BYAMBA BANTU

Bantu bavula balanguluka’mba kwikala na bunonshi ko kuleta lusekelo. Kabiji balanguluka ne kuba’mba kwikala bulongo kwaimena pa mali muntu o aji nao. Na mambo a kubula kufunda kufika palepa, kubula kwikala na bipatela byawama ne bintutu bikwabo, bayanji kechi bakonsha kwikala bwikalo bwawama ne.

BYAMBA BAIBOLO

Baibolo ufunjisha’mba lusekelo lwa kine kechi lwaimena pa bunonshi ne, bino lwaimena pa kwikala na bulunda bwawama na Mulenga wetu. Baibolo waamba’mba: “Bo ba lusekelo aba baji na muchima wa kukeba kuyuka Lesa.” (Mateo 5:3) Nangwa kya kuba baji na mali nangwa ne, aba bakeba kwikala na bulunda bwawama na Lesa bakonsha kwibikako kwikala na ndangulukilo ya Lesa pa bintu bimo, kabiji bakonsha ne kufunda bukine bwa mu Baibolo buleta lutekenesho lwawama ne mutende wa mu milanguluko. Abino byo bileta lusekelo lwa kine.

Bantu bomvwisha ne kulondela lujimuno lwa mu Baibolo bayuka bya kuba inge ke bayande. Lujimuno lwa mu Baibolo lukwasha bantu kuchinuzhuka byubilo byatama, nabiji kupepa fwanka ne kukizhamo kutoma maalwa. Byubilo bya uno mutundu bilengela bantu konauna mali avula ne kwibalengela kukebanga mali avula a ku bipatela inge babela.—Byambo bya Maana 20:1; 2 Kolinda 7:1.

Baibolo waamba ne pa bintu byatama bifuma mu kwikala na lwiso ne kutemwisha mali. (Mako 4:19; Efisesa 5:3) Luno lujimuno lukwashako muntu kuchinuzhuka konauna mali na kukaya makayo a kuchikapo nangwa “kutemwa mali,” kwalumbululwa mu Baibolo amba “ye muzhazhi wa misango yonse ya bubi.” (1 Timoti 6:10) Binembelo bitujimunako amba: “Muntu nangwatu ekale na bintu byavula, bintu byo aji nabyo kechi byo bimulengela kwikala na bumi ne.” (Luka 12:15) Onkao mambo, mali kechi akonsha kupota bumi ne. Inge ketulondele lujimuno lwa mu Baibolo, tukekala bwikalo bwa lusekelo.

Nangwa kya kuba bayanji kyakonsha kwibakatazha kutaana kajo, bivwalo ne mazubo, bino bakonsha kwikala na lusekelo inge kebasekele mu byonka byo baji nabyo, ne kuta muchima pa kusangajika muchima wa Mulenga wabo ne kuba kyaswa muchima wanji. Bayuka mulaye wa mu Baibolo wa kuba’mba “Mapesho a Yehoba o alengela muntu kunonka, kabiji kechi wiapaina pamo na misongo ne.”—Byambo bya Maana 10:22.

KINEMBELO KYAKONSHA KWIMUKWASHA: “Bo ba lusekelo aba baji na muchima wa kukeba kuyuka Lesa.”—Mateo 5:3.

BYAMBA BAIBOLO

Nangwa kya kuba bantu bakankalwa kupwisha buyanji, mu kimye kyafwainwa Lesa ukafumyapo bileta buyanji, ko kuba’mba bantu betemwatu bene ne makafulumende ajiila bantu makusu pa mitwe. (Musapwishi 8:9) Mulenga wetu ukafumyapo makafulumende atangijilwa na bantu betemwatu bene. Bufumu bwanji nangwa’mba kafulumende wa mwiulu ukapa bangikazhi pano pa ntanda bintu byonse byo bakeba kwa kubula misalululo. Baibolo walaya’mba Mfumu wa Bufumu bwa Lesa ukapwisha buyanji. “Mambo aye ukapokolola muyanji ukeba bukwasho . . . Ukobila lusa mulanda ne muyanji, kabiji ukapulusha bumi bwa bayanji.”—Salamo 72:12-14

Ntanda ikekala paladisa kabiji bantu bonse bakekala na mazubo ne kajo kabiji kechi mukekala bayanji ne. Mu buku wa mu Baibolo wa Isaya, Lesa walaya’mba bantu banji “bakashimika mazubo ne kwikalamo, kabiji bakajimba miñanzañanza ne kuja bipangwa byayo. . . . Bakamwenamo lusekelo mu mingilo yo bakengilanga.” (Isaya 65:21, 22) Bantu kechi bakekalanga na nzala ne, bonse bakeyowanga “kijiilo kya kajo kawama” ne bintu bikwabo byawama bikafuma kwi Yehoba.—Isaya 25:6.

MAMBO KA O KYANEMENA?

Kulanguluka pa mulaye wa Lesa wa ntanda mukabula buyanji, utundaika bantu babena kuyanda kuba’mba Lesa wibata bingi muchima kabiji ne kuba’mba katatakatu buyanji bupwe. Kulanguluka pa ino milaye kwakonsha kulengela muntu ubena kupita mu makatazho kuchinchika meseko o abena kupitamo.

KINEMBELO KYAKONSHA KWIMUKWASHA: “Aye ukapokolola muyanji ukeba bukwasho . . . Ukobila lusa mulanda ne muyanji, kabiji ukapulusha bumi bwa bayanji.”—Salamo 72:12, 13.