Mwingilo wa Kufunjisha Bantu Baibolo Wavwangamo ne Kufunjisha Bantu Kutanga ne Kunemba

JIZHAI

“Kutanga ne kunemba ke luusa lwa bantu bonse kabiji kukwasha bantu kuyuka mwakwikela ne kuyilako palutwe.”—UNESCO. *

MASAWAKYA amwesha’mba mu ntanda yonse bantu kukila pa 700 milyonyi baji na myaka 15 ne kuya peulu kechi batanga nangwa kunemba ne. Kino kibalengela kubula kuyuka bintu byavula, kuvwangako ne mafunjisho a byubilo byawama ‘anembelwe’mba tufunjileko’ ataanwa mu Baibolo. (Loma 15:4) Onkao mambo, mu byalo byavula, Bakamonyi ba kwa Yehoba mu mwingilo wabo wa kufunjisha bantu Baibolo mwavwangwa ne lunengezho lwa kufunjisha bantu kunemba ne kutanga kyatutu. Nanchi uno mutanchi waingila bulongo nyi?

Monai mwingilo wingila Bakamonyi ba kwa Yehoba mu Mexico, kyalo mo bamba Kisipanishi. Kutendeka mu mwaka wa 1946, Bakamonyi bafunjisha bantu kukila 152,000 kutanga ne kunemba, kabiji bavula nabo batendeka kufunjisha bakwabo. Bakamonyi batambula makalata avula bingi kufuma ku kafulumende a kwibasanchila pa mwingilo wabo wa kufunjisha bantu kutanga ne kunemba. Nkalata imo yaambile’mba: “Kipamo Kitala pa Masukulu kibena kwimusanchila ne kwimutakaika pa mwingilo ye mubena kwingila wa kukwasha kafulumende kufunjisha bakulumpe kutanga ne kunemba.”

Banyike ne bakulumpe bamwenamo bingi mu luno lunengezho lwa kufunda kutanga ne kunemba. Muntu umo wamwenamo mu luno lunengezho ke ba Josefina. Ba Josefina banembeshe mu uno sukulu saka baji na myaka 101, kabiji bafunjile uno sukulu pa myaka ibiji.

Nangwa kya kuba Kisipanishi ye mulaka wamba bantu bavula mu Mexico, bino kechi ye yenkatu ye bafunjishishamo bantu kutanga ne kunemba ne. Mu mwaka wa 2013, bantu bamba milaka ikwabo itanu na isatu bafunda kutanga ne kunemba mu milaka yabo kwingijisha uno mutanchi.

Kuyuka kutanga ne kunemba kulengela muntu kufunda bintu byavula bingi. Kyakilamo kunema, kuyuka kutanga ne kunemba kulengela bantu ba mitundu yonse kutanga Baibolo, buku wanembelwe na lutangijilo lwa mupashi wa Lesa kabiji wakonsha kufumya bantu mu buzha bwa bingelekezha, mafunjisho a bupopweshi bwa bubela ne byubilo byatama.—Yoano 8:32.

^ par. 2 United Nations Educational, Scientific, and Cultural Organization.

WALENGEJILE BANSEMI BANJI KUKUMYA

Daniel wafunjile Mulaka wa Kwamba na Maboko wa kina Mexico na bukwasho bwa maselech

Daniel washinka matwi. Kechi wisambanga bulongo na bantu ne. Kino kyamulengelanga kuzhingijila bansemi banji umvwe babena kwisamba nanji. Daniel byo afikizhe myaka ya kusemwa 23, Kamonyi washinka matwi wa jizhina ja Josué watendekele kumufunjisha Baibolo. Patanshi baingijishanga maboko ne mubiji ne bipikichala. Kepo na bukwasho bwa maselechi, Daniel wafunjile Mulaka wa Kwamba na Maboko wa kina Mexico. *

Daniel byo atendekele kwingijisha mafunde a mu Baibolo, waikele na kitelwa mu Baibolo amba “bumuntu bupya” bumwekela mu byubilo nabiji ‘kifyele, lusa, kwipelula, kukooka muchima ne butekanye.’ (Kolose 3:10, 12) Daniel ulondela ne mukambizho wa mu Baibolo wa kukookela ne kunemeka bansemi. (Efisesa 6:1, 2) Bansemi banji bakuminye bingi. Bainanji bajijile ne mipolo pa kusanchila Josué pa kukwasha mwanabo kwikala na bulunda na Lesa. Mu mwaka wa 2007, Daniel wabatizhiwe ne kwikala Kamonyi wa kwa Yehoba.

^ par. 12 Mu Mexico, mabuku 46 a Bakamonyi ba kwa Yehoba mu Mulaka wa Kwamba na Maboko wa kina Mexico beabika pa maselechi. Pa keyala wetu wa pa intaneti wa jw.org, paji mabuku a mu milaka ya kwamba na maboko 80. Pa kuba’mba bampofu nabo bamwenengamo, mabuku abo anembwa.

LABAINGA!