bayudea balengululanga bantu babula kufunda. (Yoano 7:49) Yesu Kilishitu aye kechi byo byo aubanga ne. Balwanyi banji baambile’mba: “Uno muntu utambwila bandengamambo ne kuja nabo.” (Luka 15:2) Yesu wajinga na lusa, watekenye, kabiji waswishanga byubilo bya bantu mambo kechi waishile na kuzhachisha bantu ne, bino waishile na kwibakwasha kwikala balunda na Lesa. Butemwe bo bwamulengelanga kuba bino.—Yoano 3:17; 13:34.

Butemwe bo bulengela kuswisha byubilo bya bakwetu nangwa kya kuba bambulwa kulumbuluka. Pa Kolose 3:13 paamba’mba: “Itekenyainga anwe bene na bene ne kwilekelako mambo umvwe umo uji na mambo na mukwabo.”

“Kyakila pa byonse, itemwishai anwe bene na bene, mambo butemwe buvweta pa mambo avula.”—1 Petelo 4:8.

BIBENA KUMWEKA

Bantu bavula bakeba bingi kulama mizhilo ne kwikala mu mutende. Na mambo a kino, bebikako kwikala na pa kupelela mu byo boba.

BYAMBA BAIBOLO

“[Butemwe] kechi buba bya bumvu ne.” (1 Kolinda 13:5) Nangwa kya kuba Yesu waswishanga byubilo bimo bya bantu, bino kechi waswishanga byubilo bya bumvu, bukamfutumfutu, ne byubilotu bikwabo byatama ne. Yesu waambilangamo bantu bajinga na bino byubilo byatama. (Mateo 23:13) Waambile’mba: “Yense uba byatama washikwa kyeya [kya bukine].”—Yoano 3:20.

Mutumwa Paulo waambile’mba: “Shikwai kintu kyatama; kakachilai ku kintu kyawama.” (Loma 12:9) Paulo walondelanga bino byambo byo ambile. Kimye bena Kilishitu Bayudea kyo besalulwilenga ku bena Kilishitu ba mu bisaka bikwabo, Paulo wajinga Muyudea wibajimwineko mu butemwe. (Ngalatiya 2:11-14) Wayukile kuba’mba Lesa wabula “misalululo” kechi utala bulongo kutumbijika milaka ne bisho bya bantu banji ne.—Byubilo 10:34.

Byo baji bena Kilishitu, Bakamonyi ba kwa Yehoba balondela mafunde a mu Baibolo a byubilo byawama. (Isaya 33:22) Kechi baswisha byubilo byatama mu bupopweshi bwabo ne. Kipwilo kya bena Kilishitu kyatoka, kechi bafwainwa kwikitamisha ku bantu balengulula mizhilo ya Lesa ne. Onkao mambo, Bakamonyi bakookela mukambizho wa mu Baibolo wa kuba’mba: ‘Fumyai muntu mubi mukachi kenu.’—1 Kolinda 5:11-13.

“Anweba mwatemwa Yehoba, shikwai byatama.”—Salamo 97:10.

BYAITABILA BAVULA

Na mambo a kuba’mba twibambulwa kulumbuluka, tukatwajijilatu na bubi bwetu.

BYAMBA BAIBOLO

Ngauzhi Habakuka walombele kwi Yehoba Lesa amba: “Mambo ka o mwalekelatu bantu na kumanyika bakwabo? Mambo ka lonaiko ne bukapondo o byaikela ku meso ami? Kabiji mambo ka lutobo ne malwañano o byavujila?” (Habakuka 1:3) Lesa wamulayile ngauzhi wanji amba ukonauna babi, kabiji Lesa waambile pa uno mulaye amba: “Kwa kubula nangwa kuzhinauka ne, kikafika. Kechi kikakelwa ne!”—Habakuka 2:3.

Pa kino kimye bandengamambo bafwainwa kulapila ku byubilo byabo byatama. “Nkambo Mfumu Yehoba waamba’mba, ‘Nanchi amiwa nsekela mu lufu lwa muntu mubi nyi? Nanchi kechi nkeba namba aleke kuba bintu byatama kuba’mba ekale na bumi nenyi?’” (Ezikyo 18:23) Aba bakeba Yehoba kupichila mu kuleka byubilo byatama bakonsha kutengela kimye kya kulutwe na luketekelo. Byambo bya Maana 1:33 byaamba’mba: “Awa uñumvwina, ukekala mu mutende. Kabiji kechi ukachina bya malwa ne.”

“Kwashalatu pacheche, babi kechi bakekalako ne . . . bakimote bakaswana ntanda, kabiji bakasangalelanga mu kuvula kwa mutende.”—Salamo 37:10, 11.